今日個腦唸番起好多童年係大陸生活既回憶，細個好鐘意一早起身就痴住嫲嫲，要跟佢去街市買餸，唔知點解好鐘意去街市，又污糟又多人又嘈，可能只係想痴住嫲嫲🤭 以前夏天幾熱都好，記憶中都係無冷氣，但係點都無而架既夏天咁熱咁焗，好鐘意痴住嫲嫲訓覺，嫲嫲煮既米粉都特別好食，仲有嫲嫲整既腸粉豉油，而架已經食唔番果種味道😭 細時夜晚食飽飯，阿媽有時會帶我地幾個去大廣場放風箏，經過既地方仲有一條橋，我好鐘意爬到最高吹風，真係唔驚跌死咁，而架人大左就無咁既膽量啦。有時嫲嫲會幫我搬單車落樓下公園玩，唸番起我都真係任性，住7樓仲要辛苦嫲嫲咁大年紀幫我搬落樓😢 嫲嫲真係好錫我，成日偷偷燉湯比我飲，阿媽打我時又會保護我，其實住係大陸我真係過得好開心，至少我回憶中都係美好既。放暑假時大姑同表姐又會來搵我地玩，帶我地出街買好多好野比我地食，我扭買玩具又會買，有時仲會係佢地屋企訓幾晚，爹爹又會教我畫山景畫，又有雞可以玩，唸番起都好懷念以前，而架活得好辛苦，好唔開心，成日都好想番去以前，想同番你地一齊生活，係味人愈老就會成日唸以前呢🤔 好後悔無同嫲嫲合照多啲，搵來搵去得一兩張相，但係你就將我張BB相當係寶😭 真係好掛住你😭 希望你在天國過得好好🙏🏻

I LOVE YOU FOREVER ❤ 我親愛的嫲嫲