今日我好開心呀！點解？因為今日我終於唔使坐監啦！

今日我同亞妹再同埋兩個寶貝去咗新北江行街買衫，雖然只係買到底衫，其他咩到唔到，而且只係行咗3個鐘，但我都覺得好開心。因為我可以出去透透氣，唔使再坐監。因為係屋企真係好悶架，只係對住四面牆同兩個女，邊到都唔去得，咩都唔做得，仲要湊佢哋，真係覺得好辛苦。

不過，辛苦我都覺得值得架，點解？因為當你見到佢哋做啲奇怪嘅動作，或且突然走埋嚟錫一啖嘅時候，你就會覺得辛苦都值得。因為佢哋知道你係真心錫佢哋，佢哋會做一啲嘢氹你開心當係回報，雖然只係錫一啖或且對住你笑一下，佢哋都係發自內心架。所以話呢，細路永遠都係天真冇邪架，佢哋諗到咩就做咩架啦，完全冇理由架。

我好多謝個天比咗兩個咁靚女，咁可愛同咁乖嘅女比我，等我可以做佢哋嘅媽咪，同埋可以比佢哋錫。更加可以比睇住佢哋成長，我宜家冇嘢望，只係望佢哋身體健康同快高長大咋。因為呢兩樣係有錢都買唔到架。

另外，今日同亞妹整個假嘅生日蛋糕，係等生日會用架，雖然係照住張相嚟整，但係我覺得一啲都唔靚嘅，而且啲眼耳口鼻都唔貼係餅底，成日跌，真係激死人呀。不過都好好玩呀，我哋都係用咗個半鐘左右就做起，不過真係唔靚，希望亞妹個校長唔好唔收貨啦。