咁快就第四堂，治療師話有進步不過唔明顯。如果下次進展都係咁少嘅話，就要開始針灸喇，我最唔想發生嘅事發生喇。

做完物理治療之後去左商務，搵<<教授>>嘅劇本，尋晚八號風球，睇完話劇之後，門口已經無得賣本書，但商務都無，遲下要去第二度搵喇。

八號風球，休息左半日。今朝原本諗住八點起身搶Iphone, 唔知醒遲左半個鐘先起身，一開始已乜都無哂lu。不過我都無損失，因為好多人準時起身都搶唔到。宜家為有等二十號，再戰。

諗住做完物理治療去跑步，鬼死咁大雨，無跑到去左食嘢，之後喺沙田附近剪頭髮，宜家剪個頭要成百幾蚊好貴，剪到超短，我宜家成個櫻木花道咁。

今日又係hea hea下，乜都做唔成咁，張生你唔可以咁架BO. 

人生而自由，卻無處不是枷鎖。 

因為呢句Caption， 我去左睇呢套話劇，

佢係2013 最佳話劇<<教授>>，喺Poly 重演，我就決定去睇。

故事大鋼：

To be or not to be, It's our question.

Lucretia於末代高考失手，退而選擇哲學系為台階，滿心以GPA爭取轉系，卻遇上致力培育學生思辯能力的｢教授｣及「社運王子」師兄Jeremy。Jeremy後因參與社會運動要在現實與理想之間作出抉擇，｢教授｣與他的母親處於極端對立的局面，激發出台上一幕幕爭論和掙扎。塵埃落定，學業前途、家庭期望和社會公義的排序在眾人心中又可會洗牌重來?

非常有感染力的一出話劇，有很多場景都差點樣我感覺落淚，以中大作為故事背景，對我來說非常親切，雖然在理工上演，要左陌生的地方，回憶自己的母校，是一種遺憾。

這話劇讓我想起初次步入大學的自己，大學對我來說是一個重要的地方，因為它在我生命中打開了一道大門，一道屬於知識和思想的大門。大學是一個有很多人的地方，但不是說像旺角街頭般一樣的擠擁，是一種包含各式各樣稀奇古怪人物地方。言而，大學對人有極高的包容力，任何人都能在這地方找生存空間的地方，大學就是這麼純粹，這麼自由的地方，一個現實中的理想國。

回想當天，走進大學，接受各式各樣的教育，攝取聞所未聞的思想，然後由大學投身社會。那段過程就像走進一條變身隧道，縱然身體沒有改變，但思想已經不一樣，它為我的生命注入了靈魂，建立了屬於我的思想。

投身社會後，我清楚感受到獨立思考的重要，只少今天我可以清楚分辨，甚麼是道理，甚麼是Bullshit。 身邊總有些人，在大事大非面前，都可以把自己的歪理，說成是獨特見解，以眾人階醉我獨醒的口吻說廢話。我不是自命清高，但這些說話真的聽得太多，真的讓人很生厭。

知識是一種不能回頭的東西，就好像同一個人，你不能認識两次，知識一但吸收了，便不能忘記。 一位思想家的名言，寧做一個痛苦的人，也不要做快樂的豬。 To be or not be , it's really a good question. 

其實我唔係好想一日打两篇日記，但睇完東邪西毒之個感覺太深刻，我一定要打低佢，我怕會唔記得。

呢套嘢已經有廿年，因為王家衛個名，我特登搵返出黎睇。

唔睇由自可，一睇驚為天人。首先，喺呢套戲入面嘅八個角色，係分別由八個好出色嘅演員黎擔任。八個角色嘅戲份同刻劃都好鮮明，而擔任嘅演員都將自己嘅角色恰到好處咁表達出黎，

張國榮嘅難以觸摸、梁家輝嘅沉溺、梁朝偉嘅憂鬱、張學友嘅簡單土氣。

多餘嘅嘢唔講，呢套係一套用武俠片包裝嘅浪漫愛情片，佢將愛同恨果種糾纏不清，人同人之間感情瓜葛嘅複雜，最後相愛無夢嘅悲痛，好完美咁表達出黎，睇完之後我個心真係會乸住乸住。

