開左學一個幾月，感受原來可以咁大⋯⋯

記得第一次去呢度面試，因為唔識路，又紅色暴雨，於是問人路

點知個D學生唔理我，望都唔望我一眼就走左去⋯⋯到入到呢間學校後，真係成日都俾我遇到呢D人⋯⋯

個日放學等極都等唔到車，幾經辛苦截左架小巴，下一秒就踏上樓梯上車時，後面有對年輕男女衝左上前拍卡上左車

然後個司機同我講：得兩個位咋，你唔好上喇⋯⋯最後我唯有後退排番去我條巴士隊，默默收埋我張八達通，然後等多20分鐘先有車⋯⋯

其實成件事好無奈，不過我又冇嬲過冇唔開心過⋯⋯可能係因為個日我朝早開始已經好黑仔XDDD

不過值得高興既係，中文教育係一個好有愛既科目，大部分人仲要同自己性格差唔多⋯⋯

而我竟然可以搵到D同我一樣笑點低到爆既人，兩個人每次笑完都同對方講：下次唔好再同我坐埋一齊！每次見到你都會肚痛！

當然當中亦不乏一D我唔鍾意既人⋯⋯

成班得30個人，仲少過中小學個時⋯⋯不過我仲未記得曬D名，哈哈哈！！

班入面仲要有個係信義AL，開左學成兩個星期先知XDD

最最最估唔到既係，我竟然可以搵到兩三個可以講心事既朋友⋯⋯

感覺當然同以前中學既知己朋友唔同∼不過當身邊有三兩個值得自己信任既人，係一件好有安全感既事⋯⋯

組爸係岩岩開學既時候問我：有冇為自己訂下目標？

我發現我既目標唔係D咩要學D咩要點要點⋯⋯

只有一個好簡單既諗法，就係係大學呢5年，我要繼續做番我自己，開開心心咁過呢5年⋯⋯

我覺得，有D野一旦忘記左，一旦放棄左，永遠唔會搵得番⋯⋯就好似最簡單既自己⋯⋯

一旦忘記左自己當初一D諗法，放棄左最初最簡單既信念，就再也回不去⋯⋯