女子組聚會, 首要條件食得盡興, 環境容許暢所欲言, 唔會限你食幾耐就要埋單走人!  又為左方便食完散水, 於是決定去左旺角, 最後選擇左呢間韓式料理食店, 係門口見到佢有超值套餐推介 

環境都算幾寬敞, 坐位間唔會好迫, 點菜後, 侍應就送上配菜, 味道都唔錯, 尤其欣賞佢個南瓜及薯仔, 可惜唔係無限添加, 再加添係要收費

由於我地其中一位係唔食豬, 所以今晚都以牛為主

先燒下精選牛肋骨(有醃/無醃) $168, 我地兩款叫晒

肉既厚度比我係其他韓店食既略為薄左D, 所以燒既時間仲快D, 當燒好用鉸剪剪開細塊時, 已經感覺肉質好柔軟, 好似牛柳咁, 食落都幾多肉汁, 無論單食或包生菜一齊食都唔錯!

條"食肉MODE"已經開動左, 快D比多D肉黎, 所以呢2味就呢個時候送到上枱

秘制豬手(跟生菜) $238 - 份量都幾多, 豬皮及肉既比例合埋, 單食味道唔算濃, 包生菜及醬一齊食就岩岩好

紅燒牛肋骨 $98(小) - 一客4-5件牛肋骨, 醬汁煮到入晒落D肉到, 唔會煮到好嚡身, 連除D蘿蔔都好鮮甜, 用黎送飯一流

見到隔離枱燒鮮帶子($128), 個樣幾靚仔, 無埋由唔叫架?!

燒完都無縮水, 配埋少少黑椒碎一齊食, 都食到鮮甜味又唔會痴牙

侍應推介韓式生醃醬油蟹($138), 就試一客吧 - 蟹既份量好細隻, 先試一下蟹膏, 第一口食到甜甜地既醬油味, 然後最尾既蟹膏味先出黎, 唔算好腥, 可接受吧!

想燒多一D海鮮類, 就叫埋特大蝦(4隻) $128 - 蝦既SIZE確係大, 算抵食, 中間仲劏一刀, 會快熟D, 肉質幾彈牙, 唔係"霉"架, 仲食到少少鮮甜味

見佢D牛肉唔錯, 咁就再加多個無骨背肩肉 ($168) - 一咬FEEL到D肉脂爆開, 個人比較鍾意精選牛肋骨

見到MENU入面有疍拌生牛肉絲 $128, 係無人反對之下就試下

侍應幫我加少少芝麻油後再撈均, 牛肉係加拿大牛, 伴埋梨條一齊入口就幾鮮甜喎, 無生肉既腥味

友人提出想飲雪濃湯 - 雪白色既湯好似飲緊忌廉湯, 配埋腍滑既牛展, 食埋少少韓式粉絲, OH........好滿足

最後以牛肉鍋麵 $268作為句號 - 份量夠晒大又足料, 足夠4-5人食, 味道唔錯, 雖然叫鍋麵, 以為係有辛辣麵, 點知原來係韓式粉絲加年糕!

食完呢餐, 我地個腰圍吋數又增加左!　食物水準可以, 侍應服務反應快，唯通風設備差Ｄ，食完會令你滿身燒肉味！

地址 : 旺角通菜街1A-1L號威達商業大廈Deli2 1樓

contact me :  [email protected]