睇個主題都知道今日我又去打排球學界，心情冇上一次咁緊張，可能因為試過失敗嘅滋味。啱啱女排打完，同阿sir檢討，聽講好似輸咗。不過唔緊要，下次再黎過。講返今日嘅比賽詳情，對手係伊中中。我覺得自己比上一次發揮得好好。第一局，開局都開得幾順，開波同接波方面都唔錯。所以輕鬆地贏咗一局。到第二局，我地變到太過放鬆，以為贏咗一局就完全贏，冇咗喺第一局嘅謹慎，好多球都唔去認真接（我都有依個問題)而且人地又急起直追，咁第二局嘅結果好明顯啦。唉!!!第三局，打十五分，同上次差唔多一樣，上次我地輸一局，贏一局，又打十五分。開頭嘅三四分，我地一直落後，唔知做咩我嘅情緒起伏好大．一講Mass就有D想喊，不過忍到。打十五時，我都係比較欣賞我嘅發球，又係連續開咗四至五球（已經算唔錯，學界對手嘅接波能力都應該有返咁上下）但係最唔抵一球，就係當陳紀瀭打歪咗個波去後面，我成個人都跑咗去後面追波。我撞埋綠色網度都將個波打返入場中．點知又被人失咗。個球我已經接得好令，基本上用下手輕輕打過去都得。但係，算。結果同上次一樣。成場打完，阿sir同我地講野，阿chris又忍唔住喊，個陣時我已經有Ｄ眼紅（係第二種眼紅）阿sir又好似想喊，所以俾咗馮sir講野先。講講下，阿Mark頭向下,用手遮住，都估到球生咩事啦。然阿sir講野，開頭時佢話自己唔好，冇用心教我地，又叫我地答應佢下年唔好退出等等。依Ｄ說話我都忍得住唔喊。但係一到隊長Chris講野，佢又黎。唔得喇，我真係忍唔住，喊咗出黎。GC坐我隔離，佢拍下我，安慰下我。但係我好似仲傷心。三四分鍾後，我平伏咗我嘅心情。聽埋阿sir講野，就走人。

  今場打得好精彩，好激烈。冇乜野可以令到我咁傷心，同為佢流淚。可想而知...