趁今日有時間，又打吓Blog先，3個月啦，發生咗好多事，我又長大咗好多，學到好多嘢，都改變咗好多，見返我嘅人，已經唔係當時嘅我
好，我一開波就講愛情，2012年12月，對某個女仔開始展開追求，我一講呢啲就好敏感，又要講，又唔可以講咁多，又唔想比人哋抽水，又想比人睇，又唔想比人問，又唔想人哋介意，係，有時我都幾自私，有人已經叫我唔好成日喺Facebook講呢啲嘢，講完實比人圍，係，我就係咁賤格，攞苦嚟辛，冇法子，這就是我的性格。
有時，鍾意一個人，真係可以好瘋狂，不過，因為我嘅天真無知，自己根本連愛情都唔知係咩，混混亂亂咁開始咗一段空白的戀情(嚴格嚟講其實根本冇開始過，所以…我仲未出Pool)，老實講，鍾意一個人真係可以冇原因，唔知點解，有時你只係朝住一個方向，但係完全冇咩目標，見路就行，結果，就會令到自己陷入一個無盡嘅深谷，簡單嚟講，就係唔知點解可以咁為個女仔
呢段明知係冇好結果嘅戀情，我就偏偏要夾硬開始，結果開始急結束快，雖然呢個係我一早預咗嘅結果，但我從來都冇後悔過，我呢啲廢男人係心甘命底比女人食住
好多情侶，都係由好朋友開始發展，我都唔例外，我知道呢次唔係一次嘅失敗，而係一次經驗累積，由陌生人到良朋知己，我哋互相交換咗好多自己嘅祕密(言語上)，一啲女仔有男仔從來都唔會有嘅嘢，一啲男仔有女仔從來都唔會有嘅嘢，亦都試過甜蜜過、認真過，投入一段感情須要好多精神，我亦曾經為佢嘅反覆決擇而差啲令自己崩潰，有一齊笑過、嘈交過，分享過，如果講付出，物質的我比到唔多(只有金錢，情唔情願都好)，但精神上，我付出了不少(可能佢唔覺)
不過，感情邊有對錯，不合就自然分，老實講，佢話我冇諗清楚就同佢一齊，佢講得冇錯(自我矛盾)，事實上，我同佢對拍拖嘅睇法根本完全唔同，就算大家喺其他方面幾咁一樣，都係無補於事，我曾經想佢改變諗法，但佢一定唔會為咗我而改變自己，佢亦都冇責任去改變，同佢做朋友係一個最好嘅選擇，冇承諾、表露真我、冇心理戰，不知幾好
女仔對一個小小嘅承諾都覺得好重要，呢點係好多女仔嘅擇偶條件，所以喺應承一件事之前，一定唔可以隨便亂答，事後又冇件事，佢，對我嚟講，教識咗我好多嘢，可以話係我愛情教師，而呢啲嘢，一直以嚟都冇人教過我，係要自己領略，男女相處，原來係一種好複雜嘅學問，要做好每一個細節，經驗少啲隨時都會死，所以我有時都好明白，點解啲人成日話單身幾好
換句話講，其實佢覺得男仔應該咁樣，而我半認同但又附和了，你話我係咪賤格? 點都好啦，我已經從佢身上學到好多嘢，我知道咩叫真正嘅愛情，亦都知道邊類女仔先適合我，邊類果仔先適合你，講咗你咁多，希望你唔介意，純粹感情抒發，咩都冇…之前纏擾住你咁耐，好對唔住
總括嚟講，呢段咁嘅非正式戀情，可以用「亂衝亂撞」嚟形容，重要嘅係過程，同埋對我嘅影響，所以，「希望快啲搵到個女朋友啦XD」
好，完咗愛情，講其他嘢啦，話說今個sem break去咗台灣，其實，我第一次去旅行，因為我屋企根本唔會去旅行，所以亦都為咗坐飛機而緊張，但最後發覺都冇咩嘢，只係起飛同落地嗰吓好似坐過山車咁，不過耳仔就痛到核爆，仲有空姐好靚女XD(我又發姣)
講返台灣，今次同朋友四人行去台北，見識咗好多，可能同香港有對比，台灣人nice好多，好有禮貌，好識搞氣氛，台妹好索好可愛，台灣人一知道我哋係香港人，都變到好熱情，最緊要啲嘢真心好食，所以我哋今次嘅主題都係食，去到某啲地方，就自然會諗:「呢度就等於香港嘅旺角啦!......呢度就等於香港嘅郊區」，其實，我都有啲想喺台灣度住，不過有啲唔係好like，就係啲車明知行人係綠燈都照駛到好埋，但司機見我哋行緊馬路，又停低咗比我哋行，有時都唔知過唔過好，可能係比我哋行先，但司機照駛入嚟又要撞唔到你咁樣，都唔知想點，不過去到市中心就冇呢啲嘢發生，希望嚟緊可以有錢繼續去其他地方
另外，近排亦開始注重儀容了，轉髮型、做Facial、遲吓可能電+染髮添，不過真係要多謝朋友嘅介紹，冇佢哋，我都唔知從何入手，所以成日都話，識人好重要，自從讀咗AD後，我識嘅人都倍增了，人面廣咗，可以係好事，可以係壞事，因為有啲人你根本唔想面對，但又偏偏要出現，所以，要識得點樣面對唔同嘅人，唔同人就有唔同嘅「處理」手法，言談態度都可以好極端，真正表現到真我嘅時候，只有對住自己真正嘅朋友，所以，人有假面具都好正常，最緊要知道自己做緊咩，對得住自己、對得住天地良心就夠啦，呢啲嘢，亦都應用到我而家返Part Time嘅地方
做咗呢份Part Time，我更愛拍片，雖然有時要求太高，但人總要有挑戰先有進步，最緊要都係經驗。第一次為同事求婚而拍片，真係太好啦。仲有今年School Gala終於完了，氣氛好好，期望20周年!
無論如何，人總要向前望，過去只能反思，未來可以期望，以上嘅改變，可能只係一個小小嘅開始，去到人生嘅五分之一，仲有五分之四係未知數，打Blog就正好令我反思、期望，所以，我會繼續Keep住打的(如果我有時間)，下次再講!
|
