(而家係上午2時18分,好夜= =)

啱啱喺葵芳陪老豆睇完"引力邊緣",套戲主要講一個女博士同幾個隊員上左地球上空執行任務嗰時，發生意外導致得返女博士一個生環，然後講佢一個人點樣返地球嘅故事。由於係外太空，成套氣氛都好寂靜，但係嗰種緊張卻係勝過成日睇到嗰啲，好嘈嘅電影。

依份寂靜、絶望嘅心態，其實都會令我諗起日常生活嘅各種片段，比如係同朋友嘈交唔知點收科、考試前一日仲對住本書發呆等等。

然而，個女博士雖然係外太空面對眾多嘅極端情況，包括太空艙著火、係太空漂浮仲缺氧、冇哂能源等等，甚至佢仲諗過放棄，但係由佢幻想一個男隊員返黎，鼓勵佢嘅片段睇得出，女博士仍然有生存落去嘅堅持，最後終於成功返落地球。

睇完之後，我當然知道套戲想我地做野唔好放棄，堅持落去。但我體會得更加深嘅，反而係「以樂觀嘅心面對絕境」 嘅道理。喺太空艙嘅女博士的確試過驚到痴線，但不久之後，佢嘗試講之前男隊員成日講嘅故事比自己聽，更顯露笑容出來，效果唔錯。我相信最後成功嘅原因，背後除左無比嘅毅力、逆境能力外，重要嘅係佢有依種心境。反觀依家啲人，只係因為一時嘅學業、人際等生活問題就走去自殺，又何必呢？世上明明仲有好多野值得留戀！而且相比起女博士嘅命運，佢地仲有資格話自己係面對緊「世界末日」咩？頂多只能話係一啲絆腳石。

冇睇過嘅可能對e篇文一頭霧水，總之，我推薦你地睇e套，亦都希望社會真係可以做到「以樂觀嘅心面對絕境」。

P.S. 套野拍得好真，好想知點拍@@