睇王家衛，除左畫面同劇情之外，佢嘅對白都係一個重點，因為往往喺啲對白入面都流露左好多人生哲理，一套愛情觀，咀嚼啲對白係一種享受。

例如：

人的煩惱就是記性太好，如果可以把所有事都忘掉，以後每一日都是個新開始，你說多好。
 
每個人都會經過這個階段，見到一座山，就想知道山後面是什麼。我很想告訴他，可能翻過山後面，你會發現沒什麼特別。
回望之下，可能會覺得這一邊更好。
 
每個人都會堅持自己的信念，在別人看來，是浪費時間，她卻覺得很重要。
  
雖然我很喜歡她，但始終沒有告訴她。因為我知道得不到的東西永遠是最好的。
 
 
從小我就懂得保護自己，我知道要想不被人拒絕，最好的辦法就是先拒絕別人。
 
 
我曾經問過自己，你最愛的女人是不是我？但是我現在已經不想知道。如果有一天我忍不住問你，你一定要騙我。就算你心裡多不情願，也不要告訴我你最愛的人不是我。
  
 
有些人是離開之後才發現離開了的才是自己的最愛。
 
 
當你不能夠再擁有，你唯一可以做的，就是令自己不要忘記。

 呢排都唔知做乜，無論我十一點上床又好，定十二點上床都好，我都係喺將床上轉黎轉去訓唔著，一定要两三點先訓到，有時可能四五點先。個腦好似停唔到咁，不停喺度諗嘢，但又係啲無謂嘢黎。

不停諗嘢果種感覺係辛苦，明明已經好攰又訓唔到，又停唔到咁，第二朝起身又無精神返工，真係慘過食屎，放過我啦好嗎？

慢慢擺脫果啲不停last seen 不停睇Facebook嘅日子, 無論我睇幾多次，我都唔會睇到乜嘢，就算俾我知道哂佢嘅行縱，見過咩人，講過啲乜，做過啲事都好，發生左嘅事係改變唔到。呢啲生活亦都唔好過，放過自己啦好嗎？

When life gives you lemons, make lemonade🍋

呢句嘢嘅意思係話，當生命俾你又酸又苦嘅檸檬嘅時候，要將佢變成又香又甜嘅檸檬水。

我第一次睇呢句嘢嘅時候，覺得好有意思，因為我相信無論幾差嘅環境，只要心依然存有希望，就可以將個困境扭轉過黎。只要唔放棄堅持向好果面諗，苦都可以變甜。所以好多時，當我面對難關嘅時候，我都盡力思考出路，諗下仲有咩可以改變宜家個形勢，雖然唔係次次都搞得掂，但總好過一開始就打定輸數。

但係愛情，係排除在外，感情無左就係無左，過左去嘅愛情，係無論點樣思考，點樣搵都唔會搵到出路，只可以改變自己，等自己慢慢放低從新上路。當你還可以捉緊愛情嘅時候，就用緊全力捉實佢。當佢走左，你就全心全意放佢走，祝福佢。

成個幾月無去過跑步，無做過運動喇，之後整親手，驚又chok到佢，所以就一直唔敢亂做運動。

去左運動場跑返十個圈，跑步完之後真係舒服哂，出完一身汗，心情真係會好好多，運動可以令人放鬆，唔會成日又諗埋一面。

要跑返多啲步，身體好啲，心情又好啲，可能搵個跑join，又可以識下朋友，又有人帶住訓練，一舉三得。

宜家成日睇TVB啲師奶劇，由八點睇到十一二點，睇黎我真係太得閒。

 今日嘅我除左份工之外，一無所有，每日過住啲返工放工，行屍走肉嘅日子。我無左人生要奮鬥落去嘅目標，以前我好努力，好有衝勁咁工作，因為我知道自己要達成目標，要成家立室，要俾幸福佢，我就只有好努力咁向上爬。  宜家我連生存嘅義意都唔知係乜，以前為左生活要好努力，宜好努力咁搵為乜嘢而生活？

我根本唔可憐，呢個世界有多人連三餐溫飽都成問題，呢啲人生活好艱苦，但佢地知自己為乜嘢要生活，而我宜家都算衣食無憂，但就百無了賴。我真係好想離開香港，去一個好遠好遠嘅地方重新再黎過，喺呢度可能已經無乜嘢值得我留戀咁，好想一走了之。自從我失去左佢之後，我就再次擁有返自由，無論我想唔想要，我都擁有緊。既然係咁，咁我就用我宜家唯一擁有嘅嘢，有咁遠走咁遠。

今日有個朋友，打黎同我講話一齊搞生意。佢有時間但無本，啱啱我又有舊錢但無時間。我都覺得可以一試，當搵啲世藝俾自己，俾自己忙下，可能會搵到得返我為咩要生活落去。而我宜家都算衣食無憂，但就百無了賴。

