2009 年 7 月 10 日  星期五  

今日大姨媽幫我買咗個手寫板嘞, 所以我就下定決心搬BLOG, 其實想咁做好耐, 因為驚用開嗰個會無端端摺埋, 點講都係Yahoo可靠d, 不過揾陣起建, 我會嘗試兩個BLOG都一齊update. 因為我都擔心Yahoo無端端會變到要收$$$呀...

2009 年 7 月 9 日  星期四  

今日又係炎熱既一天, 我當然唔會放過同馬心悠游水既機會啦...一早都知道呢隻美猴皇唔講得笑, 但係都無諗過原來佢係咁勁, 人仔細細, 游左幾次水之嘛(今年), 已經唔要我扶, 仲識得自己攬住個水抱游游游...最犀利係佢可以好似韻律泳咁自轉...勁

有片為証嫁...

備忘一事...

琴日當我幫完自己剪頭髮(d陰姐), 諗住幫隻美猴皇都修修啦, 點知佢同我講...

媽媽: "悠, 剪頭髮囉"

美猴皇指住個窗: "去嗰到剪啦"

媽媽: "邊到剪呀"

美猴皇再指住個窗: "媽媽, 去沙田剪頭髮啦"

吹脹...

2009 年 7 月 8 日  星期三  

其實小朋友可以定時定候訓覺都真係幾好, 好似依家咁, 10點零我就可以一路嘆電視, 一路寫blog, 而且兩個百厭星依家都唔洗點氹就自己會訓...今晚仲好笑, 呢個馬心悠叫我訓底, 然後就攬住我, 仲拍我氹我訓覺, 馬心然亦都唔執書, 居然幫我掃小腿(又會咁醒既)...有呢兩個咁孝順既乖女, 夫複何求

同場加演...SEXY GALS 嬉水篇

2009 年 7 月 7 日  星期二  

媽媽成日都話我所有野都遲過家姐, 今次我仲唔威返, 家姐要成歲先開始識行呀, 我..."10個月"咋 雖然我唔係行得好好, 但係10步8步都難我唔到, 我會繼續努力, 務求喺一歲之前可以自己行迪士尼...

, 

2009 年 6 月 30 日  星期二  

肥美人今日跌倒呀...婆婆諗住佢識點落級樓梯(因為佢平時都有落開), 所以冇走去扶佢, 點知今次居然"失靈",  肥美人當堂喊到出唔到聲...仲跌到個頭紅左一大撻呀, 陰公