上一次係呢到打左個龍蝦湯底邊爐, 一個親民價錢任飲任食, 性價比相當高, "烚下烚下會會友"又想再黎食過, 襯天氣仲凍凍地就一於去馬

係門口見到最新宣傳推介牌及會員優惠, 有大熱椰子鷄煲, 好吸引喎.....................

由於時間尚早, 唔算好多人開餐, 但食下食下就差唔多坐滿全場, 勁! 好彩枱與枱之間唔算太迫, 冷氣及抽風系統又做得唔錯, 食得舒服!

飲品係自己出去拎, 飲品種類唔算話太多, 但大路既都會有, 仲有烏龍茶及自家製既菊蜜

呢度既火鍋係一爐兩食, 首先係食左鷄煲先, 辣度有得選擇, 由大辣至唔辣都得, 我地選擇微辣, 但食落都有D辣, 煲內配以大量洋䓤及芫茜香料, 味道非常惹味! 鷄件份量都多, 食落肉質幾滑, 個濃濃醬汁配埋紅薯粉, 索晒D醬汁, 真係一絶!  忍唔住再追加多一份紅薯粉!

之後就可以轉煲開始火鍋時間, 食物配料選擇都唔少, 有海鮮, 肉類, 丸類, 蔬菜粉麵類

湯底選擇除左有全隻龍蝦外, 仲有花膠湯底, 今次就試花膠湯, 夠晒滋補!  奶白色既湯底傳來陣陣鮮味, 湯內有3-4塊大花膠, 而唔係D花膠筒仔, 飲落味道好香花膠味, 有少少"痴咀", 心理作用下覺得飲完靚左..........哈哈!

先由呢個海鮮拼盤開始, 食材包括: 澳洲蜆, 新鮮鮑魚(呢2款只限叫一次, 其餘可以任點), 蝦, 鯇魚片, 松葉蟹鉗, 魷魚, 花枝片; 澳洲蜆同新鮮鮑魚(上枱時仲係郁架!)好鮮味, 食得出係新鮮貨, 蝦都彈牙, 魷魚夠口感, 幾唔錯!

呢碟安格斯牛肉只免費供應一客, 再點收$48一碟, 薄薄一片, 烚10秒內就可食得, 幾有肉味!

而其他丸類及食物, 最驚喜係呢款龍蝦沙律丸, 中間食到少少芥辣味, 味道幾特別; 仲有呢度有水晶飽, 有紫薯及綠茶味道, 首次打邊爐食呢D, 個外皮係咸味但咬入心係香甜紫薯,  感覺幾得意!

當然要食返D蔬菜均衡一下營養, 有我喜歡既學斗, 可惜食落有少少沙粒, 希望下次唔會啦!

每位$288再加一就食到肚圍又長大左, "烚下烚下會會友"表示滿意!

同人鍋: 尖沙咀山林道29-31號廣利樓1樓及地下4A號舖

contact me :  [email protected]