本來小羊已經沉溺於工作中, 為成家立室既目標奔馳, 都已經不問世事... 但係今次呢個 "政府" 搞出黎既副局長一職, 同埋相關報導, 小羊氣結, 不發表不可, 我有以下各點 -

1) 其中一個 "副局長", 由原先任職既私人工約3萬一個月, 升至現在15至16萬一個月, 試問一個響市場上逗3萬一個月既人, 點解政府會用16萬去請?  即使同一工種, 一個非公務員合約既職位既開價, 同私人市場所開既, 差額最多係五成, 果班 "副局長", 30都未夠, 出黎做得果三年幾, 究竟佢地何得何能收多過三倍既人工? 唔通佢地係神人? 識鍊金術?

2)"政府" 響選拔副局長既過程不透明, 即使而家公佈部份 "神人" 既人工, 已經太遲 - 就連政府請一個公務員或非公務員合約職位, 都會出廣告... "政府"已先斬後奏既方式發佈, 俾小羊既直覺係:點解果班 "神人" 唔駛經過政府遊戲規則洗禮, 就可以直升神台? 小羊覺得 "政府" 咁樣做法係完全違反政府既招聘程序, 比起聘請廣播處長一事更顯笨拙. 究竟中央人民政府, 知唔知道曾生已經拿著雞毛當令箭, 騎劫著特區政府 "非法執政"?  

3)回應番第1點, 其中一個保安局既 "神人" (其實唔只 "衪", oh sorry... 應該用 "牠們"至o岩, 只有主主先配得用呢個字) 竟然愚蠢到, 以為唔駛放棄外國國藉就可以做到, 呢D咁冇政治常識既人, 如果冇傳媒揭發既話, 香港既保安工作, 就會落入雙重效忠既"牠"手上. 試問呢D上位前連呢D簡單既政治常識都冇既"牠", 值16萬一個月嗎? 一張冥通銀行貨幣都不值!

如果呢個 "政府", 繼續違反規則, 有法不依既話, 小羊就唔可以繼續做沉默既小羊, 七一會出黎參加抗議示威

以下就係九年前既我, 響夜晚返part-time無聊時, 響某個telnet bbs既日本遊記... 九年後既今日, 竞然仲響精華區度冇俾管理員delete到, 真係要多謝佢... 我現在既感覺, 好似開左個九年前封埋既時間囊一般.

邊個係 櫻井真美? 佢係一個電視遊戲 "お嬢様特急"中既角色 - 怕生面口, 經常沉思, 不善辭令既女仔, 我玩過呢個電視遊戲, 曾中毒甚深, 幻想佢係女朋友既perfect type (哈.. 當時我真係好似今日既電車男咁~)

今日既獅子大王既性格... 係 櫻井真美 既正相反. 今日回想起黎, 我諗我係 櫻井真美 既男生版...

上兩個星期崇拜聽既道, 原來主主做男做女, 就係兩個性格都唔同先至可以互相吸引同補足既~ 多謝主主

但願兩年後, 我會帶著獅子大王去"羊丘展望台"望草地, 同埋去函館山頂睇夜景~

...引文開始...

標  題: 返左黎啦~~~~
發信站: xxxx (Wed Aug 18 20:02:05 1999), 轉信

哎...  仲未適應到時差添... ^_^;;;

今次除左上東京外, 仲去左北海道既札幌同埋函館.  不過因為行程太
緊密, 加上天氣不好,所以未能盡興 ;_;  所以要聽Sakurafan兄講,
要預多D時間遊北海道呀~~

響8月1日, 我搭komachi + hatsukari + hamanasu (夜行火車), 8月2日上午0630左右
抵達札幌.  我坐(訓?!)既hamanasu 係用叮噹海底列車[海峽號]既車卡編成既,
車身以籃色為背景, 有叮噹,大雄,靜宜... 動畫人物繪成, 車箱入面都貼上佢地
既肖像, 仲貼有 "叮噹50問" 既quiz game...  真係大開眼界!  不過因為始終
係舊車箱, 座椅間隔又窄+ ai得唔夠斜, 加上架車加/減速時車卡之間既震盪+碰撞,
bon bon聲攪到我果晚訓下醒下...幾惡頂 (Sakurafan兄, 你真係犀利!).

去到札幌既時候終於出事喇...  由到達一刻直至臨走前幾小時, 一直勁落大雨! ;_;
但係既然去到就當然盡玩啦..  第一站係上藻石山瞭望台睇札幌 "霧景" ;_; X_X (好天
既時候, 係可以睇到札幌市全景架 -_-;;;). 中午時候就去"羊丘展望台"睇下羊, 睇下個
銅像 (真係多得 PSX/SS 既 [o 孃樣特急]! 我係櫻井真美既超fans!! [離題tim ^_^;]).
入場費係500yen, 好在天氣開始轉晴, 可以望到好大既草原加札幌市景色, 值得一去!
[某旅行社出既自助旅遊書係冇題反既, 遲D話俾你聽點去]     之後仲響果度買左幾
盒 "白色戀人" 添 (不過買貴左...)

