1.結婚公仔

本身都無諗過買,係PW個職員話帶對結婚公仔影相會靚D,之後結婚個日又可以拎出黎擺係迎賓檯度,幾靚呀,一對公仔可以用幾次啵,仲話自己有相熟既結婚公仔公司,我地先落搭幫襯左...點知間公司明明係張單度話6號有得拎,又話佢盡快趕工,唉....對公仔追左3次先交到貨...好彩主幫我...如果唔係都唔知幾時先拎到...諗住帶對公仔影相,點知就咁麻煩...間野都真係黑店,好彩真係趕得切帶去PW....唔係真係曬我錢 ><

2. 姊妹群

唉~無啦啦,唔知點解Lily同Clara不和,係大約結婚前3個月左右...Lily有日放工whatsapp我話同Clara不和,唔方便做我姊妹,仲話姊妹裙個方面比返錢我~我就梗係唔要啦....不過咁短時間去邊搵人做姊妹>< 最後同Kero傾完,Kero叫我問佢D朋友,好彩Kathy肯幫手替位咋T.T   本身都已經驚Yonnie黎唔到做姊妹.....依家仲要多一個有咁既問題發生,真係不知所措啦....好多謝你丫Kero

3. 姊妹化妝

個日Natalie, Yonnie, Hilary問結婚當日有幾多個姊妹化妝師,我話得1個...點知佢地之後勁多意見,成日話得1個化妝師會好趕囉...叫我問下可唔可以加多1個姊妹化妝師幫手...問左化妝師佢話無問題....仲幫我計埋時間...睇下趕唔趕得切,我真係唔明, 人地咁專業都唔相信人,係都要為D咁小既事煩我,係疫症期間結婚已經唔容易,有好多野要煩,仲要我煩埋D咁小既事,都唔知佢地有無當我係真心朋友, 好似自己顧住靚咁就得...不如我唔化妝啦,比埋個化妝師你地啦

4. 姊妹裙

話說係結婚一個星期前,佢地都仲未有得拎姊妹裙,由於我真係有太多野做啦...真係唔得閒幫佢地打去問,之後Kero,Clara都叫我唔好理啦~佢地會自己打去追...佢地幾個輪流打去問,終於係6月1/2日成功拎到姊妹裙,唉,無諗到Hilary拎完裙就問我屋企有無蒸氣企身熨斗,之後我話無,又開始比說話我聽>< 想點啵,明明係我結婚點解個婚禮成日好似比佢控制咁,勁多要求囉...又話玩新郎個陣太易比人入門,要加高難道,家陣究竟係你結婚定我結婚丫,點解要控制我婚禮既一切,每人喜好都唔同,唔該,唔好將我既婚禮當成你既預演/綵排好唔好,真係好過份囉~朋友係咁樣對待嫁咩,淨係為自己好自私呀,真係好嬲呀

5. 攝影師電話

我依幾日不斷問負責人拎攝影師電話,佢有時就話晏D答我,有時就話未排schedule,但係我聽日就係Big Day,仲未有攝影師電話真係好擔心,又驚一陣攝影師會遲到,又驚no show....真係好多野煩...X.X   好彩到最後個負責人幫我開左個group有哂攝影師既電話,太好啦

6. Big Day 當日新郎,兄弟佈置花車花絮

由於當日係星期六,呀占樓下附近D車位full哂....我知道左個一刻,都呆左,不知所措,好彩有攝影師,花車司機既幫助,我地最終順利解決

 今日晏就Kero問我同唔同佢夜晚出街食飯，我話唔啦，我老公煮左飯，之後佢話咁去你屋企食，我諗住都係多佢一個人就無所謂,點知佢話問埋Jessi同Kathy😂😂我咩都無準備，屋企又唔夠碗,又無野飲，野食，又未執過屋，咁突然就話上黎，我驚會失禮人地姐，佢地3個約好左放工走去Donki買梅酒先，我就係烏蠅館會合佢地，拎齊外賣就返屋企啦，都叫佢地入到屋唔洗除鞋，點知就個個都除哂鞋，將d鞋放哂係鞋架度，之後就開始參觀我間新屋，個個都話依度幾好，幾舒服，張sofa又幾好坐，個衣櫃又大，參觀完我地就開餐啦，原來Kero仲買左串燒，魷魚鬚做小食，仲有支梅酒添，我地一邊食一邊傾，飲杯梅酒，食完野之後用app叫左3碗甜品(係鮮芋仙呀😍😍我之前都想試，太好啦，今日終於食到🤭🤭）我地又試一邊食一邊傾，大約11：00佢地先走，臨走個陣仲話搵個星期五叫埋Clara上黎坐😂😂我之後問佢地total幾錢，諗住今日既洗費我比，點知Kero佢地話無我份，佢地請我地，當係慶祝我地新屋入伙😂😂最估唔到係佢地真係好中意新屋😂😂

