話說今日放工, 我照舊搭車返屋企

都算幾好彩, 上車時還有些空坐位可以坐(下層)

啱啱坐低, 坐前面一對夫婦就係度大叫, 話架車冇冷氣好焗

不斷係度大叫要求司機開大啲個冷氣

個司機就離開咗個司機位, 走入車廂feel咗feel

真係冇乜冷氣嘅, 但都冇辦法, 佢話已經開到最大

聽上過上層落黎戈啲人講, 上層是夠冷氣的, 只係下層不夠

但我感覺到我頭頂對上戈個冷氣係有少少風出的

係哩個冇辦法既情況下, 司機唯有繼續開車啦

跟住個老婆就話: 嘩, 乜個司機咁鬼惡嘅

我心諗: 咁都叫惡? 司機都已經親自入車廂睇情況, 仲想點?

冷氣已經開到最大, 佢都冇辦法, 你估佢坐戈個位唔熱嫁咩??

佢哋咁樣一搞, 已經用咗5-10分鐘, 我已經有少少唔耐煩

佢個女(似小學生)都已經叫佢唔好再講, 佢仲好威咁同返個女講"道理"

司機開車後, 佢都仲係度嘈嘈嘈, 話咁焗好易有人暈喎...

超級煩..冇錯, 我都覺得架車係有D焗, 但未至於接受唔到囉, 再熱啲我都坐過啦..

嘈到下一個站, 有人想上車, 戈兩公婆係度大叫叫D人唔好上車

話: 架車冇冷氣好焗嫁, 你地唔好上黎, 哩度就黎冇氧氣, 一陣焗暈你地!!

我極之無奈..我諗呀司機叔叔都係...

(我睇唔到D人有冇上車)之後個司機想開車

個老婆又係到叫: 唔係下嘛?! 你仲開車?!

佢老公: 不如你打電話返公司, call架空車過黎啦..

某乘客(懷疑智商有問題)[用朗誦咁嘅語氣對住全部乘客講]:

"係啊, 依加係度換車搭仲得, 一陣入咗隧道, 有人暈咗, 咪塞住成個隧道囉, 到時好麻煩嫁"

個司機終於頂唔順佢哋, 真係打電話返公司, 話等一陣會有車黎

後來有乘客陸陸續續落車...等下一班車...真係癲癲地嫁-_-

我就繼續坐係個位度, 我確實唔覺得架車真係焗得咁離譜, 我只希望司機快D返黎開車..

隔咗陣司機上上層叫哂啲人落車..我都未知咩事

上層啲人落哂車後, 佢先同我哋(下層嘅人)講話架車熄引擎, 唔開車嫁喇

哈哈, 真係除咗得啖笑都唔知可以點..

落車後, 等咗大約5-10分鐘有第二班車黎..我照上, 我淨下想快D返屋企

不過哩架車迫到差啲捉唔到扶手, 差不多企都冇位企, 有幾次轉彎仲差啲仆咗去人地度

幾經辛苦終於落車, 腳仔都軟埋..救命`

真係多得戈對痴線夫妻唔少, 小題大作, 搞咗我哋起碼半粒鐘

咁多要求, 自己買架私家車揸啦, 你冷氣開到雪房咁凍都得, 又冇人同你爭氧氣

如果架車得你一家人我話知你, 但好心唔好阻住其他人啦, 人地第二日大把野做嫁

好彩聽日放假, 唔係真係唔夠訓, 不過我想早啲返屋企多啲囉

唔係佢哋, 我諗我已經返到屋企沖完涼, 舒舒服服睇梗電視:@

鄧第二日要返工戈D人陰公, 明明本身可以一早返到屋企, 唔知佢哋之後等咗幾耐呢...囧

絕對、絕對唔好再比我遇到哩啲事喇!