開左學兩個星期，番930，但730就要出門口係幾難過既事⋯⋯為既就係避免塞車遲到⋯⋯

第一堂就係930，平時係中環去港大搭特快巴士只係十分鐘，但朝早竟然接近半個鐘⋯⋯點解可以咁⋯⋯

港島區塞車情況絕對不能想像，番學塞都算啦，有次同同學一班人兩點鐘放學搭小巴去中環轉車番屋企，係斜路塞車⋯⋯點解可以咁⋯⋯

港鐵港大個個站快啲通車啦，2014年通車，希望係年頭唔係年尾12月⋯⋯

一開始係中環搭巴士真係好驚，好驚上錯車然後唔知去左邊度XD

而家已經習慣，只係唔敢番學個時搭小巴，因為唔識叫落車XD而放學時因為係坐去總站，所以先敢搭！！

一直唔肯認自己係路痴，但⋯⋯我⋯⋯前日⋯⋯係⋯⋯IFC盪失路T‵T

因為小巴塞車，轉唔到入去交易廣場，於是開門俾我地落車⋯⋯我個時諗：入到IFC咪去到香港站囉⋯⋯

但原來我可以搵唔到嫁⋯⋯原來唔同門口入我就唔識行去嫁喇⋯⋯其實咁多年黎，我係點生活⋯⋯應該係一直都行緊同一條路⋯⋯

一星期reg左三次tutorial，打左3次仗咁，第一次reg時，30秒就full左3班⋯⋯兩次都係夜晚9點鐘，但琴日係朝早8點鐘，番1030都要早起上網reg tutorail，好彩都reg到自己想要既時間，唔係既話我個時間表就爛到飛起嫁喇

係大學入面識既人大部份都好好，喺有個人好奇怪，除左鍾意睇我同人whatsapp內容外（係光明正大咁拱個頭埋黎睇個種）

仲鍾意同我講佢既成績-_-佢講佢自己DSE30分，兩個5星星，目標係first honour畢業⋯⋯然後仲同另一個yr2 AL既人爭論到底AL 既A難拎啲定係DSE5星星難拎啲-_-

我佩服佢有勇氣同人講佢要first honour畢業，亦希望佢成功⋯⋯只不過我覺得，入到大學，中學成績、公開考試成績如何，已經唔重要⋯⋯唔洗再將自己既星星、A放係嘴邊⋯⋯

我唔覺得成績代表任何野，係大學，遇到既人分分鐘係爆星星爆A、狀元⋯⋯兩粒星星30分⋯⋯又如何呢？點解仲要俾過去既事牽制住自己？

大學，有唔同既人係度學習，有exchange有non-local有local⋯⋯local亦有jupas同non-jupas,有al又有dse⋯⋯

唔通你可以話non-jupas 讀asso升上黎既人差？佢地既公開試成績的確未必係最好，未必有星有A，又如何？佢地亦靠自己既努力用另一條路入大學，同你做緊同學⋯⋯

我一直唔鍾意人用成績去衡量另一個人，成績的確代表一個人某一方面既能力，不過唔係全部⋯⋯成績重要，不過唔係最重要⋯⋯

我覺得，要成為一名老師，唔可以有呢種看重成績既諗法⋯⋯而我口中既呢個人⋯⋯將來正打算做老師⋯⋯⋯⋯⋯⋯⋯⋯⋯⋯⋯⋯⋯⋯⋯⋯