俾時間自己努力工作向上爬

你要保守你心 勝過保守一切 因為一生的果效是由心發出。 

將近五個月，我發覺我開始習慣。

 打開你的讓祂住進來。

最後我選擇相信神，自那天起我便得重生。

或許我只是一直在逃避想起妳。

 無論曾經佢對你幾好，有幾多回憶都好，佢都已經改變左，

唔再係當初果個佢。

 我知自己還在谷底裡，只不過我已經開始習慣沉淪的生活。

生活變得容易得多了。

I thought I had overcome the worst time, but obviously I don't.

I wanted kill myself, in the worst time.

Love was gone, hope was gone, live was gone.

I have nothing left

你要靜候再靜候，直到失收，始終要守。

 我連一秒都唔想記起佢。

 人生就好似一棵樹咁，我曾經以為佢已經枯死左。

但係原來喺呢棵樹嘅某處依然仲會萌芽生長。

有一日佢話唔定會比之前更茂盛，人生真係好奇妙。

幸好人生最痛那晚，沒有燒炭。

 最壞嘅情況係我又開始有自殺嘅念頭。

我怕我有一日真係會忍唔住。

 我很愛你，所以我要放你走。

當你看到我在Facebook unfriend 了，大慨會對我更失望。

但我真的不想再因為看見你的近況再失控，又再打搞你。

我真的不想再糾纏著你，我只希望你會過得好。

或許，你永遠不會見到這個post, 但我還如果你看見，希望你會明白我，你永遠都是我生命中一個重要的人，好好保重。

我終於重拾我的笑容，繼續向前行。

見更多的人，說更多的話，做更多的事。

學習放手的第一天

在多次安慰自己"我無事"之後，我終於真的"無事"了。

心終究沒有再痛，沒有再把自己糾結在過去的失敗當中。

我知我自己正式進入漫長的沉澱期，讓時間慢慢把傷口和疤痕沖淡，我終有一天會康復的。

 要懂得忘記！

在一起的時候，用盡全力地去記住她的一切。

分開了的之後，拼了命地去把她的一切忘掉。

同一樣的記憶，往日的甜蜜，變成了今天的痛苦。

連一秒都不想記起，可惜總是不自覺地回想起昨天。

總有一天，她會變成別人的女友，別人的妻子，別人的母親。

將來她擁有的一切幸福都是建立在你今天的痛苦上的，別傷感、也別難過，更不要仇恨。痛苦總會過去，感情終究也要放下，他日再看見她幸福的身影，你會知道今天所撐過的，都是值得的。

好好祝福她，並努力活下去，因為人是須要勇敢生存的。

 又失控，今次我失控到出盡全力打係咁打落個衣櫃度，打完之後成隻手損哂，但總算令自己個心舒服啲。到最後我發現，原來一直以來我都唔係好識發洩自己嘅情緒。原來唔開心嘅時候，搵嘢黎打，搵嘢黎發洩，係會令自己舒服啲，我可能要喺屋企整返個沙包。

次次都話今次係最後一次，但次次都有下次。 我真係好希望今次真係最後一次。 我唔想做偵探，不斷追問、不斷追查、不斷假設，到最後都係得唔到乜嘢答案。 我真係覺得好心身疲倦。

 不斷回憶往事，然後留低嘅只有心痛。

記憶力越好，越記得起往事，就只會難受。

我以為我呢一生都唔再須要過呢啲日子，但今日又回到從前。

繼續過啲討厭又無能為力嘅日子。

 呢排一放工就出左去金鐘旺角，好似返左两份工咁。

好多嘢想講，好多嘢想打，但都要停一停，真係好攰。

希望件事好啲過，可以重新打返嘢。

 今日又要六點起身，因為八點就要喺酒店出發去廠。

起身，梳洗一下，七點就落去食早餐喇，酒店啲自助早餐我不嬲都期望不大，因為通常無乜嘢揀，不過今次呢次呢間食物款式都幾多，中西日都有，唔係淨係得煎蛋火腿腸果啲頹嘢，我食到好飽。

