一直都想試韓式九層塔, 但之前見價位都唔平, 又諗每款得咁少份量, 食完會唔會唔飽架? 朋友食過介紹呢間, 見佢價錢OK, 咁就一於試下啦
門口裝飾已經話左比人知係韓式餐廳, 見到個九層塔亦都話左你知我地係食咩, 包唔會搞錯
入到去發現環境乾淨企理, 四人同行可以選擇坐卡位(下次試下先)
打開餐牌, 見到"識得食一定係.............."呢幾個字, 溫馨提示下你究竟點食先最岩, 又幾搞鬼喎! 為左方便客人計時, 每張枱都放置一個沙漏計時, 建議客人每層進食時間為5分鐘, 但我地基本上係無用佢既(Ha..Ha..)
經理透露暫時提供三個套餐選擇, 價錢由三百幾(釜山塔, 首爾塔)至五百幾(濟州塔)(2位起), 第一次食, 就選擇中價(首爾塔)
所有套餐都配有蔬菜, 2位套餐會以5層塔, 下次一定要叫多D人黎食, 咁就可以試到真正既九層塔
塔頂上蓋有個紅色溫度計, 去到85度就可以開餐, 時間都唔駛等好耐, 係等待既時間, 就食住D泡菜同黑豆先啦(都好好味!)
第一層 - 蟶子, 象拔蚌(無需點醬汁, 一食好爽甜, 欣賞佢會將蚌切成條狀, 既快熟又方便客人進食)
第二層 - 海蝦, 元貝 (蝦肉彈牙, 元貝大隻黎唔會老及黏牙)
第三層 - 北寄貝, 新鮮花尾龍躉 (好少食熟既北寄貝, 好彩唔會變左香口膠; 而塊龍躉就食得出鮮甜味, 又有膠質, 我LIKE呀!)
第四層 - 大花蛤, 沙巴肉蟹 (肉蟹雖然細隻, 但都有D膏, 肉亦鮮甜; 而花蛤食落無沙)
第五層 - 南非鮑魚, 海螺及蝴蝶蚌 (肥厚鮑魚食落有口感; 螺肉點酸梅醬代替甜醬又夾到; 蝴蝶蚌口感一般)
食海鮮之餘, 當然要食埋佢地精心配搭既蔬菜, 推介日本蕃薯及靈芝菇!
基本上食到呢度都已經飽, 但千祈咪忘記店員一開始已經係鍋底放置左人蔘鷄加米, 食到尾聲, 每層海鮮既精華已經完完全全咁流入底層既鍋底中, 咁鮮味既人蔘鷄粥真係第一次食, 好滋味呀~~就算飽都要食一碗, 加埋白胡椒粉一齊食, 梗加好味! 食唔晒都唔緊要, 店員一早已準備好外賣盒, 拎返去做宵夜又或係第二日做早餐亦得! 好體貼呀
睇下D殼就知今餐幾咁食好飽, 埋單千完有找, 回食度都相當高
九重鮮地址 : 紅磡黃埔花園11期地下G26號
contact me : [email protected]
|
