又係一年一度母親節 , 每年都不外乎飲早茶 + 吃飯 , 由於我地大家都唔想出街同人迫 , 故決定係屋企食 , 由都為人母親既大家姐操刀 , 一样咁好餸呀 , 好味過係街食 , 又唔會想食咩無咩 ....

是日晚餐有 : 蝦 / 蒸扇貝 / 白切雞 / 乳鴿 / 炆魚 / 生菜包 / 豆腐勝瓜獅子頭 / 炒蟹 / 口水雞翼 / 冬菇炆鴨掌

今年我地買左個手袋比媽咪 , 呢個\袋我想買好耐o架喇 , 雖然唔係咩大牌子 , 但勝在價錢合理 , 個款又襯我媽 , 我好肯定佢會鍾意 , 連二少奶都跟我一齊去買多個同款比佢媽咪

當日媽咪見我地同佢慶祝 , 佢都落重本餵飽我地 , 直頭係我地出豉油佢出雞呀 !!!! 媽咪竟一早煲定燕窩湯水及花膠响螺煲雞湯 , 真係好潤好保呀 !!!

又係係娘家食到好飽咁走呀 , 走時媽咪竟叫我攞啲燕窩返屋企 , 咁貴我又點會攞呀 , 留返比佢自己食罷啦 !!!

其實心裡好開心 , 雖則我己嫁左 , 但媽都一样好似以前咁care 我 .... 嘻嘻 , 媽咪 I LOVE YOU !!!!

又有得同三少一齊放假喇 .. 一有機會同三少一齊放假 , 我就會起勢咁諗有啲咩平時我地唔可以一齊做o架呢 , 務求唔好浪費個假期 , 因三少係放weekday , 我放 SAT & SUN 的 ;

今次我拉左三少去大埔踏單車 , 出發時都有微雨 , 差啲又打退堂鼓 , 改去踏冰  or bowling, 但呢啲平時放工都做到 , 故 finally 我地都照衝去 ; 沿途坐巴士入大埔 , 三少仲自爆自己讀書時成日逃學 , 著住校服去大埔踏單車玩成日 , 真係 un 皮

嗰日我地踏左半條吐露港 , 啲風吹埋黎好舒服 , 但踏完又真係好攰呢 !!!

三少試車都咁肉緊喇 , 係咪以為佢手車好辣呢 ... 係呀 , 佢後生時 , 以為自己係車神o架 !!!

三少就連食豆腐花都咁靚仔o架 ......

沿途見到漁夫叔叔同漁夫嬸嬸

係吐露港食返支回魂煙先

呢個係我一生人既第一個豬扒飽 (因我唔係太好豬扒的)

踏完單車 , 我地就出返去尖沙咀join 二少同二少奶去食海南雞飯 , 然後去睇 EASON 演唱會 ;

好失望呢 , EASON 又病又失聲 , 無晒啲假音 , 睇到我有啲悶o添呀 ;

睇完演唱會 , 我地仲過埋大海o添呀 , 因好齊人呢 , 三少啲兄弟係晒澳門呀 , 呢個假期真係玩得準呢 !!

今年生日 , 食得好飽呀.... 肚餓既感覺足足消失左成個星期 ..... 勁呀

(1-MAR) 頭炮有三位靚靚姐妹同我食日式爐端燒 , 飯後再+1杯巨型德國啤呀 !!! 同佢地吃飯真係太開心 , 咩都講 ,  笑餐死呀 .... 仲有禮物收 , 有鈴鈴既DAIRY+銀包同埋IVY 既HEAD-CREAM, 年年都有人送HAND-CREAM 比我 , 我用極都有 ... 正 

(3-MAR) 第二炮 , 再黎媽媽整既盆菜 ; 勁呀 , 媽媽2點放工都整到 ; 我仲以為返去食個便飯而己 (其實 , 好開心呢 , 因我上次只是隨便同講過想食 , 佢好快咁答我等我生日再整 , 點知真的有得食) , 飯後再有天使蛋糕 ; 禮物有大家姐既大利是一封 !!!

