真係有好多人留左野係日記道比我睇 原本我想留返comment比你地
不過諗諗下不如都係打係呢道一次過仲好
首先我真係估唔到原來我有咁大影響力 我由返工到到而家做左都未夠一年
而且我識你地都唔係識左好耐
有d都仲係今年先識或者叫做熟d 但原來大家都咁鐘意自己
呢樣野對我黎講係一個好大的鼓勵同肯定 係沙田做呢一年真係冇白廢
我要走的決定好大部份都係因為我想追求一d自己認同ge野 亦可以話係一d理想
雖然我都好唔捨得 但係有個重點 我諗你地都會明白
就係我同你地咁多人一齊去追尋你地自己的理想的時候 作為一個社工 我都要去做呢樣野
大家唔好因為我而討厭楊震或者係之後的社工 佢地都係同我一樣都係真心希望幫大家去成長
係呢段短短的時間入面 你地有d人識諗左 有d人大個左 亦經歷左唔少野
其實諗深一層 你地ge成長係真係靠你地一手一腳去堅持而得黎 我係當中只係鼓勵下同支持下
你地就可以自己去做到好多野出黎 你地真係好叻 我都好榮幸同自豪
始終唔可能有社工跟你地一世 所以你地最後都要靠自己去尋找意義
比起你地覺得唔捨得同覺得我好好 我更加希望你地係未來ge日子可以過得精彩
有錯唔緊要 事情要解決係好容易 重點係大家諗下 究竟係呢一d經歷入面 你有d咩野成長
嘉裕: 你要記住你話你自己已經唔會咁衝動去面對一d野 之後都要保持住 你都係johnny入面其中一個最有義氣的人 咁你做任何事之前都記住諗清楚
羅景: 你係咁多個入面最醒目的其中一個人 有d野你識得自己去諗清楚先做 但唔好持住自己醒就大曬 咁樣好容易會衰
雞雞: 你都係最有義氣的其中一個 而你都係比較成熟同諗野ge人 你自己去左美國之後要記住唔好比自己衰 記住唔好食大麻果d
昌昌: 基本上你最細 平時都冇咩出聲 平時都係跟大隊咁 睇得出你對朋友好夠雷 不過你要諗多少少自己的目標
郭証: 我好欣賞你對於拒絕黑社會的堅持 你講得出比我聽就要記住你講過咩 雖然你而家覺得生活冇咩問題幾開心 但到你開始覺得生活悶的時候就可以改變
呀王: 咁多個人入面你係其中一個令我比較擔心 平時唔好成日做埋d撩皮ge野 要識得尊重人同保護自己 不過我知其實你係明白去到邊d位做人係要有底線
乳牛: 我估唔到你會係打最大篇果個 呢樣野令我好驚喜 多謝你 你都係咁多個人入面最醒目的其中之一 但你都要好好咁諗下係未來日子 你希望自己可以有d咩目標
肥仔俊: 其實你都係有義氣 不過就怕辛苦 要學識尊重人 下下屌人老母會令人覺得你搞事 但我都知你其實都清楚究竟咩先應該做咩係唔應該做
肥禮: 其實我係深宵外展社工 你好少夜晚出黎我都唔應該搞到你成日搵夜晚出現ge我 不過唔緊要 你都要記住升中之後有某一d堅持 唔好咁易受人影響
子進: 我都估唔到你有咁感性一面 你未算好大個 好多野仲有得揀 一次半次做錯事好平常 有教訓之後下次做返好就冇問題 你仲有好多機會 唔洗擔心
魏b: 你係最唔聲唔聲又唔知你諗乜果個 你係最大 黎緊係成人 我覺得你諗野應該會最成熟 係時候去諗諗以後的日子 人始終要靠自己去生活的
呀霆: 真係咁多個入面最令我又愛又恨的人 機會唔係冇 要靠你去把握 過程入面你自己有好多改變 唔好最後又打回原型 你肯做的話一定冇問題
大致上我回曬你地呢一班人 其他的可以留言比我
我諗比起我帶比你地ge 你地帶比我ge更加多 所以應該係我多謝你地
仲有黎緊我唔係唔做社工 而係去第道做姐
為自己定一d目標 定一d堅持 去追尋你地的理想
人冇夢想 同條咸魚有咩分別? |