八點就出發，我一上車就訓，因為真係好攰。

呢個就係目的地喇，係一間好大好有規模嘅工廠，比起我之前做果間山寨廠規模大好多。

又上堂上左大半日，仲要自我介紹，好鬼驚，一黎英文唔係太好，二黎我喺呢個工作範疇無乜經驗，所以無乜可以吹，求求其其講两句叫過左骨就算。

食完午飯之後就真係入去工場度行睇工序，入面唔俾影相，所以我都無拎電話出黎，都係果啲嘢啦，其實我真係興趣不大，但要做下樣俾人覺得我好熱心咁囉。

好唔容易捱過左大半日，之後廠家帶左我地去夫子廟行下。

其實呢度係一條大街俾人買嘢觀光嘅都幾靚，好有中國味，有時我覺得中國呢啲地方比佢嘅城市化更吸引，因為商場其實周圍都有，但呢啲地方就只有中國先有，再加上歷史元素，真係吸到好多鬼佬。

夜晚又去左另一間酒樓食飯，好大有成三層，我訂左其中一個房。

同尋日一樣，食物好好食，但枱上面除左啤酒只有白酒，水都無。

同韓國人講英文，我還可以。但對住內地人講普通話我真係投降，除左xie xie，我已經講唔到其他。

所以我全晚只係講xie xie, 然後左一句xie xie ,右一句xie xie，我就飲完一杯又杯，佢地個個都好熱情係咁叫我飲，我諗呢两日飲嘅酒，係我過去一年飲過嘅加埋都唔夠，我好驚會喺果度嘔，會好失禮，好彩無事，之後俾佢讚我話好飲得，其實我頂好辛苦。

食完返酒店，原本已經好攰，但醒起今日係最後一晚，所以一定要浸返個熱水浴，所以幾攰都撐住，落到浴缸先訓。

不枉我撐得咁辛苦，個熱水浴真係好舒服，沖完涼就訓，準備聽日執嘢走喇。

 十點鐘機，因為怕遲到嘅關係，我六點就起左身。

尋晚要準備今日飛嘅嘢，又要熨衫，又要執嘢，最尾成两三點先訓，真係唔係好想起身。

好無熨過衫，搞左好耐，仲個熨斗熨到隻手。唔出聲啲人以為我俾人斬左一刀添。

第一次喺香港坐飛機返大陸，淨係用回鄉證同身份證就可以上機嘅感覺，有啲唔習慣。

我一早都估到坐飛機返大陸會係一個惡夢，原因唔係喺架機度，因我為坐港龍都唔算差。原因係會有好多強國人，佢地啲行為真係好令人討厭。咁啱今次我就坐正喺個強國人隔離，全程勁大聲講嘢，又成日郁黎郁去，坐坐下爭啲連我個位想都霸埋，真係好煩。两個幾鐘嘅機程，我就要不斷忍受佢，又無得走，好唔容易先捱得過。

落機，排左一條長長啲龍，先入到境，其間認識下其他同行嘅人，除我同另一個同事之外，仲有三個香港人，其中一個係廠家，另外两個係同行黎。

去酒店放底行李，抖一陣，之後就去食飯。聽講我地住嘅酒店係全南京最高嘅，有八十二層樓咁高，我住四十九樓，有啲意外因為我係一個人住一間房，第一次，間放仲要幾靚。

今次同行仲有廿幾個韓國人，我地同枱食飯，佢地唔係個個都識英文，但都有一两個特別流利。可以認識下韓國人嘅文化都幾得意，佢地好鍾意飲酒，當叫人乾杯嘅時候，會用個酒杯底敲幾下枱面個玻璃轉盤，之後其他人就會醒水，碰杯飲酒。

呢間酒樓啲嘢都幾好食，其實中國菜我一直都覺得好好食。不過仲有一樣嘢就係，上得黎做嘢，就預左要酒，連我呢個平日滴酒不沾嘅人，都要走唔甩，因成餐飯莫講話茶，水都無杯。

啤酒事少，中間果杯細細杯嘅先係大佬，佢一杯要有手指公咁大，白酒黎，但係酒精濃度有成四十二度。唔飲由自可，一飲不得了，佢有一陣好香好香嘅味，好似花香味咁，一入口就好似一舜間喺口入蒸發左咁，之後果陣酒味會喺個口度留一陣。  好奇怪，我一直唔係好好飲酒，因為我覺得好苦，無論係紅酒，白酒，伏特加定啤酒我都只係覺得好苦，平時一杯我都頂唔順。但係我一飲完呢杯嘢之後，我就覺得啤酒唔苦，唔知係呢度嘅啤酒特別好飲，定係乜嘢，我竟然可以好輕鬆咁飲而唔覺苦，今晚我神奇地可以頂到三两杯。 我記得我以前上高登見過有人話，飲酒覺得苦，係因為未遇到果杯可以令你覺醒嘅酒，可能果杯白酒就係我生命中果杯酒。  

