雖然由聖誕節到而家已經有兩個月, 可以話係「遲交晒啲功課」,
但小弟好想將菲律賓一切美好ge野 一一寫喺日記上面,
所以就算過咗兩個月, 都要搵空閒時間去寫低小弟喺菲律賓所做ge每一件事...

小弟一生以黎第一次喺菲律賓過聖誕,
喺果度, 聖誕氣氛 同香港果邊完全係兩回事...

喺香港, 四周圍都係一盞又一盞ge聖誕燈飾,  一棵又一棵ge聖誕樹,
相反, 喺菲律賓, 上述情況可以話係見唔到, 頂多喺高速公路度 不時就有啲 星星形狀ge燈籠,
同樣, 小弟老家亦無任何ge聖誕裝飾, 有的就只有 由五塊竹片 拼成ge星星...

一般香港人都會喺聖誕節 約朋友出黎吃喝玩樂,
但係菲律賓果邊就簡單得多...

平安夜, 一班表弟表妹 拉我出去同佢地一齊去鄰居度 唱聖誕歌,
呢啲都係菲律賓小朋友､青年人 喺聖誕期間 經常做ge事,
通常探訪一個家庭都會 喺門口前唱一兩首聖誕歌, 然後就會有人喺間屋出黎,
比啲野我地唱聖誕歌ge小朋友, 通常都係小量ge金錢,
所籌得ge錢, 就會用黎買 聖誕派對 用ge 小食､遊戲用品 同埋小獎品 (其實就係錢...)
起初小弟 都好怕羞, 唔係點出聲唱, 可能因為 香港果度唔會咁做法啦...
但係 小弟慢慢咁就好享受唱歌帶黎ge樂趣, 仲越唱越上癮~
果晚, 我地籌到好多錢...

聖誕節當晚, 我地邀請埋部分鄰居一齊參加聖誕派對,
情景就好似小弟平時去 匡智會做義工幫手搞小派對咁,
食啲小食之餘, 仲一齊玩啲小遊戲...
其中令小弟最難忘ge就係玩「Break the pot」, 呢個遊戲 喺美國都幾盛行,
玩法係 玩家要朦住對眼, 將裝滿糖果 以及吊高咗ge瓷器 用木棍打爛...
有好多人都打唔中個瓷器, 有啲甚至走到好遠ge地方...
最後小弟出場, 起初我都係打唔中個瓷器, 但係佢地話 比多次機會我,
咁就知道 原來佢地根本就係想小弟打中個瓷器,
所以小弟臨打之前, 用手摸一摸個瓷器 (其實咁做係犯規的哦~), 之後引黎全場ge笑聲...
唔使講, 小弟當然打中咗啦, 但係隨即就有幾個水球丟埋黎, 搞到小弟濕晒...
由聖誕派對開始, 直到完結, 歡笑聲從來未停過...

雖然, 菲律賓果邊ge聖誕氣氛冇香港果邊咁濃厚,
但係小弟認為 喺果度渡過聖誕節 係開心過香港好多...
縱使香港ge聖誕燈飾有幾光, 有幾靚, 喺小弟心目中都永遠超越唔到菲律賓果邊...