聽過幾位朋友都推介周杰倫呢套新戲, 一直都未有興趣去睇,
但今日山長水遠去到戲院(其實吾係好遠...),又見無咩戲好睇. 於是... 就睇下啦。
一堆散修修既感覺如下:
1. 套戲好"大周杰倫"主義, 基本上就係硬銷周杰倫有幾nice, 有幾型, 彈琴有幾叻, 甚至乎身手有幾好。
雖然我都要講句, 佢同南拳媽媽既宇豪鬥琴果幕, 係幾好睇。但之後佢又再用雙手彈兩部琴, 就好膩喇。
2. 唔知呢, 我覺得有d位都幾崇洋。
3. 之前一睇trailer, 已經有估... 一係有人死, 一係就係鬼片。原來真係, 係類似 "觸不到的戀人"。
但我好欣賞電影中段做到好似鬼片咁, 我第一下係笑左出黎 "唔係下話! 咁爛?!"
之後周杰倫去搵桂綸美個阿媽果幕, 我真係有驚到合埋眼唔敢睇。我怕女角會以女鬼既造型突然撲出黎。
當然, 後來發展唔係真係鬼故, 放心。
4. 唔係個桂綸美做得唔好, 只係我好憎佢個角色。一開頭又姣, 去到後段又勁悲情。喊喊喊, 喊乜鬼呀喊!
我都未feel到你用情, 你就去悲情。係個角色有問題, 定係而家好多女仔真係咁?
之後仲攪到人人以為自己精神病, 乜野衰事都發生晒係自己身上, 真係造戲先有咁既情況。
5. 有好多位d觀眾都笑晒, 但我原全唔明有乜好笑
6. 臨尾果場, 周生要打爆玻璃, 但佢又唔係要開鎖, 佢打爆玻璃之後, 就推起個窗入去教學大樓。
咁點解要爆玻璃?
7. 如果套戲係一個MV, 會係一個好好睇既MV。
8. 及後有朋友同我講, 秘密本身就不能說, 唔通有秘密係能說既咩? 所以原來個電影名都有d弔詭。
|
