這個是2010~2011年Kill標既第九次。經過上一次行石龍拱之後，又過左一個月，呢一個月真係超忙，所以一忙完，又再次去行山。

對我黎講，行山係一種好好既減壓方式，一路行山，一路感受大自然既一切，真係可以令到個人好放鬆。係差唔多一年前，曾經行

過一次九龍坑山，果次原本係想上埋龍山，不過因為天氣關係而最終冇上到 所以今次有時間就想再試上龍山，可惜，又再次因為

天文台既錯誤預測，令到第二次龍山挑戰再次失敗，不過就Kill到流水响水塘山上面既另外2支標(事情係咁既，今日出門口前天文台

話23~25度，但係當我過左桔仔山坳經車路上到龍山山腳後，覺得超熱超曬，係決定上唔上既時候，打去天文台再check 下溫

度，「Hi Auntie」，佢居然話29度，真係好「向左走向右走」想講粗口，最後就決定唔上，轉戰石坳山果邊Kill標)。，當係補番數

啦。今次上龍山之前，都係先上左九龍坑山先。九龍坑山，對我黎講都係好有意義，係大約九年前，我頭幾次行山，就係行衛奕信

徑，九龍坑山呢段係我其中一段最深印像既。原因係，衛奕信徑10段入面，後幾段(九龍坑山、八仙嶺)係最難行既。仲記得當初第

一次上九龍坑山天梯時，真係上到死下死下咁，最後行到鶴藪就成個人死左咁，真係好辛苦。另外呢段衛奕信徑非常有趣，第9段既

衛奕信徑係由九龍坑山山頂去到八仙嶺山頂，當初第一次知道呢樣野既時候，都真係覺得O哂嘴。其實咁樣既Setting真係好古怪，乜

分段既用意唔係位左d人可以分段行咩，咁每一段既起終點唔係應該係山腳or易去到既地方咩??如果set係山頂分段，咁同冇分段有咩

分別，都係冇得一段段咁行架啦，同每1公里分段冇分別，都係冇作用既，認真係一個奇怪既setting。

上九龍坑山，有4條主要路線，係今日行完最後一條路線之後，就試左3條路線了，仲差1條就玩哂九龍坑山4條路線了。果4條路線分別係

1) 衛徑第八段順走經玉秀峰和天梯上(起點大埔頭/松嶺)

2) 衛徑第九段逆走經流水响道上(起點九龍坑老圍/流水响/鶴藪)

3) 沙羅洞村上(起點鶴藪/鳳園) <--今次上既路線

4) 康樂園直上(起點康樂園) <--呢條係要剷上去既

頭3條都試過哂，希望有機會試埋剩低既第4條。

路線簡介：

由鳳園出發，經鳳園路行到古家園口，轉樓梯上沙羅洞路，到沙羅洞路走往山羅洞村，之後轉上九龍坑山。到達山頂發射站後，沿衛徑第九段行

到流水响分叉口，轉落桔仔山坳轉上往龍山的車路，到車路盡頭後因天氣太熱折返桔仔山坳，之後轉落流水响水塘。經流水响郊遊徑上石坳山Kill

標，再接回衛徑第九段到鶴藪68級再出鶴藪圍完結。

名稱簡介：

雙龍追鳳飛流水

雙龍=龍山、九龍坑山
鳳=鳳園
流水=流水响

Kill標數目：

三角網測站：2個

導線控制點：0個

總數：2個

三角網測站#533：粉嶺鶴藪石坳山山火瞭望台屋頂
(呢支標係屋頂，只能係出面望上去，係就到石坳山山火瞭望台，有一個位可以望到成支標，就係張相影果個位)
入手方式：鶴藪圍-->鶴藪水塘-->68級-->衛徑第九段-->石坳山山火瞭望台-->三角網測站#533
時間：30分鐘
類形：Beacon A
高度：293.2m

三角網測站#531：粉嶺鶴藪石坳山山頂
入手方式：鶴藪圍-->鶴藪水塘-->68級-->衛徑第九段-->石坳山小徑(要剷少少)-->三角網測站#531
時間：25分鐘
類形：Beacon A
高度：279m

詳細路線介紹