今朝一返到中大就見到地盤天台搭晒板,我即刻拎份圖出黎對啦,點知搵極都搵唔到份圖><果陣望住d地盤佬係到係咁做野真係勁無奈=.=最後決定即刻趕返公司劃返d圖再落返黎,點知返到公司果陣竟然見到強哥,我緊係即刻恭喜發財啦~~好順利咁拎到兩封利是~跟住李生又行過黎比開工利是我,我收完俊哥又走過黎比我~~本來一砌都好順利,點知一返到我個位到就發現我個USB竟然壞左(大陸貨即係大陸貨)跟住又搵唔到最update果張圖,攪到劃唔到圖,經過一翻努力最後攪到12點先劃完張圖,跟住即刻趕返去中大(飯都無得食~陰公~~)

期間拆左d利是,點知有一封竟然係空既-0-果封應該李老闆既開工利是,我諗佢老人家唔記得擺錢落去-.-無左$50~勁唔低~~返到中大本來諗住食左飯先做野,點知d地盤佬做得鬼死咁快,無辦法~唯有做完野先食飯,點知做做下送泵果間公司話已經到左中大叫我去收貨,無辦法,唯有收左先~點知去到發覺佢地黎得一個人-.-我d泵咁重佢點幫我搬入去呀~~唉~黑仔~唯有叫佢落左係地下先,遲d叫人搬入去~呢個時間呀勇打黎話有野針,叫我快d返去~大佬呀~我夠想返去啦~而家真係分身乏術嗎~~

攪完一輪返到去同呀勇針完再搵培哥夾野,跟住先正式做野,點知做做下發覺乃左野~~原來d電燈佬同消防佬佢地已經做晒喉係幅牆到,如果我而家整佢地全部野都要拆左佢,無辦法唯有硬住頭皮做=.=結果比十幾個師父圍住輪住小我-.-最慘係我仲要笑面迎人,如果係平時一定會無晒心機~唔知點解今日好似零赦有榦勁,竟然一d都唔覺得灰心(奇怪)

攪完果陣望下部電話~原來已經5點幾~~呢個時侯先諗起我仲未食飯-.-跟住去百佳買左個麵包食~再返chiller果邊攪埋d手尾先收工~~

今日係新年後第一日返工~朝早同我預計既一樣-----勁唔想起身>.<好彩我將個電話教早左十五分鐘響,不過我係張床碌左二十分鐘先起身-.-
今朝又係要返中大~本來諗住又要遲到,點知返到去果陣仲趕到^^跟住一個人on99係個地盤睇左陣~~發覺無咩好睇,都無咩人返工~於是搭車返公司~返到去諗住會有利是收啦~~點知返到去先知兩個老世都未返工-.-公司得兩個人~下晝仲要走左個,得返我同峰師兄~~因為老世唔係到~所以我把握機會釣魚魚zzzz醒左之後做左陣野已經夠鐘^^跟住收工~~簡單既一日就咁過去~~

今年既團年飯又係去左深圳間酒樓到食~不過唔知係咪間野d食物質數降低左,我覺得今年無上年咁好食-.-
權權今年帶左佢女朋友一齊黎食飯~攪到個個都係到問幾時輪到我(我夠想帶啦~~不過而家女朋友都係得半個=.=點帶比你地睇呀~)食飯期間見到權權佢地鬼咁恩愛,我就係到諗將來我同戴小姐會唔會都係咁呢

今年本來應承左夜晚去情情屋企訓,因為上年我同呀妹都去左惠惠屋企訓,攪到佢勁唔開心,今晚唯有就下佢啦~
點知坐緊車去佢屋企果陣叔叔話佢地聽朝5點鐘就會起身去旅行,叫我去姑姐到訓,情情聽左之後硬係發脾氣啦~不過我都無辦法-.-
今年又次激嬲左情情>.<

估唔到今年又要返大陸過年~本來今年無諗過要返去~諗諗下最後都係返左大陸=.=今年同往年有少少唔同~返去果陣得我同呀妹同行,原因係本大爺要去剪頭髮^^"為左唔想其他人等我一個所以叫左佢地返去先~今次又係去左新世紀廣場搵Tommy幫我剪~Tommy不愧係我見過最專業既髪型師~次次同我剪完我都覺得好滿意^^不過佢話我個頭d顏色同我d皮膚既顏色撞得好緊要>.<但係我又無錢染過-.-唯有等有錢先去染啦~~

剪完頭髮行左入間Nike專門店買衫~ 一入到去就睇到件好靚既褸^^著上身一試覺得勁襯我於是即買即著,然後著住件褸係間野到行黎行去~感覺有d唔知點感~.~

跟住去左先施到睇衫~睇到件名牌風褸(唔記得個英文字點串-.-)唔知點解又好想買~
於是又搵個sales講試下講價,初時佢又係話平唔到比我,我硬係唔會咁易放棄啦~~繼續死纏爛打^^個sales係無辦法之下唯有同我講真說話,原來佢都只係做緊parttime就連自己買野都無得平,所以無可能平到比我(搵錯講價對象添=.=)不過我繼續唔放棄,問佢要邊d人先有權可以折比我,跟住佢細細聲同我講:著住黑色衫果d呀~你唔好話比人知係我講個喎,唔係我會比人鬧架~
我即刻會意走左去搵d黑色衫既sales試下~點知講極佢都唔肯平比我(頂你)可能係因為我今次得一個人勢單力薄,上次同家明兩個人你一句我一句話都無咁易就成功左,最後都係無買到-.-

跟住返屋企整埋d行理就嗱嗱林同呀妹去左搭地鐵返大陸~~