琴日唔記得寫日記阿∼嗯，應該話琴日冇機會寫日記先岩•琴日下午好趕咁俾人叫左返大陸阿，大陸有少少事喎∼需要返去搞搞•成４點幾游完水就返屋企沖涼換衫，跟住趕去搭車去羅湖過關，原來返一次大陸車費好貴架，地鐵加火車加快線旅遊巴來回要成＄１９０蚊架 •不過今次返去好有得著阿∼星期六晚返去，星期日就要返黎香港啦=.="好攞命架•返到去已經成9點鐘啦~二舅父第一時間叫大排檔炒河同餸，跟住又買左5支珠江啤酒伴炒河•二舅父問我飲到幾多支，我同佢講5，6支啦~佢唔估我喎，話我仲飲得勁過佢 •跟住2個咪一邊食炒河一邊飲酒囉，食到深夜12點左右，終於我羸左阿!!我二舅父飲左2支左右就唔掂啦，我都係比佢飲多少少咋•不過我仲未醉得晒，我睇電視睇到1點幾先訓!可惜第二朝4點9就俾人嘈醒左，原來星期日係初一，個個鬼死咁早就拜神放炮將，想唔醒都幾難啦~

起左身冇幾耐，傻傻地睇電視•今朝有燒賣做早餐，同香港D燒賣好唔同架，好唔好食就見人見志•食完早餐我就叫我舅父教我車，佢帶我出公路教電單車，原來睇落去好易，其實都幾難下=.="不過我學左成個鐘都OK啦，唔載人都可以坐到既•學完電單車，我就拎細舅父架綿羊仔黎坐，我未學過架^^"•但係舅父話比電單車易好多，我一上車就識啦，講真架•因為綿羊仔同電單車差唔多，不過比較易，岩岩學完電單車，先再坐綿羊仔梗係一坐就識啦......我載埋我細佬兜左去街市同去碼頭兜兜風，返到大陸屋企，好唔開心阿，我俾人省呀......鬧我唔熟車又載埋細佬去咁多人既地方喎，算數!總算平安冇事返到•我突然間好想18歲後去考車牌，即刻買返架車黎坐下，阿媽話我係買做咩唔買4隻轆，反而買2隻轆•我同佢講冇錢，係咪你送架俾我先，佢即刻話我發夢，夢可成真呀~發多D唔錯架......好想快D返大陸再坐車阿~