 今日我同呀占都休息，不過行程依然好繁忙😂😂10：00幾起身，呀占就已經係廚房煮緊早餐+lunch~佢真係好好心機，咁累都仲有力氣煮野比我食，仲要係勁豐富個種，有合桃蛋糕，茄汁豆，煎蛋，午餐肉，仲有公仔麵同寶礦力😂😂😂食飽飽，做左一陣家務，我地先去銀行入錢，之後出左去銅鑼灣換禮券 （因為之前買個個電視機有禮券送丫）😮😮換完之後行左陣Donki,我地再搭叮叮去左灣仔萬豐買左鑊剷，同埋少少家品，無幾耐我見肚餓，之後我地就去左蜜蜂雞度一人叫左一個茶餐食，食飽左之後就搭車返尖咀，走去Donki買野，之後就返屋企煮飯，做家務，係時候收拾心情，準備聽日返工啦，加油加油🥳🥳

因為琴日呀媽無帶到頸鏈個盒，一陣15：00前要還哂所有衫，所以我8：00幾起身，刷牙洗面，之後衝去娘家拎返條頸鏈，去到娘家唔小心傾耐左，之後大約11：00幾先返到屋企，返到屋企我見我同呀占都未食野，就拎左琴日酒樓淨返個半圍既水餃同埋乳豬，炒飯整返熱去食，等埋呀占返黎，我地食埋lunch，之後call左gogovan搭去太子還衫，個個gogo van司機好好人，佢話專登停係無水氹既位置比我地落車，去到金都，個姐姐又試認得我，佢話琴日天氣好，又問我地琴日搞得成唔成功，之後姐姐就開始check衫，佢一邊check衫一邊同我地傾計，佢仲話我件婚紗係新嫁，我係第一個著，哇~好開心呀🤭🤭主真係送左好豐厚既結婚禮物比我同呀占，姐姐check埋頭飾之後，我地就返屋企拎結婚花車盤去還，so busy😵😵去到個陣見到舖頭有2對新人問緊野，我地唔好意思阻住人地做生意，所以企埋左一邊，點知MC竟然見到我地，幫我地拆返個結婚公仔，又用個靚膠袋幫我地入住，仲同佢傾左一陣計😂😂之後我地又返屋企拎埋琴日打包既鮑魚，帶子拎去娘家做餸，去到娘家，呀媽第一時間筆湯比我地飲，我地食左少少，原來呀媽又買左茄子，娃娃菜比我地，之後我地拎住袋野去奶奶屋企，去到奶奶屋企，奶奶問呀占細佬應該點叫我，佢叫左我做呀嫂，第一次比人咁叫都唔係好慣丫😅😅我地係奶奶度又係食左少少餸，奶奶仲話有2件撻，叫我地食埋去😂😂臨走個陣奶奶叫我地拎條紙杯，2支紅酒返屋企，佢仲叫我記得拎返把褂扇走，把褂扇咁靚要黎留念😂😂傾多陣我地就搭車返屋企啦，今日既busy trip終於完成，可以好好休息下🤣

