黎到第三日,最精彩最特別最多事的一日...太難忘...
呢一日我地要離開季候鳥...
我一早起身就唔舒服...食早餐時更去嘔左...
一直都好驚坐個5個鐘車會嘔...嘔都唔知點算...
點知,個司機飛車...係山路度左飛右飛, 飛到我來得及驚都來不及嘔...
佢飛車,飛左三個鐘就到左...飛完車,我地既騎馬後遺症出現...
每個人都腰痛腳痛...前一日騎馬騎左成3個鐘...真係周身骨痛...
係車上面我地討論今晚去司機姑爹(姑丈)家作客時食咩好, 藍仔提議食燒全牛/豬/羊...
最後打算食牛...於是叫司機大哥去訂,然後晚上順便拎埋去佢姑爹家...
我地一去到,先去住既地方放低行李...
我地呢兩晚都住係香格里拉古城入面, 古城靚到呢...
呢兩晚都會住係梅里花園
住係三樓,行上去,我又喘氣 -___-
去到既時候,收到萬札(司機姑爹)的電話,佢話俾我地知而家牛有病,唔好食全牛,食燒豬算了
-________________________________-
我地已經食左兩日牛...呢句話,亦解開左點解第一日黎時要狂消毒既迷團...
休息左一陣...食左個康師傅杯麵,去古城附近行左一行...
去左個博物館, 係博物館又學識左句藏話,加西格拉,係感謝既意思...
呢句係繼俾人呃左叫佢靚仔之後學識既第二句藏語...都係我識得既兩句...
我地本身諗住上去呢個大型轉經筒度, 不過一見到D樓梯...就唔想郁...特別係處於腳痛腰痛既狀態之下...
行左轉,我們決定出發去看花海...
上車時,司機已經拎左隻豬黎,好香
去納帕海睇...但發現個度都只係騎馬...而琴日真係騎到驚,於是我地就去第二個景點睇
點知去到門口...關左門...原來因為個度本來可以騎牛睇花...但因為牛病毒,個度就要消毒...
於是...我地沿路尋找花既蹤跡...
但係...花...在哪裡???????
個司機話帶我地去佢住個條村個度睇...D花好靚...
好吧,去吧!!!!反正沒看到...
最後呢...我地俾佢點左入一個樹林...入面...一朵花都冇見到...烏蠅就大把...
走既時候, 路經了一個地方,俾我地發現到花...
於是停左落黎睇...
然後我地就出發去萬札家了
呢個係佢屋企個門口-____-
入到去就四處睇下...成間屋都係佢親手建...連D花紋都係佢親手整...佢話佢同朋友一齊整左幾年...
去到個度坐低...就倒起酒來...青稞酒...
我地個個都知道青稞酒好犀利,好易醉...仲好難飲...
佢地三個太偉大...保護左我,說我是小朋友,不能飲酒...
係個度,唔飲酒代表唔俾面,好彩萬札都冇野,仲拎左枝野飲俾我
佢地隨即又拎左D奶榨出黎俾我地食...思姐拎左一舊俾我...
我咬左一大啖...中招...
好重奶味呀...係嘔奶個種味...
我同B姐同時食左,有同一反應, 然後藍仔同思姐問: 咩味道
我地話: 好味道!!!!
就係咁叫佢地食, 佢地食完...呵呵...一樣感覺
因為識得萬札,所以我地直接講左我地唔係好食得慣呢種味道, 佢係咁笑我地食個樣
然後...我地又飲酥油茶了,今次呢個係佢地整,特別濃,好飲,比起第一日黎到時飲那杯好飲好多...
飲酥油茶飲剩4分1,就會加D青稞粉落去,然後會整成青稞餅
整係要自己整...自己用手拿...整左我同思姐好耐先整到一舊野出黎...就好似小朋友玩泥膠咁...
整唔係問題,問題係整完個舊野要自己食埋佢...
好啦,食就食啦...一咬落去...好似食緊泥咁...哈哈,而萬札望住我地...呵呵...咁就食曬成舊花生味既泥佢啦...
食緊時蘆仔仲影相...大哥...此時人家食緊泥...可唔可以唔好影...
思姐同B姐真係犀利, 一聽到影相就可以隨時擺pose...我仲處於點吞埋口入面個舊泥既心情...
未食得飯, 萬札拎左佢D槍出黎...
佢一拎出黎,嚇親,之後佢話冇子彈,怕佢兩個仔拎黎玩,所以唔洗驚...
當我鬆左一口氣既時候,佢突然拎把槍指住我...大哥,我真係驚嫁...我好驚死嫁!!!
冇幾耐,就開始食我地個隻燒藏香豬
我知道藏族係重男輕女,男權為主既民族, 但我唔知道,係藏族,女人係唔能夠坐係桌子食飯,
睇落,我地呢三條女太犀利, 竟然可以坐係張桌子度食飯XD
食飯時佢地飲好多酒, 我汽水代酒XDD
佢地乾酒我乾汽水...
食到一半, 藍仔已經飲醉,出左去嘔XDDDDDDD
我地問司機(22歲),佢老婆幾多歲,佢話18歲
我就話: 不就跟我差不多
萬札: 你還說你小朋友, 在我們這裡, 都當媽媽啦...
