期待已久既天氣終於轉涼, 涼涼地梗係火鍋既最佳出場時間, 呢間以無限時"鷄煲海鮮肥牛火鍋"作賣點既火鍋店, 係坊間多數限時2個鐘任食, 呢間果然係有亮點呀!
上到一樓係用餐區, 由於時間尚早, 唔太多客, 坐得幾舒服, 但之後就不斷有客到來, 氣氛變得好熱鬧!
侍應講解進餐程序係先食鷄煲, 辣度可以選擇大中少辣或唔辣都得, 個人覺得少辣會好過無辣, 呢煲係二人份量, 都幾適中, 唔怕食完鷄煲都無位食火鍋; 一開始侍應會加埋紅薯粉入內一齊再加熱, 鷄件伴住當中既大量芫莤, 薑及紅洋蔥加惹味醬汁, 食落少辣味道惹味, 肉質唔算太嚡亦食唔到雪味, 而D紅薯粉已經索晒D醬汁, 煙韌有咬口, 絶配呀! 抽風系統勁, 食完唔係一身鷄煲味!
食火鍋往往會飲唔少凍野, 若果逐罐計錢都唔少野, 呢度係包埋任飲既, 仲有自家煲既雪梨茶, 減少熱氣, 滋潤度大增!
2位以上送蕃茄薯仔原隻龍蝦湯底, 真係原隻無花假, 係未落任可火鍋配料前, 先試下頭啖湯, 哇............. 有蕃茄既酸甜味又有龍蝦既鮮甜味, 清甜到爆!
之後當然要食落隻龍蝦先啦, 蝦肉份量唔算少, 食落有少少OVERCOOK左, 但都不失有佢本身既鮮味!
侍應會送上海鮮拼盤, 提議每款只需烚分零鐘(鮑果需要兩分半鐘), 哇.............種類都唔少, 包括扇貝, 鮑魚, 廣島蠔, 黃金甲, 蟹, 海蝦, 青口及鯇魚片
款款都鮮甜, 唔會因係任食而將貨就價, 特別喜愛佢既鮑魚及特大扇貝, 口感好好又夠鮮甜!
食到呢度, 基本上都已經飽左一大半, 但未完架, 侍應再送上其他火鍋配料, 包括安格斯肥牛, 精選丸類, 菇類及田園蔬菜
最令人驚喜除左肥牛真係食出有濃香牛味, 響鈴索晒個鮮甜湯底, 一咬D湯汁係口內爆發; 另外亦發現有疑似MINION既芝士丸, 幾過癮喎
要讚下呢度既侍應服務態度一流, 反應夠快, 主動為客人更換碗碟; 食物水準相當不俗, 星期一至四無限時任食任飲, 真係要諗下究竟老闆係點可以維持生意架? 或者應該係食物好, 服務態度好, 得到食客既不斷支持卦.................除非唔係!
同人鍋地址 : 尖沙咀山林道29-31廣利大廈1樓及地下4A號舖
contact me : [email protected]
|