 唉...可能太緊張啦..我成晚都無訓過,4:00幾起左身,刷牙洗面之後整左個炒麵王食,食飽就開始執D玩新郎物資,結婚朝早用既頭飾擺係客廳度,擺哂出黎, set哂場,拎哂D姊妹手花,之後我就換紅色睡衣,換完就開始幫呀媽準備定敬茶用品(煲定水,將紅祖,糖蓮子預先放落杯度), 我又check多次麥麥送個app,突然見唔到張訂單,我就即刻好心急咁打去問,好彩個職員話收到,真係太好啦,大約5:45左右,我既化妝師姐姐已經黎左XD佢係第一個黎到佢一入黎我就話"你咁早黎到既", 佢就答我"新娘子唔早啦,我之前有D新娘仲早化妝丫比完的士錢佢,我先記得原來我唔記得係5:45敷mask化妝師姐姐話依家敷丫, 佢話可以夾左頭髮先,於是我就一邊坐底敷mask,一邊比佢幫我夾頭髮,而D姊妹都開始逐批逐批黎到...但係因為佢地條裙係綁帶,所以都搞左好耐..之前仲話唔夠時間化妝個D丫.....睇清楚未丫,依家係邊個阻住D時間,唔夠時間化妝丫,人地姊妹化妝師好快手,係你地著得慢咋終於D姊妹著好衫可以開始化妝啦,我化妝,set頭個陣,一邊同化妝師姐姐傾計,佢又試讚我皮膚好,又話我一提到去旅行真勁開心,佢仲話佢最中意去既地方係蘇梅島,個度D villa又大又正,佢中意去曬下太陽渡假放鬆下,朝早既髮型我想整同心結,於是CK就幫我整好左,仲配埋佢私家髮釵,真係好靚丫....太好啦~佢知道我想要咩造型我仲同佢講擔心一陣可能會落雨,CK就話應該唔會,我化緊妝個陣二舅父,舅母,呀婆都已經到左....之後8:20個陣叫呀占上黎set頭,CK勁好人仲幫我呀媽畫眉,大約8:30左右,3位攝影師已經到左,一見到攝影師就緊係派左利是先..之後就開始影花絮啦...好緊張丫~不過好好彩攝影師都好nice,而且有人會糾正我既動作,好好玩呀...就好似拍緊戲咁,無論如何今日都要演好依個劇本去XD 開頭影幾個畫面都係CK幫我畫唇....之後就埋位影我攬住件褂,成個花痴咁又影下呀媽幫我著褂(原來著褂都好有技巧XD),同埋姊妹合照,再影下姊妹同我既對話,影完之後,我就要入房啦...好緊張呀~原來已經要準備接新娘啦...入到房我就同二舅父,呀婆佢地影相....我淨係聽到出面好熱鬧~咩都無得睇,好彩老豆影底左出面情況,我有少少野睇下...不過真係好搞笑丫~D兄弟帶哂D大耳仔...真係好搞鬼~無幾耐就到左新郎讀愛的宣言,讀完之後,攝影師叫呀占講真心話比我聽XDD 仲要呀占係塊誓言板簽名,之後我地一齊出去客廳,然後呀占拎住個花球,攝影師就詬新郎比D誠意,新娘子先肯接你個花球嫁以後D錢應該點呀?家務呢?XDD),之後我拖延左一陣先接個花球,接左花球就要旋轉3圈再錫~有D頭暈丫....準備出門啦>o< 出門前,攝影師就叫D姊妹拎野先....由於姊妹太多野要拎...我細佬都要幫手拎落樓,伴娘就係門口開紅遮,我唔係咁識,出門口個陣想踩門欖,攝影師見到就叫我今日都唔好踩,之後伴娘就一直幫我擔紅遮...直到係樓下都仍然擔住紅遮,出左大廈門口,Yonnie就負責撒米,個攝影師話姊妹你可以慳D洗,唔洗撒咁多....之後我地就同花車,兄弟姊妹影相,架花車有翼嫁,我地都影左好一段時間,好似超時左少少,所以個花車司機都有望下我地,要企係車度影相個陣,花車司機驚我唔夠高,佢好貼心咁比左個高台我企,好彩攝影師睇到咋...原來呀婆比我個玉墜條鏈鬆左...要扣返實去,影完就上花車嚕,準備出發去男家啦....上到車, 司機問我地伴娘伴神跟唔跟車...老實講發生左咁多野,我就梗係唔想同伴娘同架車啦...不過伴郎跟埋上車..我無理由唔要伴娘陪嫁....所以最後伴娘伴郎都跟我地車...坐車個陣..我諗住問下伴郎野,同呀占佢地傾下計,問下佢地琴晚係酒店過成點...原來佢地琴日都3:00幾先訓,分好哂工 (好似過大禮個日咁XD),之後就同118傾佢既感情生活~佢地雖然好夜訓,但係就好早起哂身~同埋有個兄弟勁好...幫呀占準備埋止汗劑,真係好兄弟丫我地傾傾下,伴娘成日搭嗲...我心諗我唔想同你傾計呀...你扭返前面坐得唔得呀佢係咁搭嗲囉....就係咁~無幾耐我地就到左男家樓下~不過依家本身係Plan
