【明報專訊】劉夢熊（Dream Bear）失落連任全國政協委員，另一個委員盧文端就成功連任。盧文端噚日出席港島各界新春酒會，佢同Emily講，政協常委上個月去北京開會，常委陳永棋講政協委員唔應該「食碗面，反碗底」，原來事後Dream Bear專登打畀盧文端，叫佢幫手同棋哥講，話自己「無食碗面反碗底，我半碗都無得食」。
盧文端話，Dream Bear問佢政協名單係咪無佢份，又話自己有填表。盧文端同佢解釋，政協無佢份，同佢向周刊爆料無關，但同佢畀廉署調查有關。
Dream Bear：不予置評
Emily打畀Dream Bear求證，佢話「不予置評」，已經出院嘅Dream Bear，手提電話嘅接駁聲似係漫遊，Emily問佢係咪不在港，佢唔肯答，至於今日係咪要去廉署報到，佢就話要查下先，咁就收線。
