由細到大，生活同命運都受別人左右。讀邊一間小學，升中排位，甚至係補習，都由老師同父母幫我決定好哂。我所做既，只係依照佢地訂落黎既路行。我係個典型近朱者赤，近墨者黑既人，身邊既人一舉一動，習慣，興趣都容易感染到我，諗返起，初中迷上打網上遊戲，羽毛球，到高中開始模仿朋友而寫Blog，又進入動漫畫世界，甚至係最近既學吉他，全部都係受其他人影響。無邊樣真係自己想做。

　　哩年幾,我不斷問自己我係一個咩人?我答唔出，腦海中自己既影像都同朋友重疊。邊一個先係我？定無一個係？那，我又是誰？

　　記憶中，只有兩件事真係完全由我決定，第一件就係中四揀左文科，哩條路,我從未後悔。第二件就係上年AL放榜後選擇自修重考。當初唔理其他人意見，無揀到係日校重讀，讀副學士/高級文憑，甚至海外升學等出路。老實講，原因好簡單，就係想由我決定返自己既將來，聽落去可能覺得我好任性，不過人總唔可以一生被他人扶持而行。我只想走我路，做返自己， 如果今年高考再衰多次，對我打擊真係好大......

　　哎，做返自己真係咁難咩？