左依段時間係影新郎,兄弟佈置花車....點先男家樓下無位泊車....攝影師同兄弟商量左一陣....就話不如上狙男家敬茶先~之後伴娘就擔住紅遮等我落車~到左男家之後,我地就準備敬茶,點知入到屋,唔知邊位長輩話要斟左茶比麻麻飲先,之後我地行去神檯敬茶比呀占個麻麻啦....再敬茶比老爺,奶奶,親戚~敬茶個陣攝影師問左個好尷尬既問題:老爺,新袍仔靚唔靚丫?老爺個一刻就無答,之後姑姐就話梗係靚啦~都唔識講野既~影完敬茶同埋屋企人合照,新郎同兄弟就去搵地方影花絮,其中2個攝影師係咁幫我影褂扇D相~太好啦...佢地真係知道我中意D咩風格,好似人地影個D古裝特輯咁...估唔到去唔到台灣影,竟然係結婚當日係香港有人幫我影,仲要係獨照...超級開心丫,好感謝主袮送比我依份大禮物,我真係好中意丫~影完之後我就諗住換衫,點知Kero同Clara話我老爺奶奶比我地斟茶個封利是唔見左~我之後就同佢地講,搵唔到就算,唔緊要啦~之後我就準備入呀占間房換衫,點知老爺話間房鎖唔到.叫我去奶奶間房度慢慢換衫,本身Clara佢地想幫我,我話自己換就OK,比佢地休息下啦....換完衫我聽到Kero佢地話一陣去買奶茶飲,我話但係我無錢係身度,跟住Kero話佢有呀,仲問我飲唔飲...我太緊張啦...所以唔飲嚕,我又見佢地好似肚餓咁,就問左奶奶D西餅食唔食得,奶奶話D野食係買比佢地食~之後佢地就食西餅,睇黎佢地真係好餓丫,辛苦啦~差唔多時間,兄弟話佢地已經係樓下,咁我就叫D姊妹落樓先,話有兄弟係樓下帶大家去食lunch嫁啦~我同老爺就等埋呀占上黎換衫先出去,等個陣原來得我同老爺咋...之後老爺解釋返頭先唔答攝影師問題既原因,佢驚我可能會嬲,所以解釋得好詳細,我聽完之後心諗其實老爺你真係識做呀占終於返上黎啦~~天空太熱啦,呀占件褂都濕濕地..之後我就拎個衣架去晾下件褂~我將褂扇,紅遮,2套褂,褂鞋都擺左係奶奶屋企先,聽日再過黎拎返~換好哂衫...我地就落街食野啦~係丫....本身book檯book左15個人咋...點知個日lunch大姨同勇叔都跟我地食lunch....要叫波波球即刻拎多2個位,同埋叫多幾個點心,好彩間餐廳黎D野食都好快~~大家食飽左之後,就要行多少少路上Van 仔,行出去等van仔個陣,我見到Clara黑左面, 心諗死火啦~係未我有D野安排得唔好,佢唔中意丫...我又諗起之前係toilet個陣Kero同Kathy話Clara可能夜晚頂唔順,可能到時要頂佢個位~大獲啦...都唔知發生咩事,我有D驚驚地,但係實際情況我又控制唔到,自問我有好多野都已經準備好哂,我盡量將姊妹要做既野減少左好多~究竟有咩不滿丫仲>< 上到車個陣....兄弟同呀占話出面塞緊車...但係我同化妝師之前講左15:00見~~希望唔會遲太多啦我地...本身係紅隧個陣塞塞地車~~個陣已經2:45啦~我心諗大獲啦...實超時...同個rundown實有好多出入~個陣心裡係咁同主講,希望主幫幫我,可以比我準時去到啦>< 點知我真係14:59真到左南華閣啦O.O"  太好啦!主袮真係好錫我丫,好感恩落左車我地登記完就入去南華閣啦~我一入到南華閣見到化妝師就拎埋我個喼去新娘房,化妝師幫我拎婚紗,D兄弟見到我拎喼個陣就話點解唔叫佢地幫手,要我自己做D咁粗重既野...我答無問題啦,我OK嫁啦,你地休息下啦~之後我就同化妝師入去新娘房換婚紗,我係阻時間,入到房就諗住即刻除衫換衫,點知化妝師話傻妹慢慢啦...仲有個酒樓職員係房度,我太心急啦~~都無留意度,好彩CK話我知咋,個個職員走左之後,我就除衫,之後準備帶nu bra...之前帶過幾次個陣都唔實,於是我向CK求救>< 佢話依個我幫人帶開,等佢幫我整,佢幫我整完就係唔甩~勁丫,換好婚紗,CK叫我放低D野,一陣叫其他人幫我拎,於是我同CK入返化妝間化妝啦~由於太忙,我將袋要派係利是放左係新娘房~化完妝,CK叫我唔洗換高跟鞋住,唔洗咁辛苦,佢幫我化完妝之後個造型真係太靚啦~好有公主feel,化妝個陣我同CK都不斷傾計,佢話我好有阿Q精神,又讚我好為人著想,佢仲問我:新娘子你係未好怕麻煩到人?我就話係呀....之後CK講佢話同我傾計好舒服,佢話但係太林會比人蝦,要有底線,佢仲話如果D人蝦佢屋企人,佢會痴線,同佢死過,我都覺得CK真係好好人,個人又肯同我傾計,令我個人可以放鬆D....真係好好彩,有個咁好既化妝師,我化完妝出到去,大家都雙眼發光,我都覺得個look好靚,唔似自己囉~比攝影師見到我出黎,佢地又試捉住我幫我影獨照XDD 影個陣我見到D朋友開始黎緊就同攝影師講,我有朋友黎左啦...可唔可以幫我同D朋友影相丫.....成個流程D時間,情況都控制得好好丫~~時間完全無超過時,只有早左,無遲...太太太好啦!我影緊相個陣,呀占同兄弟搵緊利是袋,點知佢地話搵唔到,個刻我好擔心,又試心裡再一次搵主求救,好彩無幾耐佢地終於搵返袋利是啦,佢地搵返,我就可以放心咁同朋友影相啦...