今晚本人有兩大主題要講，首先係講吓返工情況先啦

返工返咗5日，都大概知道店舖嘅運作情況

不過真係仲有好多嘢要學，電腦影音世界都唔係一件簡單嘅事情，其實內裡嘅知識都係日積月累而成嘅

不過都係唔講呢啲住，講吓我老闆同埋我嘅同事先啦

話說成間嘢得2個同事1個老闆，所以最多人嘅時候都係得3個

我嘅同事已經做咗6年呢行啦，佢應該都係25-30歲的成年人，其實外表都幾young

而老闆應該係27-35歲掛，老實人一個，但都帶點威嚴，相信呢位資深同事應該同老闆好熟

不過，我返咗一個星期都冇，就已經有種會比人炒嘅感覺

話說我去填表Apply呢份Part-time嘅時候，我見到店內同時有3個人喺度，有個一定係同事

但到我返工嗰日，個同事唔見咗

咁我都冇咁多事去問啦

點知我返咗幾日，嗰個同事就嚟咗間嘢拎一張支票

當時佢對住資深同事問咗一句:「其實我衰啲咩，你知唔知?」(當時老闆唔在場)

資深同事就答:「唔知呀唔知呀，呢啲嘢老闆決定...Keep Contact啦!」

事後我問返資深同事，先知道嗰位人兄原來只係做咗兩個星期，就比人炒咗

佢同樣答我唔知咩事(不過佢應該唔講比我知)

跟住我自己就喺度諗: 死啦，唔知我會唔會又係咁無啦啦比人炒呢?

但見老闆又唔係咩橫不講理嘅人，真係唔知咩事啦

其實我每日嘅工作ok簡單，可能因為我係啱啱入職+Part-time啦，老闆都唔敢比太多嘢我做

因為間舖不時都播住流行曲，所以我一邊聽歌一邊巡舖(因為佢仲未敢叫我Sell嘢)

我而家只係負責幫人重裝Windows，裝返啲軟件呀咁樣

今日就學整機同砌機，真係好多嘢學，但好開心識砌機

間唔中都要出去地鐵站幫客人交收，或者幫同事買嘢食

其實都會有客走埋嚟問我嘢，但我大部份都係答唔到，要Pass比同事搞

因為我根本就未記唒啲貨擺喺邊同仲有冇存貨

所以真係仲有好多好多嘢要學

不過返返吓，有時真係唔想返

第一，悶，有時真係會冇嘢做，因為好多都未學，老闆都唔敢比我試

第二，得我自己一個做，我相信我啲Friends都冇興趣搞有關電腦影音嘅嘢，加上返工又唔可以用電話

第三，佢哋好似好多嘢都唔講我知，可能因為我啱啱入去嘅關係，佢哋都唔敢講太多嘢比我知

不過為咗賺錢，我都會做埋落去嫁啦，可能之後有轉機啦，應該有嘅

講完返工，下一個主題其實都同我返工有少少關係嘅

事關我身邊人愈來愈多都拍拖

有時喺街上見到人哋一雙一對，自不然都想快啲搵返個

可能單身嘅人會好明白呢種感覺，自己一個嘅時候會覺得自己格外孤單

心諗如果有返個伴侶就好啦

加上本人已經19歲仔啦，都就嚟二字頭

唔而家拍拖等到幾時?

記得之前唔知喺邊度睇過，話而家好多人搵中介公司識男/女仔

而且投身資訊科技界人士嘅求助更加係第一

唔係掛，我想轉行，我唔想搵埋呢啲乜乜公司，我想順其自然

不過求助嘅通常都性格內向、冇信心嘅人

自問自己有少少係呢種人，但回望自己嘅求愛經歷，其實又唔係咩都唔敢、咩都驚嘅人

我都有試過追過人啦，而且數目唔少，唔明點解會搵唔到...(歡迎任何踐踏)

唉，我而家仲要做呢行...我真係要為自己嘅感情生活好好計劃一吓

話雖好此，其實自己都唔知從何入手

只可以用命苦嚟形容，你估我真係想嫁咩，唉!

有好多人成日都話:「你一定得嫁，實搵到女朋友!」，又話:「你放膽啲就得!」

講真，呢啲我鬼唔知咩，我有放嫁，係冇人接受姐，唉

唔通呢啲嘢真係命中注定?

莫講話搵一個真心人，我連比人接受嘅機會都冇，點算?

要感動一個人，首先要人哋欣賞你，呢個我知

但係...人哋可以欣賞我乜嘢?

唉唉唉，Dry爆灰爆... 

最後啦，15號就係Grad Din，雖然冇中五嗰次咁大感覺，但我都會以一個輕鬆心情去出席

仲有呀，唔知大家Hea/返工之後仲記唔記得，其實我都唔係嚇大家，只係想大家有個心理準備，希望大家仲會記得6月29號係咩日子，望返日曆，其實唔係好耐就到...