個時我幾驚佢叫我飲酒XDD一陣4個都醉曬真係唔知點算
最後思姐同B姐係度同佢飲...
我期間走左去同萬札妻子聊天,之前司機同過我地講,佢地呢度唔係自由戀愛,係由父母安排,夫妻間沒有什麼愛字
萬札妻子問我幾多歲,我話今年18歲, 佢問我: 有小孩嗎?
其實個時呆左呆,不過諗番起佢地呢度好早結婚, 我就答佢: 還沒,在我們那,都比較晚才結婚,大多都是二十多歲才結婚的...
然後我問佢幾時結婚,佢話佢十八歲就同萬札結婚,仲同我講係藏族,女仔十五歲,父母就開始安排婚事, 佢十八歲先結已經算遲...
佢話,係藏族,女人冇地位,唔可以工作,只可以待在家中...父母不在身邊, 嫁了之後幸好生了兒子,不是生了女兒, 在這裡,生女兒是一件沒瞼的事, 而現在兩個兒子又到寄宿學校去了...
講下講下佢就想喊...我最怕睇到人喊,雖然自己都好易喊, 跟住我拍下佢,就轉移話題
然後坐番去桌子度, 萬札同我地講佢既情史XDD
佢同我地講左摩梭族既走婚族,男女一睇上眼, 夜晚時,個男就會去個女既花樓,然後會發生關係...
佢話佢係個度逗留過幾個月, 識左個女仔...但冇同佢發生過關係...而家同佢做好朋友...
佢仲同我地講左門巴族既野...門巴族既人係一妻多夫制,因為冇錢俾聘金,所以會幾個兄弟一齊娶一個老婆,然後生左既仔女都唔會知道邊個係自己老豆
係呢個地方,唔會有爸爸,只有舅舅...
佢又同我地講佢地呢度夜晚會有熊有狼...所以佢地會養藏獒黎趕走佢地,保護佢地既牦牛, 唔係用黎做寵物...
佢話D狼多數9點幾出黎,而個時係8點幾...講到我都驚驚地XDD
我地最後8點幾就係佢屋企走...臨走前佢圍左條白色既巾係我地頸上面,佢話係祝福黎
然後B姐好high咁話: 萬札,我們來拍照!!!!
其實我估萬札都醉左, 佢送我地上車時同我地握手,佢無啦啦錫左落黎隻手度, 我清醒嫁大哥, 俾佢既動作嚇親...
然後司機車番我地番去梅里花園...
落左車,佢話送埋我地入去...
其實個時,思姐,B姐同藍仔都醉曬, 得番少少意識嫁咋...
我地4個係古城入面痴埋一舊咁行,B姐同思姐一直講: 藍仔要保持清醒保護我地,我地要張開眼...我地要保持清醒,要保持清醒...
佢兩個全程就係度講我地要保持清醒...藍仔其實個時想嘔,佢就一直碌大隻眼,然後話: 我上三樓就會嘔...我而家清醒,好清醒
佢地三個講既野,完全就係同飲醉酒既人話自己冇醉一樣...
個時我拉住佢三個,個司機係我隔離,仲係度撩我傾計,同我講佢一陣去游水...完全冇理過佢三個醉人...
番到梅里花園門口,藍仔就叫佢走,我地4個就上樓...
藍仔同B姐兩個行前面,我同思姐兩個行後面,
呢個時候...真係大劑!!!!!!!!!!!!大件事....
6隻狗跑過黎圍住我同思姐...哎呀,想點呀
我同思姐都好驚狗,驚到痴線個種...係咁叫係咁叫...
6隻大狗呀媽咪...圍住兩個驚狗既人,其中一個仲要醉左...
我地狂叫,叫到有人出黎望我地發生咩事,而個條友只係係度望又唔黎幫我地趕走D狗...
思姐仲嚇到喊...呢個時候我唔知邊度黎既膽, 叫思姐唔好驚, 我地走喇, 冇事冇事...
明明就有事,明明就好驚好驚,明明驚到唔知點算...
然後B姐聽到我地狂叫,伸手黎叫我地捉住佢, 黑暗中散光睇唔到野, 我就係咁伸手搵佢隻手, 好不容易捉到隻手我就死捉住, 跟住佢走...
走既時候仲聽到個女人講: 洗唔洗咁驚呀...
個下幾想打佢呀,而家驚狗都唔俾咩,不過冇理佢,唔得閒理會佢,因為個三個醉酒人已經開始唔掂...
行樓梯上到三樓...藍仔即嘔...嘔左好耐...
B姐同思姐就攤左係房門出面既凳度...得我一個人清醒...然後搵思姐個袋搵門匙開門,開左門扶左思姐入去,又去B姐個袋搵門匙...
送左佢兩個入房, 我又番去房睇思姐...思姐又嘔左...
然後B姐又係佢房嘔左...三個人嘔曬...然後訓埋...我就去沖涼....沖完等左陣,見佢地訓曬我就訓...
呢一日太多事發生...4個人都嘔過...同埋俾狗圍真係好黑仔,仲要6隻一齊黎...
我前世唔知係唔係得罪左狗,今世係咁俾狗圍...狗呀狗,你可唔可以唔好再圍我, 我有多幾次經驗都一樣咁驚你...
|