"香港人漂流記"呢套嘢幾好睇，講啲香港人去左第二個國家生活，落地生根，講佢地點樣適應，點樣重新開始。

呢套嘢好吸引，好過上星期套"沒女"。我好佩服果啲人，好勇敢咁走去第二度生活，過另一個人生。我都好想衝出香港，一黎覺得香港已經慢慢變得無以前咁好，二黎真係好想去睇下呢個世界，但自問自己仲未有呢種勇氣。張紹銘要勇敢啲，要大膽啲走入個大世界度，要見識多啲嘢。

爺爺終於由威記轉左去沙田療養院，轉得院即係身體又好左。呢段日子大家都好辛苦，個個都不停出入醫院。尤其係水叔同細姑姐，真係風雨不改，仲要一去就好多個鐘，輪流不停照顧爺爺，真係好孝順，好值得人尊重。

 部電腦個hard disk死左，乜都攞唔返。入面啲相咁就無哂，想救都救唔返。我已經乜都無哂，宜家連啲相都唔留返俾我，其實係我真係咁黑仔定連個天都唔想留返啲嘢俾我。

唯一可以慶幸嘅係，我之前已經整好左本相簿俾佢，果時嘅我覺得再唔整就無機會，點知宜家真係應驗左。

做人做乜都好，可以做，覺得自己應該要做嘅時候，就要立即去。時間一過，機會一過，想做都無得做。

今日係爸爸，我、大哥同媽咪三個人上左去寶褔山探爸爸。

可能我唔迷信，我一直都覺得成日黎燒果啲嘢，其實爸爸唔會收到。

不過即使係我唔信都好，每一次我都會黎，就算咁啱果日唔得閒黎唔到，我都搵日我自己上去一次，唔上香，唔燒衣，就只係為左上去見一見佢。 我好記得，我入大學開學之前，我自己上過去一次，同佢講我入到大學。讀好啲書，係佢以前成日同我地幾兄弟講嘅嘢，如果佢知我可以入到大學佢一定會好開心，可以佢唔可以親眼見到。其實我可以入到大學，有好大原因係因為佢，係我最後可以為佢做嘅嘢。

返到屋企，執下屋，因為實在太亂太多嘢。其實我唔係好鍾意咁亂，但我又成日買埋啲無謂嘢，啲雜物就越黎越多。

如果有一日可以搬去一個新地方住，我一定會好刻制自己，唔買無謂嘢。間屋要好簡約，好整齊。

之後又去睇下爺爺，四叔同我講，照咁進度今個星期五就可以轉去療養院。Good  !!!

睇完爺爺就即刻趕返屋企，整嘢俾媽咪食。

 白汁三文魚天使麵。

效果唔錯，第一次自己整白汁，有啲雞手鴨腳。

不過下次整，有經驗，我會好好多。

今次我對呢個麵嘅評價係： 有少少乾，可能我落得唔夠牛奶，令個汁太傑，同煮嘅時候太乾令到個汁有少少濃，下次我會注意下。

同個汁好似淡左少少，下次煮嘅時候可以加啲芝士粉，令個汁更香，不過咁就會好肥。 下星期會煮第二樣嘢，等我諗下煮咩好。

我會學整好多好多嘢食，將來整俾佢食，要好好照顧佢。

 終於所有嘢都開始慢慢重回正軌。

爺爺醒返，病情好轉，一日好過一日，如果呢個世界真係有神，我真係好想同佢講聲多謝，將佢留返我地身邊。

我隻手，開始做物理治療，又開始返漫長嘅物理治療之旅，不過今次個物理治療中心大啲，唔洗等好耐，物理治療師亦比較空閒，唔會好急，有多啲時間照顧我。只要我勤力啲日日跟住佢比果啲動作做，我會好快可以好返。

心情亦都比之前平靜左，我知無論我再點憫，點掙扎都無用，只會壞事。我要講嘅都講哂，宜家我只係想佢可以生活得好好，我都會過好每一日。我知自己除左等無嘢可以做，亦都無嘢須要做。繼續完成果啲我地曾經一齊想做嘅嘢，係我宜家最想做嘅事。繼續寫我地嘅故事，即使得返我一個人。