(4-MAR) 第三炮 , 相識10年既舊同事唱K BUFFET , 我太耐無唱K 了 , 所有新歌都唔識

(6-MAR) 第四炮 , 去同事家中打麻雀+打边爐(TKO 首都 - 綠柔柔 , 心曠神怡嗰度呢) , 好食過出街食呀 , 超欣賞牛"隻"肉 / 蟹 / 脆骨鯇 / 花甲 ... 真係回味無窮 !!! 食到超飽  , 真係打個"egg"都差啲嘔返出黎 , 我特登唔飲可樂先食得多啲咋 ;

下午茶 , 仲有我 order 既煎釀青椒 , 正呀 , 唔洗整又唔洗洗 ....  ; CODY 仲好好 , 買左個黑森林蛋糕黎for 我b-day, 雖然好飽 , 我都要盡力食呀 , 話晒一返心意 , 呢餐真係飽到我第二日起身夜晚7點都未覺餓呀 (我瞓到3:30ppm);  當天都有禮物 , 我win 左麻雀呀 (HKD788) .... 嘻嘻 !!!!
 

(7-MAR) 第五炮 , 潮篇打边爐 again ..... 食前飲定涼茶打底呀 ; 呢"濟" 係捨命陪君子的 (此君子乃二少奶也) ,

(8-MAR) 第六炮 , 松屋日本料理 , 由於呢個星期食得太多 , 真係唔係太吃得落 , anyway, 多謝我老公請客

老公今年仲令驚喜咁 , 叫左佢啲FD 買個蛋糕黎我家比我切 , 但係佢個驚喜都係失敗左 , 事原係佢同我講德話上我家 , 平時我都無所謂的 , 但今日我生日 , 我唔太想囉 ..... 咁我就再問佢係咪真要黎 , 可否明晚呀 , 老公怕我嬲 , 故無奈地要話我知 , 你將會無晒驚喜 , 因德同TAI 買左蛋糕黎揾你 ... 老公仲話我 : 你可否比次機會我可以比到驚喜你呀 , 唉 , 咁即係佢唔夠醒囉 , 若佢同我講德同老婆鬧交 , 我又點會唔比黎呀 ...... 傻仔

生日食咁個多餐 , 咁多日同我慶祝 , 我真係好幸福呢 !!!!!

今朝一早就比人激親 ....

人物 : V小姐 / 大牛先生 (佢地係一對)

以下是我跟V 小姐的對話 :------ (V = 我個FD , G=我)

V: 喂 , 你個死婆 , 做咩我將我啲相比大牛睇呀 , 我唔鍾意啲嘢四圍比人睇囉

G: 我係屋企FILE 緊相 , 咁啱佢地係度 , 咪睇到囉 , 大牛話佢都睇過啦

V: 我無比佢睇 , 係佢唔覺意睇到 , 我唔會隨便將啲嘢比人睇 (又重覆)

G: 十年前既你同我呀, KIND 爆 , 佢地都有笑我啦 ... 唉 , 唔打緊啦 , 大牛都係你既人咯 , 你而家靚左咪得囉

V: 你應該小心啲

G: OKOK , 下次佢係度我唔拾屋囉 .... (我而開始扯火)

唓 , 我又唔係比佢以前男友啲相大牛睇有咩問題啫 , 係 , 可能係我唔啱 , 無問佢就比人睇佢以前啲相 (小家的人至會介意) , 點不知 , 比我知道佢竟然同大牛講無謂 , 下 , 咩事呀 , 扮大方得體 , 扮賢淑呀 .....

今日 , 公司請食lunch , 我唔知for 咩 , 都係去飲茶囉 , 7 女1男 , 食左28個點心 , 好誇呢 , 菜有2碟 / 包有2籠 / 連腸粉都有 3碟 + 1 碟炸兩 

飯後仲有一年一度既抽奬 , 勁呀 , 9 份禮物 , 頭奬係HKD800 呀 , 講出黎都笑死人 ; 我一抽就抽到個SUPER , 價值HKD1000 CASH 呀 , 我以為自己咁LUCKY 啦 , 點不知所負責呢次抽奬既人話 SUPER 同 #1-9 既係禮物係分開抽的 , 我只好無奈地嘔返呢HKD1000大元出來 , 我敢肯定若當事人不是我 , 而是其他做得耐的老神子既話 , 一定係袋袋平安 ......... 事情發展成咁 , 我又可以點呀 , 只好硬食 ......... Final 我咪抽到 HKD300 惠康CASH COUPON 囉 , 真係多謝晒 !!!!

