經過上星期四既筆試後, 前幾日香鐵人事部打俾我, 話約小羊今日面試.

面試好順利, 不過奇怪在, 人事部叫我帶工作同學歷証明, 但係面試官試後冇問我拿, 我問佢地既點解時, 佢話到聘用既時候, 就會要求我出示, 同埋如果請既話會響兩星期內通知我

小羊諗起四年前響九鐵面試既時候, 甚至叫埋我去驗身. 驗身既醫生都認為, 驗得身黎都好大機會入職.  當時心情緊張, 因為果時份工冇得續約, 所以患得患失, 最後收到不被取錄. 成個人down晒, 之後幾次既申請都係唔得

天下烏鴉一樣黑, 不過我呢隻烏鴉係一隻唔識飛、唔識叫既烏鴉, 不過小羊要感激主主, 佢俾我呢隻烏鴉既肉質都尚算鮮甜, 我可以拆佢既肉同骨黎充饑, 接近三年既時間.  香鐵係一隻識飛識叫既烏鴉, 小羊當然要襯仲有D青春, 放馬去試啦~

小羊呢幾年既領會, 就係人、事、物, 要努力追求, 但係唔可以過份執著, 如果唔係, 就會好似用手大力拿沙咁, 越捉得緊, 越容易流走.

小羊等面試既時間, 浮起一段經文...

"若不是耶和華建造房屋，建造的人就枉然勞力；若不是耶和華看守城池，看守的人就枉然警醒。" (詩篇127章1節)

小羊雖然想做香鐵, 不過如果主主要阻止既話, 都會係為我好, 同埋就算唔係做香鐵, 主主已經供給小羊日用所需, 將來都會係一樣.

主主哦, 小羊想做香鐵, 不過, 如果你唔俾既話, 就阻止小羊, 俾既話就請你賜下, 小羊只係謀事, 定事在你!