講起返工，讀緊書嘅你可能覺得唔關事，返緊工嘅你可能已經知我想講咩

但係對於啱啱畢業嘅我，真係唔係好知職場係一個點樣嘅世界

小弟以前都返過工，但唔可以話係正式，所以一直以嚟嚴格哋說我唔可以話返過

第一份係圖書館的，負責執吓書、幫人借還書咁，識到唔少朋友

不過嗰時學校係透過香港輔導教師協會介紹我仲有幾個同學去的

可能佢哋目的只係為咗比參加者一個經驗，所以人工低得很，只係當車馬費

係而家最低工資嘅少一半有多(嗰時仲未落實最低工資)

所以都唔可以當係一個正正式式自己出去闖嘅工

而第二份係返帶位的，係一個朋友介紹我返

點解唔叫正正式式一份工呢，係因為出糧方法係現金

咁可以想像係細數目啦，加上要有Show先可以返，仲要唔係次次都會搵我

我仲記得當時係中六暑假開始做，中七中段要高考就冇做啦

雖然次次有得睇Show真係好好，但又唔係每場Show都可以咁Enjoy，因為有啲我都唔知咩Show嚟

至於你話學唔學到嘢?都有嘅，練吓英文掛、或者學吓點對付麻煩友

而家做埋只係想當一份休閒工咁，睇吓Show當係輕鬆吓，都算唔錯

兩份工都令我學到唔少嘢，但我都冇點當係工

因為相關經驗都唔可以當係下一份工嘅有力經驗

圖書館返得一個月多少少，帶位根本冇文件可以證明你返過

就連咩公司都唔知，當係外快賺一賺就算啦

而家畢咗業，Hea夠啦，搵到工啦，但未返

我就真真正正當呢份係正正式式嘅工

因為係自己搵，再加上係長的Part-time

又做開自己嗰行(電腦)，所以係自己一個出去闖

老闆望落都好好人，同事都冇咩嘢(但我未返，只係睇佢哋嘅樣)

希望嚟緊星期三會有一日好好嘅經驗

講到職場陷阱，好多人都驚我會蝕底

唔係自誇定咩，可能我性格斯文、外表單純

望落好易比人昆、比人恰...

其實我自己都有諗過呢個問題

但我都唔驚得咁多，唯有硬住頭皮上

然後自己醒目啲，唔好做錯嘢，聽教聽話

我相信我可以睇得出邊個係害我邊個係益我

但講到底，以上都係空口講白話，冇真正出過嚟闖又點知呢個係咩世界

雖然經驗不多，但始終都要自己學習，多啲聽人哋意見

仲要提防自己走入陷阱

職場上人品複雜，呢門學問可能比讀書更難

不過講到尾都係睇自己識唔識執生

有人可能覺得我洗唔洗咁煩搞咁多嘢

但我就係咁，事無大小都要事先準備

總好過到時唔知發生咩事

所以希望各位經驗豐富嘅高人可以贈小弟一啲職場上嘅貼士

好讓小弟好好學習~