過去既個幾月都無update個blog....
我唔係o係屋企實戰cooking mama, 就係o係醫院出出入入~~
先係嫲嫲2月尾入醫做左個小手術~~割盲腸~
(乜割盲腸要開3刀既咩??嫲嫲個肚有3個傷口~奇怪的...)
嫲嫲住左院3,4日就出得院啦~~因佢要休養, 我就負起買餸煮飯呢個責任~
越煮就越來越愛上廚房既個聖地~~閒時又整下蛋糕, 麵包~~
(遲下有心情再post返之前煮過, 整過既野食上黎~)
原本一路過住幸福快樂既實習主婦生活~~
點知...3月初, hoho舊患復發~椎間盤移位~腰骨痛到佢...見到佢, 我個心都痛埋...
坐又坐唔到, 企又唔係, 訓又唔係~都唔知佢有冇好好咁訓過一覺~只見佢不停咁食止痛藥~~
有朝我仲驚見佢食晒成包止痛藥~(前一晚仲見到4-5粒), 佢一次過食晒咁多粒~><
但係...佢依然話好痛...d藥已經畀佢食到醇左啦~~
我呢...見到佢痛苦既表情而又咩都幫佢唔到, 亦喊過好多次~~
其後同佢去過睇跌打, 睇中醫, 做針炙....但都係無效~

之後...先後3次同佢出入醫院...
第一次walk-in去威爾斯~~等左3-4個鐘, 佢就捱痛捱足3-4個鐘先有一支止痛針佢打~
打完之後就畀d止痛藥佢, 打發佢走~
第二次call白車入去Q醫~~又係等3-4個鐘先有一支止痛針~
之後要佢去照x-ray...以為會畀佢留院啦~點知同佢電療左幾下就打發佢走~
第三次call白車去威爾斯~~由於佢既record o係威爾斯...所以諗住今次call白車應該會畀佢留院~
又係等啦~~今次唔知係咪因為call白車訓床入黎既原因~等左2個幾鍾就見到醫生啦~
好好笑囉...個醫生話...."咦~~你早幾日黎睇過架啦喎~"
ho: 係呀
醫生: 咁你今次想點丫?
ho: 食藥都無用, 想入院再check下~
我心諗...你唔係又想畀d藥佢又打發佢走呀??
而且你係醫生喎~你都見佢出出入入左幾次啦~係咪應該由你決定要佢去留院呢??

題外話:
真係唔明點解分流站既醫生姑娘唔同佢打左止痛針先~係要人捱痛捱幾個鐘先幫人打~~
如果唔係真係咁痛呀, 洗鬼入黎急症室咩~如果頂唔住痛到死左, 係咪醫院負責先???
都唔知呢d係咩鬼野政策黎~~
同埋, 好心d普通傷風感冒既人(老人家同bb另計)就咪鬼貪小便宜去急症室睇病啦~出面咁多診所唔睇~
係要o係到同d真正有需要既人爭~~!!!

就係咁...hoho就住左9日醫院啦~~我每日既節目就係去醫院探佢~
又畀左$2700去照多次磁力共振~(要free既話要排期一年~~痴線架~等一年都唔知發生咩事lu~)
其實平左啦...2年前照要$4000~當時又係話要排期一年, 先會自己畀$照~
佢呢個症早左2年前已經發現~但當時醫生話佢仲後生, 做手術有一定既風險~
因為開刀位太接近神經線, 建議佢唔好做~~當然既解決方法就係同佢打左幾支類固醇~
但類固醇只係治標唔治本, 只係畀到止痛既效果佢, 幾年後藥性無左就會失效~
而類固醇又有副作用, 所以不能多打~~
估唔到...期限咁快就到~~痛根又再出黎折磨佢~~
今次照完, 醫生提議佢做手術~因為已經無辦法~

找過資料, 知道仁安醫院有個微創手術名為<椎間盤水刀髓核切洗術>
其風險底, 最大好處係傷口細, 仲要做完可以即刻落床, 唔洗住院~
不過由於係私家醫院, 收費亦相當高~最大問題係...hoho既保險唔保佢呢個症, 因為係舊症~
查過資料, 全香港就只有仁安醫院有呢種手術做~
兩家人諗左幾日...為安全著想, 手術費5萬蚊貴就貴左d, 但為左健康, 決定畀佢做水刀~
後黎威爾斯既醫生話依家傳統既手術已經安全左好多~亦未有手術失敗既個案發生過~~
同埋佢依家有2條骨都有軟骨凸出要切除~
5萬蚊手術費係最basic既收費...依家佢有2舊要切, 一定唔止呢個價錢~
同埋...諗諗下...如果將來做完之後有咩事, 就一定要返去仁安...果d收費先金呀~~(由於無得claim保險~)
如果政府醫院做...有咩事都可以即刻返去嘛~~
既然醫生話傳統手術無問題~~我地就信你架啦~~!!!

上星期一hoho出左院返黎休養同等做手術~~估唔到醫生畀到個快期佢~~4月3日做~
今日一早就送返佢入醫院...準備聽日既手術~~
我臨走時好唔捨得走~~好想留底一直陪住佢~有d想喊~~大概係我太緊張啦~~
但我唔可以畀hoho見到我咁既樣架~~唔可以令到佢咁擔心~
我知佢一定同我一樣都好緊張~~第一次做咁大既手術~~係人都驚啦~~
依家仲未知聽日幾點做...可能夜d醫生巡房先同佢講啦~
願主保佑hoho聽日既手術順順利利~~!!!