係時候要去花墟買花, 買完就近近地睇下附近有咩食, 見到呢間日本菜食店有拉麵, 烏冬, 爐端燒, 好似幾多樣化, 三心兩意的同行友人就話試下!
內裏面積一眼見晒, 大約有七至八張枱, 好彩早入座唔駛係門外等位, 果然早起的鳥兒無需等好耐位都有蟲食............哈!
先黎個刺身, 分別叫左一客三文魚腩 (4切), 厚切口感夠晒, 但以腩黎講唔算太肥美; 另外下方係鯛魚18切, 切得夠晒薄, 點上醋/(柚子汁?), 酸酸地好味道!
呢個真係未食過既叫薯絲野菜沙律, 份量都幾幾, 底層係以青瓜, 蕃茄, 露荀及紫椰菜作伴菜, 每口都新鮮爽脆, 感覺好清新, 再以炸左既薯絲鋪面, 食落好有薯味, 最驚喜係唔覺油膩, 好味道!
食開炸物有條癮, 呢款係柚子味炸鷄, 一客大約有6-7件, 鷄肉炸得皮脆肉嫩, 食時點一下底部既柚子汁及夾埋D䓤絲一齊食, 熱辣辣好正呀!
點多個炸蝦天婦羅, 一客有2隻蝦, 蔬菜類有南瓜, 蕃薯, 冬菇, 食時香脆唔油膩, 炸醬整得唔厚身, 唔會食到一口脆物都未食到食材
呢條係叫做一夜干, 係就係細條左D, 但燒得好香口, 肉又唔會燒乾身, 用黎送酒都唔錯
仲食得落就叫多個冷烏冬, 我鐘意比較有咬口既, 所以放棄稻亭烏冬, 呢個就正正岩晒我口感, 倒埋隻蛋及芥末伴落冷汁一齊食, 我一人都KO得晒!
總括黎講呢間店既食物水準唔錯, 侍應服務態度OK, 唔怪之得門口不斷都有人等緊位!
|