食完飯，同幾個香港人再去酒店嘅Bar，飲多杯啤酒，聽下佢地傾下計，咁就返房訓喇。因為聽朝行程會好full，亦都要好早起身。

 尋晚成三四點先有得訓，今朝又一早起身準備返Part time, 要入馬場。其實呢份工，上年做左成年，今年要退落黎，因為阿翹份正職無左，佢自己接返呢份Part time黎做，講真我無佢咁大須要，所以我都讓返俾佢，我就退落黎，久唔久幫佢頂下更算數。呢份工做嘅嘢好簡單，機械式，流水作業，無乜挑戰性，但時間長同好沉悶，大部份時間都係hea，其實我麻麻地鍾意做，不過我鍾意錢，所以有得做，有得做我都會去。

返到屋企，二哥两仔爺又黎左，今日佢煮夜晚果餐，所以我就抖一個星期，下個星期先到我。

食完飯又要陪個姪仔玩，我真係充分明白到為人父母果種偉大，就算只係同小朋友玩都好，都好花心機，要好有耐性。不斷去玩啲佢鍾意但你自己覺得沒趣嘅嘢，任何嘢都以佢為先。通常我陪啲姪仔玩一陣就會行開，但阿哥就由頭陪到落尾，睇見都辛苦，我真係好佩服果啲耐性，做人老豆係唔同啲。

 好朋友，阿謙嘅入伙派對，我地幾個IVE又可以聚埋一齊，打下機，食下嘢，吹下水，今次仲有board game玩，真係好開心，成點鐘先到走，無哂車返屋企，搞到宜家先可以打日記。

阿謙出年二月就拉埋天窗喇，當日仲幫佢手同佢未來老婆求婚，遲啲又幫佢做兄弟，其實我好登佢開心。

想當日佢係我地咁多個入面成績最差果個，亦係唯一一個無讀大學嘅。但係今日嘅佢人工俾我地多，成就比我地高。係佢令我明白，有時學歷唔等於一切，人去到絕路就會想辦法求生，唔服輸抵抗落去嘅人就會成功。

個Party嘅第一大主角，個個都圍住佢，佢叫Mo仔，一歲左右，好細身，好細膽。好少事就成身震哂，我同佢玩左陣，真係好可愛。

題外話：飯後又傾下家林嘅感情問題，有個女仔向佢表示好感，但呢個女仔其實已經有男朋友，佢好決斷咁放棄同個女仔發展。 呢件事上面佢處理得好好，有時做人去到某啲環境真係要好決斷，非誠匆擾。鍾意一個人無錯，拒絕一個人嘅愛都無錯，但如果你明明對人無意思，但又俾假希望人地就係大錯特錯。宜家有太多人係咁，咁樣真係一種好自私行為，根本係喺度浪費緊另一個人嘅感情同時間。

所以做人應該決斷啲，唔好做任何會令人誤會嘅行為，非誠勿擾。

又係忙碌嘅一日，要開始Pick up啲新嘅嘢，我完本做開電嘅，遲啲要開始跟消防泵，完全係第二個範疇嘅嘢黎，黎緊去南京都係為左我將來接手嘅準備黎，今日我同事好俾心機咁教我，但我真係無乜心機聽，吸收得唔係好多，遲下要温書喇。

中午，阿南黎左我公司見工，一心諗住終於幫到呢個兄弟，以為可以我地又可以拍住一齊上，點知結果都係嘛嘛地，以佢嘅性格要佢咁大犧牲，佢應該唔會搏，所以我地始終無緣。

下午，公司走火警，我同同事鼠左出去食Tea ，我已經連續三年無走過火警，嚴格黎講我係重來未喺公司走過火警。

要記得星期一之前唱定啲人仔先。

今晚早啲訓，聽朝又搶Iphone。

 返工啲嘢，一係就終日無所事事，一係就忙到嘔，個Schedule俾人排到滿一滿，今日上午落左地盤，四五點做完，仲要仆返公司整報價。原本聽日仲要過澳門，好似取消左，如果唔係我會攰死。

我都唔明點，啲嘢係都要，一時多一時少，平均啲唔得嘅咩。

下個星期就出發去南京，可能係咁將香港啲堆埋一齊，我宜家先咁多嘢做。