呢度寫o既野一向唔清唔楚，因為又唔係寫比人地睇，咁清楚做咩？! 自己明就得啦，不過既然有人咁捧場，得閒又來睇下，得閒又來墮入下d 角色o既話，我唯有將野講得清楚d 啦。如果唔係個個都將d 自己做過o既野，硬塞比我話係我做咁咪好唔掂？! 咩叫清楚d？ 開埋名我諗夠清楚啦掛，但開名又好似好衰，不過都唔及人地一個word document send 比兩個人咁衰囉。從來我都無對任何人講過關於呢件事o既任何野，因為我想盡小小力去保護一個重要o既人，令佢不受傷害，但估唔到傷人o既唔係我，受傷o既卻係我......
拿，呢篇係我特登打比你架，收貨啦! 今次肯定無錯!!
第一次e-mail 我當你發神經，估唔到你會send 多一次來! 你要清楚我就同你講清楚：
「我 無 鍾 意 過 你!!」
暫時，亦對細過我咁多o既小朋友無興趣。
以上係重點。
下面果d，你唔喜歡可以唔睇落去!
一直都係你話我地之間無愛情，不斷咁叫我大姐，仲話咩"我仍然會當你係我既好朋友KAMAN"，大佬呀，我幾時邊度向你示過愛，搞到你要拒愛呀？一直都係你單方面話要同我做friend，然後不斷避開我，野都唔同我講多句，有事都話怕左同我講低聲o既，見到我就驚惶失措，咁算乜野朋友呀？!
ok 你話我文字上抽你水，一時時啦，我認~ (不過你真係分到邊句係寫比你睇咩？？？其實唔係好多咋喎...)
文字上可能有d 濫情，因為我重情。
唔怕再o尋氣講多次，朋友，對我來講，真係好重要，失去一個，我覺得好多，真係太多啦。曾經，我當你係我好好好好o既朋友，無人陪我食飯我call 你，落雨無遮我都call 你，唔係因為你份人好"恰"，係因為我覺得你係good frd，先去煩你 (查實我真係好少call 人食飯call 人幫自己，只係怕煩到人)；出field 我幫你，唔係因為我地係labmate，唔係因為你會幫返我，係因為我當你係朋友先去幫你，通通都唔係因為愛上你囉..... 乜你真係覺得我會唔介意晨早流流起身幫人出field？ 我好介意架，我最憎就係早起身無得訓，不過朋友一場，無計o既。但係估唔到你會同我計，咩你幫我做fyp d 野，只係因為我幫左你，一睇到呢句，我d 眼淚真係baba 聲流落黎，原來朋友係咁睇我，真係心痛到死。
之後仲要變本加厲，話我鐘意你都算啦，喂咩事，出自你把口，話就話我地係朋友，但人影就無左？真係差在未見到我就掉頭走架喎，我對呢家野好誠實，無frd 做就無frd 做，唔好口話一句朋友，然後就不斷咁傷害人丫，我o係自己日記發下牢騷有咩問題，我記性好，記得同我最好o既朋友一齊做過o既開心事有咩問題？hurt 到你？定令你誤會我對你有咩非份之想？如果你真係唔記得同你d 朋友做過d 咩難忘o既事，or 你覺得只有同愛情有關o既野先值得記起，咁做你o既朋友都幾悲哀。或者你只係覺得我地之間o既野無咩咁難忘，值得我成日緬懷過去，咁真係sorry，我唔知我其實係咁唔重要.... 真心覺得自己呢三年大學過得超失敗...
每一次我諗起d 所謂o既"朋友"咁對我，我就喊到收唔到聲，感情唔係得愛情架，我為呢份友情放落去o既感情都唔少丫，覺得傷心好應該個喎，乜你認為只有愛情可以令人咁傷？所以覺得我對你o既怨氣係來自你無鐘意過我？唔係囉，我信男女之間有純友誼，真心覺得對方只係朋友，值得交心o既朋友，而無任何曖昧關係。我曾經以為我地可以係咁樣，所以我好重視呢份情，呢份得來不易o既友情。o係你第一封e-mail 來果陣，我就知道，係你單方面認為呢段友情變左質，而我，其實唔知發生過d 咩事，一直o係度睇你自說自話 (我唔肯電話同你傾，只係因為果陣岩岩知道讀唔到m.phil，霎時間打擊太大，根本無辦法用平常心去處理果陣大堆o既問題，而唔係因為嬲你e-mail 同我"攤牌")；到左第二封e-mail，我可以同你講，係你親手摧毀呢段友情，果少少可以再同你做返朋友o既期望，消失左。
如果你覺得你做o既野對我無咩傷害，你可以試下親口同我講一次e-mail o既內容，我保證你可以睇到一個，o係人面前死都唔肯喊o既人，因為你o既說話而喊到黃河缺堤咁o既樣，不過唔保證我可以控制自己唔打人。
我好嬲，亦好失望。
做一個冷冰冰o既人幾好呀，起碼唔需要對你重視o既人投放太多感情，即使果份並唔係愛情。 |
