早幾日去左泛亞搞既團拜茶宴，主要都係想見返班可愛既北京團友，可惜有一半都因為高考臨近，要溫書關係，無暇出席。不過唔緊要，就算見返一個，我都一樣咁開心。

　　估唔到早前港大果位因出位言論搞到滿城風雨既陳會長，竟然係團拜司儀之一，佢真人比上鏡瘦，定係早排壓力大而瘦呢？真係不得而知。

　　令人意想不到既係當日同枱有位校長邀請我地作簡單自我介紹，當我話我係第X屆既人，來自粉官，個校長即刻話，哩間野好出名架喎，真係聾既都聽到有弦外之音，睇黎就算中學畢業左都好，粉官都會跟足我一世。

　　坐係我身邊有兩位博士，分別來自嶺大歷史系同城大國際商業系，前者講野勁專業，對時事分析有精闢見解，後者就和藹可親，十足一個老爺爺咁不斷問下我依家既狀況，仲分享埋佢自己既求學經歷。點解中學遇唔到好似佢兩位咁好既老師架？哩兩位博士係短時間內展示既學識修養，已經令我想做佢既學生。我一定要入到大學啊！