今晚鍾斯約左傑氏伉儷一齊入屯門食蟹, 方氏伉儷知道後又話想一齊, 收工後, 我同鍾斯就跟方生車一齊入屯門.....

我地6點幾已經係屯門市中心, 打比傑仔, 佢話係沙田轉車.....我地行住等, 七點幾再打比佢問佢地到左邊, 越講越唔對路, 隻low b大鄉理出城, 搭錯車去左天水圍, 哈哈哈....

等到成八點至齊人, 原來屯門麒麟街好多大排擋架, 我地去左間叫滋味館, 叫左炒蜆, 咸蛋黃炒糕蟹, 避風塘炒蝦, 炸蠔, o者o者雞煲, 金姑肥牛炒絲煲, 薑蔥炒田雞同埋蒜蓉油密菜, 唔知係唔係食海鮮既關係, 好似好多野, 但食完都唔係幾飽。 野食ok啦, 個蟹好香, 蜆個汁夠晒辣, 好味, 但個田雞同o者o者雞就唔係好得, 不過埋單好抵食, 每人八十。