今日係二零零七年五月十二日
星期六
今日陽光充沛
風和日麗
係陳慧琳結婚的大喜日子
中午時去到新世界中心的伊甸園
參加威廉王子同陳慧琳公主的結婚典禮
雖然今日我又遲咗出門口
但係好彩都及時趕到
仲可以同新郎新娘影到一幅相
今日好好好多人呀
新郎哥宣誓完畢
到新娘宣誓時
靜咗一陣
雖然新娘子背住我
但係都估到係陳慧琳忍唔住喊架喇
俾佢搞到我都眼濕濕
之後出咗去外面影咗一幅相就走喇
夜晚再去逸東酒店飲喜酒
去到已經差唔多八點喇
好多人呀
延開廿多席
新娘子成晚都好靚
但係好瘦
新郎哥好似有啲緊張
陳慧琳都算叻女架喇
冇我想像中喊得咁多
其實都有幾多感動位架
好似介紹佢哋係點識啦
到佢哋上台時多謝佢哋的爸爸媽媽啦
我又睇到眼濕濕
唉
傻一呀傻一
都話你眼淺架啦
今晚仲見到特別多的長輩添
今日見番唔少永亨的舊同事
中午見到 Perman、Winnie 同埋阿基
初初真係唔認得 Winnie 呀
夜晚就見番 Katherine、胡 Sir、阿卿、肥根、小燕、阿屯、偉哥同埋舅父
只係冇同偉哥同胡 Sir 講過嘢又或者見過面
見番佢哋感覺好唔同喇
佢哋好似好假咁
舅父仲講咗一句令我好唔舒服的說話
唉
不過呢次之後
我諗以後都應該冇機會見到佢哋架喇
今晚仲發生咗一件白痴事件
事緣今晚班姊妹搞咗個驚喜俾陳慧琳
就係幫每一個來賓用即影即有相機影一幅相
再每人寫啲嘢喺上面
點知原來一張咭紙要貼四張相
但係我已經寫咗大半版
個陳慧蘭又唔講清楚喎
哈哈
今日下晝趁有空檔時間
返咗去 Poly 溫書
好多人呀
尋晚喺 msn 同一個 net friend 傾開偈
知道佢都係喺 Poly 返學
但係佢係讀 Master
原來佢個 Master 係 awarded by PolyU
而只係需要讀兩年
學費都只不過係七萬五
好似幾平同時間又唔係長
幾好咁
其實我都有諗過第時會唔會讀番個 Master
其實宜家工作個競爭咁大
有番個 Master 都係好嘅
但係宜家的目標都係應付咗個 Degree 先講啦
其實如果傻一可以賺多啲錢
咁就可以同朱古力仔早啲搬出嚟住啦
我要努力 |