8月2日晚上8點到達函館, 好左民宿老闆娘提一提我去函館山睇夜景, 所以我趕上9
點最後一班巴士上山 (因為果幾日係函館節, 所以架巴士上有位女士為乘客介紹
沿途風景, 另外節日期間, 搭市電車去幾遠都只係收 200yen), 上到山後....
個夜景真係正到陣!!! 就好似將七彩既寶石散在黑布上... 我今次既北海道之旅總
算冇白費喇...

8月3日, 我去左五稜郭公園同埋隔離既瞭望塔.  五稜郭係德川幕府時代建成既西式
城郭.  最初係用作防禦外族用既 (唔係係唔係 ainu人呢?), 之後1868年大政奉還,
被幕府餘臣佔領, 以抵抗新政府軍.  因此五稜郭亦成為新政府軍同幕府軍最後既戰場.
之後就係明治維新既開始喇.  個公園裡面有個介紹五稜郭博物館, 外面有個暸望台,
可以睇到五稜郭全景 (好似六角星咁... 點解要叫做五稜郭既?? r^_^;; ).

最後就係十字街喇..  十字街再向山上行就用見到好多教堂, 充滿歐陸味.  函館係
德川 "鑽國政策" 時期對外(荷蘭人/中國人)開放既港口城市, 所以係西方文化既橋
頭堡.  去到果度就好似進入左 "細耳傾聽" 既世界咁.  如果唔留意教堂既日文標
記, 你仲以為自己唔響日本添呀... ^_^

差D唔記得左添...  8月3日朝早6點, 函館火車站附近有個早市, 佢地既燒帶子燒
海膽好美味架!!  絕對唔可以錯過!  我臨走時響附近餐廳食在過 "朝市丼"...
係用蟹籽, 海膽, 帆立貝拼成既飯, 再加一碗麵鼓湯... 只係1600yen, 真係色香
味perfect!!  如果得閒既話會scan個碗飯既樣俾你地睇!

北海道之旅就係咁多喇~~ ^_^

...引文完畢...

想起昨日既癲客大鬧office既事件, 加上香鐵貼海報請站務員一事, 令我再思考去留既問題.

作為面對客戶既機構, 遇著客人發難登門狂鬧既事情, 只要佢唔係拿把刀出黎斬人, 機構既職員都要同佢商量, 響機構能力範圍之內, 解決客人既問題...

有一個戶口, 因為地產代理提供錯誤既地址資料, 以致原有登記用戶既戶口close account, 其後, 原有登記戶口既家人打電話, 話因為戶口無端諯close左, 攪到同家人嘈交, "家變咁滯" (佢咁講就即管信啦), 要我地"公司"賠償. 我既partner不幸地接左呢個客既電話.

再講多D關於戶口既野, 因為我地既"客戶"眾多, 我地係冇可能逐個通知舊客人,話俾佢知有新人承接佢既戶口, 同時因為唔想新客既申請被拖延, 所以只要新客提供到正確地址, 我地就會即刻辦理. 我地亦要求打電話登記既人, 一定要係當事人先可以辦理.  不過現實係好多地產佬幫D客打電話黎我地度登記 (我諗接近40%既電話係佢地打黎), 而地產佬好多時都會俾錯資料, 以致原有登記人既戶口俾人承接而close左.

今次又係一件俾人擺上台既事件.

因為呢D係政策問題, 如果要投訴既話就要公關組處理. 事實上, 我地已經幫果個"受害"客人安排恢復戶口.  不過果個客人不罷休, 走左去我地度搵公關組, 更不幸既係, 個客俾reception攪到佢呆等左個幾鐘, 跟住可能係樓上既職員, 點左個partner相, 個客殺氣騰騰地捉著她大吵大鬧, 後來驚動到公關組走落黎同佢開會講數 - 當時係18:30.

果個partner就慘喇... 俾人拖埋入房一齊講數.. 到我19:00走時, 她仍然"被困".  其實中心經理已經比我地更早一步走左.

我以前做比較多call centre既工, 我而家好確信咁講, "公司"係想個call centre自生自滅.

第一 - 我地個centre門口, 一個"食蕉"都冇, 係一個冇掩雞籠, 以前響馬會或者電訊公司既centre做, 點都會有個"食蕉"看門口, 以防不速之客突襲, 我地個centre? 只要有個癲佬走入黎掟汽油彈既話, 咁全體職員就可以express咁去見父上帝.

第二 - 我地個centre係同其他既部門share同一個廁所 - 由我三年前入職果時, 個廁所仲污糟過我以前返大陸廠果時既工人廁, 地面濕滑唔在講, 仲要成日有條仆街, 攪到馬桶邊同廁板一片屎漬同異味, 而我"公司"樓上既洗手間, 因為淨係"公司"既人用, 清潔情況非常之好. 大家都係響總部工作, 但係我地call centre既員工就受到咁既待遇.

