又到星期五喇, 亦都意味住一個星期既過去。呢個星期開始要返 IEd 上堂, 因為係放工之後上既夜課，所以攪到個人攰上加攰, 而家真係好想有一張大床比我長眠一下。唔知點解呢, 搬左去新屋之後, 個人比以前容易攰, 做咩都唔係太起勁咁。

老婆o係尋日去左醫院做檢查, 佢好開心咁打電話俾我話佢聽到 BB 既心跳聲。佢話原來 BB 既心跳跳得比我地快, 醫生話係正常既, 但佢又話擔心喎，唉 ... 正一傻婆黎既。BB 越來越大, 老婆佢就越來越緊張同埋興奮, 其實都係好事黎既。 只係有時見佢就黎做人媽咪但係都仲係咁細路女就會有 D 擔心。擔心既唔係佢照顧唔到出世之後既 BB，亦都唔係佢唔錫 BB, 呢 D 野我對佢好有信心既, 擔心既反而係我自己有無咁多既精力去照顧同揍呢兩個「小朋友」呢？怕我會應付唔黎。

尋晚屋企度又為左 D 小事而有爭執。其實做得一家人唔係應該開開心心既咩?有咩事都好, 解決左去就算喇, 下下要開片, 我覺得好無謂囉。再加上好多時發生既野都唔關我事但我次次都要做禍心, 唉 ... 好難做。真係唔明點解唔可以好似人地咁好好地去傾, 一齊去解決個問題, 咁唔係會好 D 咩? 周旋o係 D 問題度, 好咩?