聽日我又要返工啦，今次係喺間零食舖入面都做會計文員，返朝9晚5，試用期3個月，雖然試用期入面只得$6500，但係我都心滿意足，因為起碼我有份工做住先，可以還到自己啲債先啦。

但係另一條問題就出現啦！就係亞媽話幫我湊埋呢幾日，下個月就要我搵託兒所湊女。但係啲託兒所最細都要6個月先放得入去，咁叫我邊到搵人湊都細b 6個月大呢，咁咪即係又係我自己湊番，咁我點樣還錢呢，我一諗到呢度，我就頭痛啦。

今晚，我問亞媽借2-300用嚟返工，佢都話冇，我當時冇嘢講，因為我都知佢嘅環境，但係我聽日點算呢，我冇錢點返工呢，今次真係大件事啦，真係問唔到人借啦，唔通叫我聽日唔好返工咩，咁難得搵到份工，我唔想為咗冇錢返工而唔返呀，咁樣好唔抵架，同埋唔值得添呀。唯有，銀包得番50蚊都用咗嚟返工先啦，最多食杯麵當lunch啦，咁樣我諗我可以捱到2日呱。宜家我係擔心呢個禮拜冇錢上師傅度咋，咁樣就慘啦，因為啲水最多飲都星期五咋，星期六就冇晒架啦，到時我都唔知點算呀，真係頭痛呀。

唉，唔諗咁多啦，船到橋頭自然直，都時先算啦。總之聽日返咗工先算啦。一定有辦法，一定可以過到呢關嘅，比啲信心自己，一定可以捱過嘅。

加油！加油！JOEY 加油呀！有好多人支持你架，千其唔好放棄呀。