為期十四日既車廠駕駛訓練已經完成... 進入七日既在職駕駛訓練... 小羊終於響22號用人手操作老鼠客車, 帶乘客 "進入老鼠樂園既奇妙世界"

當進入老鼠站, 我響駕駛室望出, 好多人凝神望著架車, 等上車既神情, 雖然佢地唔係望小羊, 但係小羊果一刻就好似明星咁, 小羊有種莫名其妙、興奮滿足既感覺!

好在小羊慢慢停車, 停正stop board, 成功開到車門.. 如果唔係就要行去車尾倒車, 咁就好麻煩lu

駕駛真車, 真係比起玩電車GO / BVEHK模擬器更快感... 當然小羊係抱著工作既心情去做~

尋晚就返通宵, 收車後行3.4公里既老鼠線, 同埋要人手搗東涌線既高速波口... 嘩... 好難搗... 之後響老鼠線掛水線棍...  全晚都係體力勞動...

收車前既兩個鐘因為唔夠人, 未做站務在職訓練都要出去月台度睇著D客... 尋晚係老鼠哈囉喂, 老鼠樂園收00:00... 好多、好多、好多、好多人, 仲有菲律賓人同我講話跌左銀包, 要勁CALL站長室... 好在有執到~ 客人好開心

就咁樣, 06:00收工, 小羊再響老鼠樂園跑左半個鐘後返屋企~ 空氣真好~ 響近郊地區返工, 真係會健康d, 人/羊都開心d~

睇到d客人高高興興地"上路", 高高興興地回家, 終於搵到工作既滿足感... 不過我現時要克服既, 就係唔穏定既返工時間...

工時比之前果份少左, 不過最早要05:30開工, 最遲01:30收工, 真係要早睡早起先得~

希望唔會咁樣影響到同獅子大王既相處時間啦!

聖經  以賽亞書 40章28-31節

你不知道嗎？你沒有聽過嗎？永在的神、耶和華、地極的創造主既不疲乏，也不困倦；他的知識無法測度。

疲乏的，他賜氣力，無力的，他加力量。

就是年輕人也會疲乏困倦，強壯的人也會全然跌倒。

但那些仰望耶和華的人，必重新得力；他們必像鷹一樣展翅上騰；他們奔跑，也不困倦，他們行走，也不疲乏。

......

Trying hard now
It's so hard now
Trying hard now

Getting strong now
Won't be long now
Getting strong now

Gonna fly now
Flying high now
Gonna fly, fly, fly... 

返左香鐵有五日喇... 新人梗會有 "蜜月期" - 訓練中.  將來小羊會調派到大嶼山及機場鐵路... 聽阿sir講而家東涌、欣澳同"食住黎"站唔夠人手, 一班共九個同事會分開一半... 另外亦有可能調去機場快線既站...

機場係最麻煩既站... 因為有好多野賣, 好多野要埋數, 就連將來既on-job training, 個師兄都唔係咁得閒去理D徒弟, 所以小羊有D怕怕... 不過正於阿sir所講 - 工作都係咁做, 最緊要係記住25號(出糧)果日~

以前小羊多搭巴士, 少搭香鐵; 以前果份"政府"NCSC工, 每個星期做49個鐘, 而家拿著職員pass, 加上一個星期平均做45個鐘... 開始感受到以前地鐵既口號 - 多點時間, 多點生活... 時間係金錢...

今晚18:45響九龍灣收工, 去銅鑼灣食飯, 之後去深水埗拿番部desktop PC既火牛, 20:50返到屋企後, 發覺又開唔到機... 冇得懶, 21:10局著成部機抬去深水埗俾砌機果間舖頭攪掂佢, 21:40返番屋企...

呢D咁濃縮既生活節奏, 係搭巴士既人做唔到既...

至於小羊既米飯班主... 小羊估香鐵下年好大機會會加價, 要難為佢地喇... 今日聽到香港既經濟放緩, 恐怕香鐵加價既話, 佢地既生活就會更加艱辛

"政府" 唔好再黎多招, "屈"香鐵"機"喇! 小羊同意前KCRC既都有學生優惠, 不過唔該佔七成股權既 "政府", 將香鐵既股息注入去補貼, 唔好屈香鐵自己諗計嘔錢出黎!

尋日晚上6點15分, 收到香鐵人事部打電話, 不過當時我仲同個鬼婆客講緊電話, 所以冇聽到.

