今日想講下朋友。

唔知「朋友」兩個字，會令大家諗起邊個呢？

一班成日都一齊玩嘅人？

一啲傾得埋嘅人？

抑或係咩都唔講就知你諗乜，咩都了解你嘅知己？

點都好，就算好似我呢種咁內向嘅人，只要有與人接觸嘅機會，

到今日相信都會有至少一個好了解你，好鍾意同你講野，甚至可以煲電話粥煲成個幾鐘頭嘅知己，

俗稱死黨。

同你地分享我兩個死黨啦：一個叫詹朗軒（花名詹叔），一個叫何明翰。

我由小二就開始識佢地兩個，佢地好有義氣，無論乜野事都會話俾大家知，

有咩開心唔開心呀、想讀咩科呀、鍾意玩乜game、食咩野玩咩野、被老師罰咩、甚至暗戀邊個都會同人講，無所不談。

可能你會話，呢d關係未必可以好長久，將來甚至會變到好陌生。

係，我承認升上中學後，我地關係有翻天覆地嘅改變，但係佢地兩個嘅改變，係完全相反。

我同佢地兩個唔同，我升上沙循，而佢地兩個就上左沙官中。

原本我以為佢地兩個會逐漸對我陌生，因此曾一度失望。

但係，依幾年詹叔一路都係我嘅知己，會陪我去睇電影、睇書展（放心，唔係gay佬），甚至由原本乜都講進展成為對方著想，提供建議嘅幫手。

何明翰？唔好提喇，嫌疑我地兩個之餘，自己仲做埋打手，可以話係欺騙嘅一種。

好啦，講咁多我想講乜呢？

其實好簡單：我想講，友誼同距離唔一定成反比，甚至可能係正比。

回應返小張張「驗鈔」嘅比喻，我又冇當過何明翰係「假鈔」嘅，頂多只係跌過落水，有啲皺嘅真鈔罷了。

我至少還存有信心，就算佢去到天涯海角，我仍相信同佢一齊玩嘅片段可以重現，將呢張人民幣攤返平。