今日其實冇咩做過，只係做過一樣嘢咋，就係申請調遷啦。
今日2:00左右去咗房署搞調遷嘅事，我一見到份form，我就頭痛啦，因為全份都係中文，但係我睇中文嘅程度係.....，所以我話我見到份form我就頭痛啦，有時我係到諗，我中五嗰年點考會考架，好彩中文嗰科都同我諗嘅一樣 ( F )，如果當時係攞高啲分嘅，我真係會懷疑當時批卷嘅人係咪盲架，哈哈！
另外一樣令到我頭痛嘅事就係冇人幫我湊女，等我可以出去返工，其實我一直都想亞媽幫我湊架，因為我只係信亞媽一個，其他人我唔係好信，因為見到亞媽湊詠琳湊到肥肥白白，又唔係好多病痛，咁樣我先專心做嘢。但係同亞媽講，佢做一口拒絕我，連我話比錢佢，佢都話唔肯。
咁我今日唯有同老豆講，叫老豆幫下口同亞媽講，點知老豆話唔理，叫我自己同亞媽，如果亞媽唔肯，就自己搵第二個幫你湊，但係.....，唉，咁即係叫我唔好返工，專心湊女，繼續坐監啦。但係如果我唔出去做嘢，只係得老公嗰份人工，跟本就唔夠開支，點算？有時，我係度諗亞媽洗唔洗咁絶情呀，幫下我手湊女，比番錢佢，咁佢有多個錢時我又可以專心返工幫補下屋企呀，都唔知點解佢唔肯架，唔通想睇住我死咩。真係比佢激死呀。
|