越諗越心深不憤 , 他媽的

大年初十

話o甘快就係呢個 trip 既 last day  喇 , 我地9:00 check out 諗住早啲去上野作 shopping 既最後衝刺 ; 團友們先係麥當勞食個豐富早餐 , 再出發 , 此時我地一行五人己由2大+2細篋 , 變為2大 + 2細篋 + 1 個大bag 及背囊 (但啲篋都爆爆地)

我地去到上野站 , 先張啲篋放係車站啲LOCKER 度 , 否則會影响我地shopping 時既流暢度

一出車站就係阿美橫丁 , 黎呢主要係比男的買波鞋及買手信 ..... 三少又係度執到平野喇 , 佢執平野既能力同毅力 , 絶對可以同啲 C9 媲美呀  !!!!

呢條波蘿好好好甜 , 好好好多汁的呀 !!!!

掃完一輪貨 , 我地就去左食呢間築地直送魚生食 , 價錢一般 , 地方不是坐得太舒服 , 食完要即走的呢 ....

呢隻土產魚生跟香港的唔一样 , 香港嗰啲肥啲 , 食得多會"漏" , 但呢個就色淡啲且個味無咁"漏" , 尚算好味啦

飯後去左買手信 , final 係買到以下咁既環境去機場的 ........ 勁呀

五日裡面唯一一張團体相 .......

就係咁 , 五日開心既日子就過左了 , 展望出年同三少去血洗東京 ..... yeah

Show 下買返黎既手信同戰利品先 :

有勁巾 / 褸 / T-SHIRT / 孖煙囪 / 手巾仔 / 波衫

4對鞋3對係三少的 .....

三少買左個PORTER /  我買左個 AGNIS B 袋 (我啲同事係咁叫我唔要記住比佢 , 哈) 及ANNA SUI 超抵銀包一個 (AROUDN HKD500)

帶 YEN 170000 , 用淨 YEN 60000 ....

大年初九

好快到左第四日了 ....

今天行程第一站係去三鷹美術館 (宮畸俊) ... 見目的地離三鷹車站不是太遠 , 我地選擇步行過去 , 沿途景色優美 , 好舒服呢

可是 , 最遺憾係美術館不容許影相 , 未能作留念

仲有900m 才到達 ....

終於到喇 ... 三少個样係咪好精神呢 , 好少咁快回魂 , 因為行左好多路呢

參觀完美術館 , 我地依著指示牌向井之頭公園行去吉祥寺 , 依書說係行 10mins . 且沿途景色幽美 , 值得一行 , 可是全是不附 ........  我覺得景色荒蕪及淒涼就真 ;

呢個景算係最靚呢 .........

不知是垂死 or 初萌的櫻花

呢條係本書介紹值得一試既腸仔 , 味道不外如是 .......

去到吉祥寺 , 我地先揾啲野填填個肚 , 食左巑歧烏冬 , 又平又好味 (又係掛住食 , 無影相)

食完又係去shopping 既時候 , 吉祥寺既伊勢丹快閉喇 , 我地緊係唔會錯過呢個掃平野既機會啦 , 但final 只係買左個ANNA SUI 銀包 , 計返港紙都係500蚊咋 , 仲要都幾靚 ;

呢個都係三少聳恿下買的 ..... 咁都係既 , 香港買成千幾蚊

之後 , 由於二少奶太攰 , 故佢地先返酒店 , 我同三少就再殺落新宿 ; 新宿主要被 0101及伊勢丹包圍住 , 雖然啲時裝好靚 , 但太貴 , 買唔落手 , 只好暗然離開 ......

晚飯去左間ONLY 食牛既餐廳 (選擇少 , 不是太滿意) , 三少完全唔啱食 , 只叫左個素湯飯 , 唯有返酒店前買肯德基食囉 .....  唔係實瞓唔著

大年初八

今日我地既行程係去東京迪士尼 !!! (我同三少第一次係迪士尼呀 , 香港嗰個我係唔會同佢去的 , 因佢啲前度同佢去過呀 ........

今早係壽司做早餐 , 不過唔係築地嗰啲 .....  為左省時同省YEN , 我地尋日趁超市關門前去買的 (朋友仔教路 , 關門前會做特價) ;

大概10:30 AM 左右 , 我地到左迪士尼門口 ; 呢度果真係凍啲 , 故三少做足準備工夫 , 由佢孭個降落傘 (背囊) , 孭住我同佢各人一件外套 + 手襪 , 簡直係重裝備呀 !!!!

