對上次打Blog，應該係3月，又一個好耐冇打啦，又係有好多嘢想講想分享，唔知講邊樣先

算啦，都係講返學校先，好辛苦終於嚟到Sem Break，今個Sem尚算ok，唔會話太多workload，又識到唔少人，更好嘅就係更加熟之前識嘅人。不過自己可能習慣咗咁夜瞓，搞到次次朝早都係得個殼咁樣去返學，跟住上堂又瞓吓咁，真係有啲似係返學等放學嘅feel，不過今個sem有返自己嘅專科，加上都冇遇到咩自由騎士，所以感覺唔太辛苦，好好彩，相比上個sem，真係唔明點解上個sem啲科咁x，算啦，考完個試，希望GPA繼續過3

朋友呢，中學嗰幾個繼續keep住都喺度，不過有啲以前熟，而家都冇咩點聯絡了，反而就識咗新的朋友s，我好相信，AD識嘅一班知己真係會一世，邊個唔開名啦，自己知就夠啦。不過呢，有個人成日都要我喺大圍站等佢，點解佢隻腳唔生長啲，邊個唔開名啦，哈哈，講吓咋，有個就PE堂一開始問人拎Whatsapp，心諗你都幾進取，不過識落唔係壞人嚟嘅，有個就個樣成日都傻吓傻吓咁，出街真係驚佢比人拐走，但原來佢內心係好識諗，只不過個個都以為佢傻，其實佢就係思想最複雜嗰個，有個就成日都同身邊人分享政事，雖然有啲真係冇興趣，但自己總算多一門學問，不如你去參選區議員啦，有個就晚晚引我去打機，跟住又話我玩得多過佢，點知原來佢仲玩得多過我。

仲有好多好多，要講有排講，雖然同剩低嗰啲可能冇咁熟，但我都冇忘記你哋有啲係幾好人、有啲幾kai、有啲幾勤力，例如英文科嗰班，本身覺得遇到killer會上得好辛苦，點知上落又唔係，可能係miss性格問題啦，上堂又唔係話特別chur，反而有啲悶，不過每逢到點名環節，唔知我地組人嘅名定miss嘅語氣奇怪，我嗰組有人聽到miss嗌我地組人嘅名後就喺度喪笑，I repeat…係喪笑，笑到成個巫婆咁，跟住佢笑到咁搞笑，成組人又跟住咁high high咁笑，點解你可以笑到咁，哈哈哈哈哈哈哈哈哈哈哈哈哈哈哈…仲有個presentation呀，搞咗咁多嘢，又DJ又咩咁，最後啲同學都係…冇反應，仲有邊個有次入錯課室，然後比我哋組恥笑一世，仲有次唔知上堂玩咩遊戲，miss一嘢禁落我頭殼頂，先發現原來我jel咗頭，成班即刻笑到傻唒，仲有次傾project，無聊得濟拎我部macbook嚟影埋啲好好笑嘅變形相，諗返都好笑，希望我哋下年會同一班，不過應該冇可能。

講完朋友啦，講咩好呢，我諗大家都知。自從上次之後，就一直都冇再咩過啦，因為實在……..冇信心，身邊人成日叫我加油加油啦，但…邊有咁易= =

你話有冇target? 有就有嫁啦，但我可以點? 情況就咁，當你鎖定一個目標嘅時候，你就會開始展開追求，傾電話、約出街，就指定動作啦，如果成功了，就會開始一段超越友情但又未到愛情的階段，但當你認為你自己係慢慢培養感情嘅時候，以為會慢慢得手，點知…突然某一日佢就同你講佢有拖拍，真係無話可說，可能我一開始就輸在起跑線上，咁我為免破壞人哋幸福，咁咪唯有放棄囉，好啦，咁算啦，冇呢個姐，咁我咪又慢慢回復情緒，搵過個囉，我啲朋友都係咁勸我嫁啦，好啦，又咁好比我搵到啦，用返同一套嘢，結果點? 又係咁，起跑線都輸，呢個世界真係充滿無奈。所以話呢，愛情呢家嘢我真係唔識玩，眼見自己個個Target都有了男友，情況就好似爬緊山突然跌咗落山咁，不過好彩，最後都冇表白，最後做返朋友，不過可能打咗呢篇嘢之後，佢地會知咩事啦，但算啦，都過咗去，佢地唔會介意，加上冇咩感覺。

成日都聽到啲人話，你係好男仔嚟，你加油，你真心係好人，但可能對方覺得我係冇可能呢大佬，所以就諗都冇諗過跟我一齊，有時都唔係好明，又或者可能我諗多咗啦，但我知道嘅就係，我喺愛情嘅道路上係無比嘅黑暗同難行，唔知大家信唔信啦，但我可以講嘅嘢就係得咁多。

呢個sem仲有好多嘢發生咗，不過有啲冇咩影響性所以都唔講了，不過都係感激所有喺我呢段時候遇到嘅人同事，有啲真係影響好深，下次再打Blog，可能係下個Sem break!