記近日工作二事之記一續篇
6 - 2 - 2007

記一（續）、
今日，忠叔經過我身邊，那時我正在搬細盒箱，自己一個人一口氣疊上第九層。
忠叔訝道︰「咦！細佬你大力左好多喎！係咪呢幾日抬野練出黎咁大力？」
「搬細盒我得呀，大盒我唔係幾得。」
「係咪大盒難度增加左？」
「大盒我唔多夠力，但搬細盒簡直係輕而易舉。」我邊說著，邊輕輕一拋不費力的把一盒箱拋上第九層。
「哈哈哈，輕而易舉呀？細佬你話『輕而易舉』呀？！」忠叔先是啞然失笑，然後一副啞口無言的咀臉。
「係呀！我搬九層根本唔使用力！」
「哈哈，你竟然話『輕而易舉』？！」「哈哈，『輕而易舉』？」「細佬你竟然話『輕而易舉』？！」

記近日工作二事（已去粗口）
5 - 2 - 2007

記一、
平日工作有時在早上需要搬大貨，一盒大貨重十數磅，每擺四個為之一層，每疊八層為之一板，平均每日要做十五板，共約四百八十盒，有時因為缺人而需要自己一人搬全部。
最近星期日，和同事呀輝合力已做了十多板，突然忠叔走過來對我說︰「吊，細佬，你冇力呀？」說著他使力搬起了一盒。
「我都做左十幾板大盒差啦，唔多咁啦。」
「吊，有d人搬足全日佢地點？」忠叔不屑道。
「盒都有分大細。」唔通佢地全日都搬大盒咩，用腦諗下啦亞伯；我搬細盒搬足一日都一樣唔會「支力」。
之後忠叔「指教」了一番搬貨的技巧後便離開了。
之後我同呀輝說︰「唔使幫我，呢一板我自己一個人做晒！」
跟著自己一個人搬，搬晒八層。
呀輝多番想幫手，都被我拒絕了。
「一個亞伯做到既野，我都做得到！」
「佢至搬一、兩盒梗係得啦！」呀輝道。
聞言後我哈哈笑了。

記二、
同日lunch後我沒甚麼事做，行過見到一班阿嬸女工在緩緩工作－－製造年糕需要使用的紙箱盒，她們一向出名慢和馬虎，經常都拖慢全線的工作進度。
於是我上前問有甚麼需要幫忙。
她們便叫我協力用膠紙封箱，並說我出名工作快。
我便加入幫手，和另外三位女工分開兩隊去封箱，我自己一個人一隊，工作效率卻竟比另一隊三個女工加上還要快，可見聘請她們是多麼浪費工廠資源的事。
很久，有位女工突然對其他女工說我︰「o靚仔佢霸住黎做，我地走啦，剩返個d畀晒佢做！」於是有三四個女工離開左去hea。
我意會緊佢番話，係度諗係咪自己做得太快啦，於是將工作速度減慢返好多。
不久，又有一名正在將封好的箱盒搬至板上的女工對我埋怨說︰「搬搬抬抬既野點可以要女工做嫁，要女工做埋男工d野……」
「男工人工比女工多。」
「哦，原來男工人工多d，唔怪得o靚仔咁勤力做野啦。」
媽的，一開始咪又係你叫我幫你封箱既，如果你要我做埋封箱加搬箱，你咪堂堂正正對我講lo，做咩係度單單打打姐？
呀姐，我一日人工都係比你地多廿蚊雞碎姐，但做既野比你地多好多！
話我勤力做野？係咪即係話我爭住博表現呀，正確黎講不如話你地唔撚做野啦知！
我答道︰「喂，阿姐，你地唔可以咁講喎，我地做野好辛苦喎，你地只負責某個單位既野，只需要識做個個單位既野，我地就要全部單位既野都要識做，咩都要做，你地做得慢，我地都要幫你跟返，你地做唔好，我地要幫你做埋！」
「如果你唔想搬箱，不如我黎搬，你去封箱lo！」我說。
我講完佢仲未應我，我就去左搬箱，兩三下手就搬完。
好心著雷劈，於是我搬完就走人唔留低，做返自己既本份就得，費撚事再理佢地。
後黎經過返個度，發現佢地竟然走晒去hea唔做野……

結衣自拍照。

晨跑（附圖）
26 - 1 - 2007

講左咁耐話要晨跑，但次次都因為天時同人和唔岩key而唔成行，直到今日終於兌現到個番說話。

琴晚十二點就訓左，比平日仲要早兩、三粒鐘上床。

今朝一大早五點五起左身，個陣個天都仲係黑「子貝」「子貝」，氣溫約莫十度。冇刷牙，冇洗面，拿拿淋換左條波褲，著多兩件風褸係睡衣上面同埋穿埋對娘爆既「白飯魚」，再整一整個頭髮就出門去。

一出樓下大堂既閘門，就痴左線咁係咁跑，跑左幾百米，到左隔離村既大空地度。沿途睇到有兩、三個晨運伯伯同埋晨運婆婆。

到左大空地度，喘左幾啖氣之後就立即去壓腳拉筋，然之後就熱身鬆下頸、鬆下腰、鬆下手、鬆下腳，之後就去踢腿，踢左一大輪之後又去返壓腳，最後係空地度跑左幾個小圈，搞左一大輪野就經已過左成半粒鐘。

之後，我離開左大空地，正式開始晨跑。

沿住大臭河條大路係咁跑，跑到天華路就停左係度行。寒冬跑步真係辛苦！

話時話，呢條大路我由中二就成日行，返學又行、返屋企又行、出街又行，都行左四、五年，但就未試過咁早天未光去行，今日都係第一次。

行到差唔多到天瑞個陣我又開始跑，跑到差唔多到樂湖又停低。突然好想行去新北江商場出面睇下佢開左門未，於是就快步行去新北江商場出面，去到見到先得OK同7仔營業，逗留左一陣之後我又去左樂湖輕鐵站睇鐘，噢，六點四啦，於是就決定回程啦。

跑呀跑呀跑，由樂湖一直跑返去差唔多到天華路個度，就冇氣啦，於是選擇慢慢行返去屋企，個陣太陽岩岩出黎，天開始明亮，晨運客同路人愈黎愈多。

過左陣見到附近有個樣貌算OK既中學學生妹都向住我屋企方向條路行，見無聊，於是一路望住佢一路緊跟住佢，兩者既距離差唔多可以觸手可及，不過佢步速一直都好快，我都唔客氣咁一樣急步行，後黎我仲爬頭超越埋佢。

之後差唔多到屋企，我轉返入大空地度拉筋，拉左一陣就返屋企，返到時六點十。

一開屋門，發現全家人都好愕然咁望住我，因為佢地以為我仲係房訓緊覺，哈哈。

－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－
提早一天
24 - 1 - 2007

中午，新公司的人事部小姐打來請我提早一日，即在一月二十七日第一天上班，我答應了。

－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－
見工成功（因死機未存檔而震怒但無奈要再打過卻懶得再費力費時間打的十分精簡版，比原本少了70%文字）
22 - 1 - 2007

賀見工成功，還順利轉為早班。

廿八日開工，朝八晚五有加班。

見完工之後，在大埔中心吃粥。

看見眼鏡舖，萌起配眼鏡念頭。