放咗4日假，又係時候同大家分享我呢4日嚟嘅點點滴滴~~~

 年三十：獲劉總恩准，於4:00不情不願地捨下心愛嘅FB放工。回家後用碌柚葉水洗頭沖涼，跟住用屋企唯一一個陳年出土風筒吹頭，電線突然起火，發生人生中首宗家居意外，燒傷手指尾，嚇到花容失色！深夜睇<錦綉良緣>，煲到清晨5:00，執埋d嘢大約6:00先有得瞓。

 年初一：難得一家人齊晒人，就去圓玄學院食齋、行荔枝角公園「嶺南之風」，體驗<宮心計>拍攝實景，d花好靚，我幫小豬波影咗好多靚相，跟住去青衣城閒逛，進行搜購風筒行動，但失敗，不過比我喺佐丹奴買咗兩條牛仔褲，揀咗個幾鐘，盛惠$299；返中環翠華餐廳食飯，食咗個好好食嘅肉醬意粉同炸魚皮；深夜繼續煲<錦綉良緣>，大約凌晨4:00上牀瞓。

 年初二：以VIP身份進入黃大仙廟參拜，跟住到樂富廣場飲茶同閒逛咗一陣，並繼續進行搜購風筒行動，但失敗，然後去婆婆屋企拜年同去酒樓食飯；番屋企後，繼續煲<錦綉良緣>，大約凌晨3:00上牀瞓。

 年初三：山頂返工，忙到七彩，招呼無數國賓，見盡人生百態，番到屋企成副骨頭都散晒！小睡個多鐘頭後，繼續煲<錦綉良緣>，由於係大結局，雖然攰到人都癲，但都堅持煲到清晨5:00，執埋d嘢大約6:00先去瞓。

 年初四：瞓到大約11:00起身，梳洗過後，食咗個好豐富嘅KFC魚柳早餐，跟住喺"銀色鴛鴦"嘅帶領下，去咗MEGA BOX同德福廣場閒逛，喺摩斯漢堡同RISO食咗兩個貴夾唔飽嘅下午茶餐，RISO個南瓜湯超正超好味！並繼續進行搜購風筒行動，但仍然失敗。大約9:00番到屋企，洗頭沖涼後，煲<O記實錄 2>同<杜拉拉升職記>，大約兩點幾鐘先去瞓，就咁樣，我嘅「瘋狂假期」正式宣佈結束！