東京迪士尼真係唔同啲 , 地方好大好大 , 但係人都好多 , 每個game都好多人排隊 , even 我地買左fast pass 都要等成幾個鐘先有得玩呢 , 二少同三少照弄個fast pass 玩space mountain , around 1:00am 等到 6:15pm ; 之後我地去左玩3D 既動感影院 , 其實個 story 好嘛嘛囉 , 比起海洋公園嗰個好似爭啲 ;

但我好抵囉 , 因三少自制左 4D 比我 , 條友仔扮啲老鼠係咁踢我隻腳 , 搞到我仲好驚咁提起對腳 , 仲要同二少奶講 " 哇 , 仲有野踢我呀 " ...........  

我地扮緊米老鼠的 , 但無影到對腳

呢座城堡係迪士尼既標誌 ... 緊要影返張相啦

小團友個媽媽去左買史迪仔既爆谷 , 故係度玩住等 ..... FINAL 買左以下既史迪仔LUNCH BOX SET , 價值港幣OVER 100 ...... 為左個仔開心 , 在所不計啦

呢個就係嗰個LUNCH BOX SET 喇 , 三少話唔洗自己攞錢買 , 攞黎影返張相先啦

郁家為左比我倆enjoy 下honey moon , 故我哋暫時分道揚鑣 , 到花車巡遊完畢後再係門口等埋一起過去幕張outlet 嗰边午餐同shopping ......

都係shopping 啱我 , 人大左 , 無咩童真 , 係迪士尼覺得有啲悶

本旅遊介紹書籍又話呢度唔能夠滿足想shopping 的人既 , 但我地都買得好開心呢

買到連SPACE MOUNTAIN 都放棄了 , 最後只是折返睇煙花就回程了....

戰利品:

我的 :-

1/ AGNIS B 手袋 (個個都話靚呀) , 2/ ADDIAS 波鞋一對 (本來無諗住買 , 係三少聳恿下 , 就範 , 但都好扺 , 係特價個TRAY 度揾到的 , 仲要斷碼)

三少的 :-

1/ ADDIAS 波鞋一對 , 價值 YEN 1,000 仲要有折 .......

返回池袋 , 我同三少去左買我早就係本天書度 target 左既野食 : 手羽  + 串燒 + 炒飯 (呢個係三少指定的) + 八爪魚丸 , 好好味呢

太家睇下呢兩張相 , 就可睇到边個個攝影技術了得啲 .... 哈哈

大年初七

今天 , 我地plan 左去新宿食好好味既和牛 - 六歌仙 , 呢間野係港人評份好高的 , 價錢亦好貴 , 所以我地安排食個早lunch .....  按我同二少奶之前編排既schedule , 今早係要食啲飯團頂肚先 , 故我整左兩個杯面同三少各人一個 , 但我忘記左我地好快就要食lunch , 其實可以唔洗食都得 , 搞到去到時 , 個面都未落格 , 仲要比二少同二少奶笑我地唔夠 fexible ......

但都要再食的 , 因為我真係好鍾意食牛肉 , 且仲有伴同我一起食 , 三少係唔食牛的 (基本上佢好多嘢都唔食) , 我一個人食好無癮呢 .....

食啲咩 , 係由我地啲女人發板 , 因男的話無所謂 , 叫我地話事 (其實係唔識睇日文) , 不過我都唔識  .... 二少奶識嘛 ;

呢個係我order 比三少既豚肉定食 , 都好大份的 , 但三少只係食啲飯同豚肉 , 其他配菜都係由我地頂 , 佢真嘥料 !!!

無GEL 頭 + 未回魂 , 個样好KIND ..... (好愛佢啲手指 , 好圓滑呀)

而我同二少奶經一輪商議後 , 叫左兩個牛肉set , 點知原來係sabu sabu , 但都唔錯喎 , 入口即溶 , 仲有好多配菜o添 , only 啲醬料都霸左半張枱 ; 為左過足和牛癮 , 我地都追加左個和牛呀 , 好好好味呢

我諗都無人好似我地咁"沙陳" , lunch 食火鍋 ...

呢個係我地既小團友 - 郁B , 一見到食物佢隨時GET READY , 仲會不停咁話 "栢喬要呀....栢喬要呀" , 氣氛好緊張呢 .....

 食完個lunch , 我地就去原宿既明治神宮 , 環境好靚好大 , 神宮周圍有好多樹 , 好清幽

唔知點解個個都去飲呢度啲水 , 我地又湊下熱鬧 ...

