今日係我小學既結校日，今日開放時間係1:30，所以我1:30已經返左去，
一入到去就見到雄哥(校工)，雄哥居然仲認得我喎。
之後入去禮堂睇下，見到D學弟綵排緊，彭sir(副校)做司儀，
之後我去同彭sir打招呼，彭sir都認得我，之後又見到何老師(前班主任)、
miss梁(前英文老師)、關校長，佢地都仲記得我，真係好開心！
跟住上去行下影下相咁，今日好多人，有歷屆既畢業生，有D年紀都好大。
行下行下終於撞到個識既同學，可惜我唔記得佢個名囉，
但係反而佢記得我個名喎！真係好意外！
之後落返地下，撞返幾個以前既風紀同事同埋幾個同學，
之後不停咁傾計，跟住江文靜黎左，佢比以前靚左，點解要講佢？
因為佢係我唯一一個試過出盡全力去對付既女仔。
不過，我以前真係太衝動啦，Sorry呀
跟住我地上左去電腦室涼冷氣，又交換MSN或日記。
跟住我坐多左陣有D悶，就落去睇下仲有冇D朋友到左，
果然我撞返郭麗、陳禮丹、黃小苗，吳華陽、鄧宇新、陳禮明、李銘信......
好多好多朋友，之後又傾下計問下點解咁少人，
跟住先知原來有幾個，因為一D特別原因黎唔到，一D找唔到，
所以冇咩人黎。
之後我地第四十二屆既一齊影相留念，跟住郭麗走左，
跟住我地成班去7仔買野飲，又傾下計，
跟住返入去，因為畢業及結校典禮要開始啦！
之後聽完國歌到唱校歌，之後所有人都一齊唱，仲好大聲天，
可能大家都知道今次係最後一次機會唱校歌啦，所以都好大聲咁唱，
以前都冇發現校歌有種感染力，好似教導我地以後應該點做咁！
之後到左典禮最尾，我地就走啦！其中有人提議去食飯，但係傾左一輪，
發現好多人都唔得閒，所以冇去到，
希望暑假我地第四十二屆畢業生可以同老師一齊出去食飯啦！
跟住同媽去左尖沙咀食日本野，之後返屋企食蛋糕慶祝生日！
今日開心多過唔開心，因為同D朋友傾計已經好開心。
雖然都有互串，但係......係善意既，冇攻擊性既，真係講笑架姐；
唔同中學既同學及朋友，佢地講野係有惡意，有刺既，具攻擊性既！
而且我同以前既朋友比較合拍D，我地可能一個眼神就得，
但係中學既朋友就好似冇咁熟咁，好假，
但係我同中學既朋友已經相處左4年；
但都唔夠同我相處左3年，分開左4年既朋友？
到底係咪我既問題呢？
聽日(7/7)我會更新呢篇日記，要加相。
學校正門
昔日捉棋既地方(棋手既戰場)，得到棋王既地方(小四)
第四十二屆畢業生及全體老師大合照
借棋(小四至小六)同攞風紀帶(小五)既地方
獎杯區(1)
獎杯區(2)
獎杯區(3)
禮堂後方
禮堂中間
細細間既小食部
校訓
籃球場(昔日我既另一個戰場)，經歷好多風風雨雨既地方(小四至小六)
走廊
昔日既班房(6C)
畢業營既相
年年都會跌椰子落黎既椰子樹
昔日我係康樂棋大使當值既地方(小六)
飲水機，風紀當值既地方(小五)
學校(1)
學校(2)
學校(3)