第三 - 我地前線既員工, 好多都唔係"公司"請既, 係"公司"經人力資源公司請既, 呢D員工既僱主, 根本就唔係"公司"既員工 (包括我既partner, 幸運既係我仲係"公司"既次等員工) . 試問我地呢D唯一為香港提供服務既"公司", 竟然唔value幫公司工作既人, 可想而知管理層有幾咁"重視"我地呢個centre?

第四 - 我地centre既經理都係署任(acting)既, 冇人坐正, 試問我地響"公司"既前途同發展會有幾多?

第五 - 個客戶服務系統成日慢機, 每五日一小冧, 隔月一大冧; 枱頭既電腦又慢又成日壞, 機都開唔到.

而家"公司"既同事一個又一個咁say goodbye, "請"番既人又唔係"公司"既正式員工, 工作環境越來越惡劣. 我諗呢個call centre都唔可以留耐...即使八月有得續約, 都唔再會有兩年續, 因為我可以肯定 - 管理層唔會再投放資源俾centre改善工作環境.

碰巧昨日搭香鐵放工, 見到佢貼海報會響今日搞招聘會 - 站務員... 雖然今日冇時間去, 不過都遞左信碰碰運氣啦.

雖然天下烏鴉一樣黑 - "公司" 同 香鐵 都會係定期合約制聘用, 不過我諗後者既褔利點都好過前者好多, 就算後者遇到癲客, 條氣都會gurr過你響 "公司".. 最起碼香鐵都可能會有花紅, 免費乘車同醫療保險嘛... 前者? 哈!

同埋, 響香鐵 (正確D黎講, 係前九鐵)打工, 係我四年前既願望.

希望我個partner唔會比我早走啦, 如果唔係, 我響"公司"既日子將會更加嚴峻...

今日小羊如常返工，衝著衝著．．．衝左入去香鐵站，趕上東涌線列車過大海．．．

停定後．．．發覺自己開始暈，眼晴唔能夠聚焦, 景物白曚曚一片，好光．．．勁出冷汗...維特左八分鐘．．就連給獅子大王既溫馨提示早晨短訊都冇力打．．．想暈低不過撐得住．．．我去到香港站時，就好似老人家咁，坐左三四分鐘先至回復正常...差D想按鐘叫香鐵職員送我去急症室．

後來我問番公司同事，佢話有三個可能:

1)血糖唔夠
2)高血壓
3)血壓低

小羊諗起尋晚返趴貪工既晚餐，係一個嘉頓小麥包，　之後返到屋企就飲左碗番著糖水．．．　原來果一個麥包只係得80卡路里，　再加埋碗糖水都係一共200卡路里左右，　可能真係今朝果下衝衝衝...衝到發作都唔出奇.

睇黎我似係第1種情況，至於第2種情況．．我三四個月前去診所量過血壓．．．正常喎. 不過, 睇黎今年小羊要抽時間去做年檢先得喇．．．　生命真係好 "化學"

小羊向小羊匯報desktop PC (煙頭 P4犀利王)的損傷情況....

部desktop自上次冇左個肥芒後, 冇開機接近一年... 所以開唔到機.

上星期問好友借到都瘦芒後, 提起心機要令部desktop起死回生...

經過上星期六一輪奮戰後, 雖然開到一陣, 但係好快又開唔到機, BIOS發左三下長響 (ram壞)? 就算再開到, load XP時都會load load下自動reset.  我諗可能都係D RAM壞左 (垃圾PQI品牌), 但係咁耐冇開過部機, 都可能係底版既問題... 有砌過機既人都知啦... 電腦唔著機可以係好多個原因.

諗住..哎..部desktop都已經用左四年幾, 係時候打柴啦... 今日去高登試下睇睇... 嘩... 條DDR 400 1G RAM成$300幾蚊咁貴, 仲貴過DDR2既 1G, 舊野仲貴過新野

所以走左去新翼既DELL睇睇, dual core 唔知行幾快既主機$3999, 另外某一檔既砌機 dual core E4500 $3350...

真係唔知點做好...

突然醒起隔離街坊, 成日砌機, 所以問佢借ram開機, 借左兩條GEIL牌子既RAM (應該唔係平野)...

插落部desktop, 一開.... 嘩!!  復活!!

但係點解響個BIOS POST畫面停左響度, 個小喇叭響度猛咁beep beep聲既?  後來要拔走個keyboard後, 就可以正常boot機~

咁樣, 小羊只要買條RAM, 另外買一個keyboard就可以再用番部desktop做BT~ 唔駛俾3000幾~

盛惠 $330 (1G DDR400 RAM + $30 (新KEYBOARD) ==> $360

...

我一諗起KEYBOARD, 就會諗起呢條 youtube片 - German Crazy Boy  請留意4:00後既片段!

最後...

小羊上個星期日響草原散步時, 見到...