數係要黎走嘅

做下嘢嘅時候，突然諗返起同佢同一齊嘅時候搞果啲爛Gag，真係好好爛，爛到我自己都笑一笑，點解自己可以講咁爛嘅嘢。

好耐無搞過爛Gag,自從分開左之後，連講嘢都少左。呢個世界係得佢一個可以毫不厭倦咁聽我講嘢，雖然佢唔係每一次都會笑，但有時可以令佢笑，係一種甜蜜黎。一個人再走過，我地曾經一齊走過嘅地方，再做我地以前做嘅嘢，都會勾返起呢啲回憶。一個鍾意講無聊嘢嘅人，遇到一個唔介意聽無聊嘢嘅人。鍾意講果個，唔係對個個都可以好多嘢講，唔介意聽果個，唔係個個講嘢都會肯聽。互補不足，彼此彌補左對方嘅缺口。果段一齊搞下爛gag，你笑下我，我吋下你嘅日子，真係好開心，好甜蜜。可惜我宜家已經無得再過呢啲生活，剩底就有懷念。

分開之後，我成日都諗返起呢啲日子，回憶起果啲喜悅，再感受一次果啲甜蜜，我宜家都靠呢僅有嘅回憶同甜蜜，，喺一個無目標嘅人生，俾自己再繼續苟扯偷生落去。如果呢個世界上，每個人都唔完美，咁就只有佢可以修補好我人生入面嘅缺口，無左佢，我嘅生活已經缺少左好多嘢，而呢啲嘢係無任何嘢可以取代得到。

到宜家我都仲喺原地等緊佢，因為我怕有一日佢真係再返黎我身邊，會搵唔我到，所以我邊到都唔會去，唔會跟任何人走。 我堅信或者我希望，有一日佢真係會返黎我身邊。

話說A同事因為要跟Project嘅關係，已經長注左澳門一段時間，咁順理成將，喺香港原本佢同另一位Senior d 同事跟開嘅Project，就應該由果一位Senior嘅同事繼續跟返。黎到呢度，問題就黎喇，呢一位Senior 嘅同事，通常神出鬼末嘅，以我一直以黎嘅觀察，通常呢位同事係早上十點鐘打後先出現，飯後三四點又會唔見左人。坦然，我地呢啲算係自由工，要落Site, 要出去開會無可口非。但係呢位都未免多左啲。其實我由入呢間公司無耐我就已經留意到，不過果不關己，我都唔會咁多事。

好，入返正題。同事A去澳門之後，香港嘅Project係依然要Run嘅。但一直以黎，話就話两個人一齊跟，但其實大部份都係同事A做哂。而同事A宜家行開左Senior跟返好正路，但事實唔係咁，無幾耐之前，呢位Senior同事拎住一堆圖走黎問我得唔得閒幫佢改啲嘢。 當時嘅我乜都唔知，以為佢好忙好多嘢做，又覺得自己手頭上自己無乜嘢搞，可以幫下手，就應承左幫佢。就係咁，當時嘅我仲未意識到自己已經乃左嘅情況底下，就由啱啱喺地盤個窿爬返上黎無耐，又喺公司跌左落另一個坑度。

呢排嘅我由日日無所事事，變到多嘢做到連厠所都唔得閒去，由收工第一個走，變成留守到最後嘅一個。一黎我原本有自己嘅嘢跟緊，雖然唔太急，有時點都要理下。二黎我做緊啲我無做開嘅嘢，好多嘢唔識做，俾嘅指示又好簡單，啲嘢改完又改，有時仲要唔係少改，係大改。然後每一日嘅流程就係，一早等Senior返黎問佢咁改啱唔啱，之後下午喺我仲未改完啲圖嘅時候佢就已經走左，等聽日再問佢。

呢個咁情況已經俾其他同事察覺到，佢地差唔多日日都問，你又劃緊啊？劃左好耐架喇喎，阿邊個邊個呢？ 我只可以好無奈咁答，我都唔知啊。

某日原來某同事同我講，阿Senior原來喺出面有份秘撈做緊，大部時間都係做緊果份嘢，同事A已經幫佢頂左好耐，同事A行開佢就搵其他人幫佢做, 今次就輪到我中伏。Senior面皮厚我一直都知，但估唔到厚成咁，我終於明一個道理，樹無皮必死無疑，人唔要面天下無敵。

唔講由自可，一講啲是非就好似伊波拉咁急速擴散，好多同事加入討論，宜家已經一發不可收拾，由果一刻我先知原來有啲嘢收埋左咁耐。其實我不嬲唔係好鍾意講人是非，通常其他人講是非嘅時候，我都會自覺迴避。但今次我覺得我自己做左磨芯，再發展落去，我都唔知會點，如果同事A真係頂唔順辭職，頂佢個位嘅人，好大機會係我，到時我就真係中大伏喇