 係神宮 , 咁啱遇著有人行婚禮 , 佢地好嚴肅(氣氛好悶) , 無我地香港人咁熱鬧 , 睇左一陣都無興趣了 , 跟住我地係氹左個圈 , 小團友又擺低幾兩 (去V V 呀) 就走左啦

之後 , 就係我地等左耐既環節 ....... 登登登登 .... 去原宿SHOPPING 呀 ;  遺憾無好仔細咁行100YEN 店 , 原來地下嗰層係無野行的 , 戲肉係二樓呀 ;

<<原宿街頭既型男>>

晚餐我地折返池袋食拉面 ; 好得意的 , 有部好似氣水機既物体 , 先入錢 , 後揀你食咩 , 再彈張票出黎比伙頭 , 就會整比你食o架喇 ! 由於舖太細 , 同我地掛住吃 , 唔記得影低佢呀

就係咁 , 今天既行程就完左喇

今日係大年初六 , 我地要出發去東京

我地要6:30am 去到機楊 , 故call 左架van 仔5:45am 由藍田出發 , 由於係去玩 , 故三少係無賴床 , 比著平時 , 我打成打電話比佢都唔肯起身返工 ;

全車人 , 只有郁B 最精神 , 不停係度講野 , 係咁話VAN 仔好快 , 又不停係數ONE ... TWO ... FOUR (係唔見左THREE 的) , 佢仲為自己能做到 V 的手勢己好興奮 , HOLD 左個手勢好耐 , 就算我按下佢的手指 , 佢都好頑強咁彈返出黎 ..... 好笑 ; 有郁B 係度 , 全車變得好熱鬧 ; 咁都好, 個司機唔會瞌眼瞓 ..... 但呢啲聲浪 , 對三少毫無影响 , 照瞓可也 ....

VAN 仔果真好快就到 ; 見二少奶話要吃DELIFRANCE , 咁我就懶醒建議我同三少 + 二少先去CHECK IN , 再去揾二少奶吃早餐 , 點不知  , 空姐小姐話要對样呀, 哈 .... 好在有郁B 係度 , 電下個姐姐我地先可以坐近幾行 ....

由於我地掛住吃早餐 , 完全無留意飛機好快起飛 , 結果要該航空公司既員工催我地要快啲 , 飛機唔等人的 ... 唉 , 跑到出晒汗 ....

上到飛機 , 啲國內人士亂咁坐 , 竟然坐左郁家一家三口既位 , 大膽 .... 最後 , 佢地當然要走啦 !!!! 前面位男乘客仲係度講話 "唉 , 終於都走左喇 " 我好肯定嗰兩個細佬噪到飛起 , 但嗰個男人勢估唔到 , 原來郁B 同剛才嗰兩個細佬不相百仲 ... 哈哈哈哈 ; 全程飛機 , 郁B 不停咁係度講野 , 如 "爸爸坐飛機" / 三叔 / 三嬸 / 去VV等等 .... (但所有句子都係重覆的 , 好好笑) ; 到飛機降落時 , 機組人員會講一段野 "多謝乘搭本公司航班" , 點知郁B 又跟人講多謝 , 搞到隔離啲乘客都係度笑呢。

去到東京 , 我地好易就揾到要住既池袋太陽城酒店 , 去到都\只係 3:00PM 到 , 比預期中早左 ; 由於 , 太早起身 , 大家打算CHECK IN 後 , 係酒店HEA 下先 ; 我就同三少去左樓下的商場買左天婦羅 + 豆沙餅吃 , 我驚三少唔飽 , 係咁叫佢係便利店買杯吃 , 佢係咁話唔洗, 夠喇 , 食時我先知原來天婦羅係跟飯的 , 唔怪得佢係咁話唔洗啦 , 好笑

瞓左陣 , 二少奶打黎 , 叫我落去樓下商場既OUTLET 行下 , 本來諗住我地兩個女人殺入去 , 點知郁B 醒左 , 二少奶只好帶埋佢落黎 .... 我地諗入場 , 好有自信咁攞兩個袋裝我地既戰利品 , 但我地竟然咩都買唔到 , 因都不是太平 .... 之後 , 我地返店揾二少同三少吃飯 , 點知 , 我打左好多次上房都無人聽 , 我只好走上去拍門 , 但無分別 , 我拍左好耐門三少先有應門

晚飯我地去食二少奶好想食既"和幸豬扒" , 好好味呢 , 由於我食量細 , 故我同郁B SHARE , 飯後 , 我地去行左 SUNSHINE 60 大道 , 頭一天既行程就完左喇