今日我又請假啦，真係好唔舒服呀！

今日我叫老公佢請假湊番兩隻恐龍，點知佢話唔得，仲要話如果要佢請假就離婚，咁我咪將佢啲嘢拋晒出門口囉，點知佢好嬲咁望住我。跟住，亞媽、家姐同希雯上咗嚟，佢哋見到佢啲嘢係晒門口就問我仲咩，我咪照講囉，點知，有樣嘢我仲嬲呀，亞媽居然話所有嘢都係我錯，一入門口就係咁鬧我，我當時好嬲呀。係，我係有錯，但係佢都有錯呀，點解只係話我唔話佢呀，我聽到亞媽係咁話我，我好想問佢呀，點解只係識得話我唔話佢呀，宜家係邊個借錢唔還呀，我借人錢都會還呀，佢呢，識借唔識還呀，人哋追數嘅就只會打比我，同啲收數佬講，佢爭你哋錢你哋咪追佢囉，點解要搵我，啲收數佬就話搵到你老公就唔洗搵你啦。

有時我係度諗，我前世都唔知做錯啲咩，今世有啲咁嘅報應，嫁比佢咁耐冇安定日子過。我唔係大富大貴呀，我只係想過啲安定嘅日子，三餐溫包同有屋住咋，唔洗我每日擔驚受怕咋，咁都唔得。

今日，亞媽、家姐同希雯三個都有話我，但係唔知點解我覺得聽家姐同希雯講嘢，我會覺得舒服過聽亞媽講嘢，可能係佢哋經歷過我宜家嘅日子啦，同埋佢哋會聽吓我講嘢呀，等我可以講我嘅諗法呀。但係亞媽就唔係呀，有咩都只有佢講我講，我講咩佢都唔聽，又話係我錯。但係家姐同希雯就對事唔對人，係個賤人錯嘅佢哋都會講清楚係個賤人錯，係我錯嘅就會話係我錯，所以我覺得聽家姐同希雯講嘢嘅時候，我好舒服。

不過我都知亞媽佢都係錫我同關心我先會話我呢嘢錯嗰樣錯，只係用錯方法講咋。如果佢用家姐同希雯嘅方法同我講，我相信我會聽佢講嘢囉。