6點半覆電話, 仲於大步欖過... confirm左真係係帶有地中海貧血隠性基因, 但係身體仍適合站務主任工作, 所以確認聘用, 香鐵再寄信俾我舊僱主做埋reference check就搞掂晒~ 感謝主主!

下星期就會去度身整制服... 唔知training會係點呢? 佢話唔會只係響九龍灣, 第一日響九龍灣report duty後, 就可能要去第二度上堂...  希望仲可以就到份刁民熱線趴貪工啦∼

今日問下人事部, 睇下我可唔可以補D錢俾香鐵, 拿番份驗身報告既copy, 咁我今年就唔駛再抽多次血去驗身喇...

今日臨收工, 係小羊為手下最後一次做評核報告... 佢會8月14日續約... 因為我都為自己倒數(費事煩~), 所以冇咁執著, 俾晒A咁滯, 不過都提番佢D小毛病要儘力改善, 因為佢下一次既報告就唔一定係小羊寫架啦.

最麻煩係... 小羊臨走前兩星期, 老世又話要調位~ D野又要左執右執..

雖然而家好似有香鐵份工舔住, 不過為以防萬一, 之前小羊申請過既政府公務員工, 如果有得筆試既話都會出席左先... 今日係見習航空交通管制主任筆試, 響葵盛既東華三院陳兆民中學應考...

10:45出門搭香鐵去到葵興, 因為間學校係響高處, 山上既, 所以差D行錯路, 好在搵到條上山既捷徑.

趁仲有十五分鐘, 所以周圍望望... 果度原來有間YMCA會所.... 小羊終於醒起... 15年前我去過果頭考中五會考, 之後響YMCA會所既餐廳午飯後, 下午再戰另一個科目... 因為今日考試考到下午4:00, 中間會有時間小休食飯... 所以走入去YMCA會所, 睇下間餐廳仲有冇開, 以聊小羊懷舊之情... 同埋最大原因係... NGO餐廳既售價唔會好似而家D餐廳收得咁貴, 況且葵盛東商場只係得一間銀虫茶餐廳, 唔會平好多,

不過一入到去, 好似唔係咁對路... 上三樓有野食? 細個冇記錯既話, 餐廳係響地下營業... 上到去三樓後, 發覺只係賣魚旦燒賣呢D小食... 睇黎間餐廳都係因為食品來貨貴, 做唔黎lu

入到試場... 仆街喇~ 冇帶擦字膠! 第一份卷有一條題目錯左, 攪到要好似細路仔咁用手指捽, 捽到張MC答題紙黑晒 呢樣都唔大鑊... 最大鑊係呢節係同時間考兩份卷, 第一份卷係MC, 第二份卷係要我帶定個耳筒, 當你做做下第一份卷時就會播帶截住, 做第二份卷既題目, D問題係響錄音帶度播,  聽漏就係咁先... 搞到小羊手忙腳亂...

最後第一節戰果係... 第一份卷MC有70題只係做左40幾題, 因為唔知道時間, 到停筆時冇時間撞晒未做既MC題... 第二份卷有一題係完全聽唔到.

今次小羊真係參加緊奧運 - 陪跑 

完左第一節後, 小羊諗緊好唔好下午慳番時間費鬼事考, 不過心裡有道意念 - "為左奧運精神" - 不在乎戰勝, 只在乎有否奮勇作戰, 所以好戇居地決定考埋下午果兩節.

食飯break只得半個鐘... 急急忙忙去葵盛東商場食飯兼買擦字膠... 好在地下果層有波仔飯~ $18一個粟米肉粒飯 (唔係荃灣銀虫果隻) 即食後, 同一層有文具店, 買埋擦字膠

下午果兩節係文字推理同數字推理... 文字推理做得晒但數字推理就臨尾撞左十題... 因為過鐘

算啦... 總算考過... 原果做呢份工唔簡單... 做卷就話一個雷達畫面5架飛機啫~ 現實我估起碼係試卷既10倍! 因為上兩個星期睇過人民電台既 "蚊窗閘"... 香港既空管要顧及澳門、深圳既空管, 一日有過千架飛機響度飛黎飛去, 個腦諗得慢D都會死人... 飛機唔係麻雀, 如果小羊第時玩到架飛機跌左落黎, 真係唔只冇左份工咁簡單, 直頭坐監都有份!

都係小羊細個唔好好努力操數學... 做左文科人既小羊, 計數點都唔夠人地快~