其實我今次去泰國係做training，但我就有啲似放假。一早起身先去做gym，返房洗完頭沖完涼就開始「掃街」(因為酒店唔包早餐，所以要自行了斷)。  係喇~ 我係住喺四面佛隔離果間「驚hi嘢」(Grand Hyatt)

酒店附近係Big C，一間超大嘅超市。佢外面嘅街邊有各樣小食，又平又好味。食飽早餐都只係50「匹」，即係大約10蚊。返到公司就「講吓書」，咁又中午。百貨公司Central嘅Food Loft 係一個好好嘅食晏地方。對香港人嚟講，价錢平唔在講，最重要係多choice。喺曼谷3 個工作天，我就有2個lunch喺呢度解決，而另一日就喺Big C嘅一間餐廳仔食地道泰國嘢。

Hea吓hea吓又放工。我嘅第一站係去做massage。350「匹」1粒鐘都算OK，不過serve我果個「師傅」個size有1.5個我，而且佢又大力，攪到我又叫又笑。不過做完真係好舒服。

最後一站係dinner。我喺出差嘅唯一享受，就係用公司比我嘅allowance食好嘢。所以我去咗Siam Paragon地下嘅一間中菜館食翅。再行吓supermarket先返酒店。你話喇~ 我究竟似去渡假定去開工???