今個新年係近年黎過得比較開心既一年啦，既唔似上年咁心事重重，又無以前咁懵懵懂懂虛渡時間。

　　三個字可以概括哂新年感覺——醉醺醺

　　真係由年三十晚醉到落初六，日日都有各種各樣既酒飲。唔係我好酒成性，而係今年班長輩特別中意係飯時灌我地哩班細既飲返幾杯，直頭當左我地係大人。

　　記得有晚堂哥請去酒吧，先至見識到大陸所謂酒吧，根本就係香港既卡拉OK!只不過前者重酒，後姐重唱，係大陸酒吧，只係收酒錢，唱Ｋ，小食，其他服務一律免費。而間酒房亦比CEO級數Ｋ房稍大。都算見識多樣野。

　　新年前係香港有留意到內地人都積極討論今年中央電視台既春晚節目，一心諗住今年係大陸留意所謂春晚究竟係何許節目也，點知年三十晚，走左幾家人度拜年，發現都無人睇央視既春晚，我好奇心下轉左去央視一台，隨即見到舞台上有個老男人不斷講Ｄ比北京話更捲脷既說話，我根本就聽唔明佢講乜！但係台下觀眾就笑聲，掌聲連連，只令人無奈咁轉台。後尾係網上搵下資訊，發現原來央視既春晚，只係受北方人歡迎，因為春晚內有大量同北方人有關既文化。所以長江以北既省份，平均收視率都有9成，之不過一過條長江，春晚收視率急跌，由江蘇既20%，再到廣東既5%，最到落到海南既1%，春晚節目愈南愈唔受歡迎。睇怕主因都係中國南北文化差異實在太大，有機會再討論。

　　最新奇莫過於去廣州拜年果一日，由深圳坐車去都要3個鐘頭，不過一落車聽到滿街都係熟悉既廣州話，一切都係值得。話說深圳已經淪為普通話城市，外省民工以數量優勢令本地粵語被打成少數語言，每次出街買野，都要對人講胡語，說渾話，感覺認真唔自在。廣州就唔同，佢係粵語發祥地，本地人亦鐘情於母語，不屑降格以普通話遷就北人，我係當地酒樓見到外來既民工，都講緊唔太準既粵語，我反而好欣賞佢地既心態，因為入鄉隨俗係中國人千幾年既美德！同時要遣責下果班時常嘲笑人地有鄉音既無知之輩。

　　本地廣州人講既粵語，都同香港人講開既有小小差別，好難話邊一面係標準粵音，我個人認為，廣州人既粵語比較富有情感，一句說話中，充滿抑揚頓挫，句尾聲調不時拉長，聽起來餘韻縈繞，久久不絕；港式粵語就包含大量英文詞彙，語調平板，蓋掩情感，又充斥懶音，聽來逆耳，不過港式口音始終係我母語，聽開有感情，只能話兩地粵音各有千秋，亦充分體現到兩地既文化差異。

　　第二個令我喜歡廣州地方係城中處處洋溢住濃厚歷史氣息，係廣州城內亂逛，都十步一亭，廿步一街，百步之內，必有古蹟，令人不禁駐足觀看眼前之建築為何物。街上都無論巴士，柵桿，外牆，都不時貼上政府宣傳廣佛同城(廣州佛山一體化)的標語，名為一體化，實為廣州吞併佛山，將佛山變為衛星城市，無論一體化當初應否推行，既已成定局，只希望兩城市民能享受到一體化帶來的好處。

　　今年新年真係擴闊視野。古云讀萬卷書，不如行萬里路，所言非虛也。