接觸葡國菜既機會5隻手指數得晒, 通常都係過澳門玩時"順便"食埋, 仿佛咁先似過過大海
呢間新開既葡國菜餐廳位於大型商場內, 位置非常方便, 望到咁Sharp醒既鷄就知係呢度啦!
此店原來前身係札根於西貢, 今次落戶係九龍旺區, 想食葡菜就方便得多
內裏裝修以淺木色為主調, 配以淺藍色梳化, 加上燈光柔和, 播住輕快既葡萄牙音樂, 比人一種無拘束感覺, 適合家庭及朋友開餐暢聚一番
呢度比較特別少少, 門口特設小型枱椅, 亦都留意到坐墊特別選用顏色比較繽紛既, 原來呢度係比客人食下午茶/甜品區
每日專業甜品師都會精心造出不同種類糕餅/甜品, 即使你每日幫襯都會搵到新鮮感, 仲有咖啡供應, 係呢度食件餅, 享受杯咖啡都係一件賞心樂事!
要對抗悶熱既天氣, 呢杯Sangrita就幫到手, 呷一口體內暑氣全消, Cheers ..............
打開餐牌, 食物種類包括風味小食, 餐湯, 沙律, 各式三文治, 意粉, 主菜及甜品, 價錢望落合理
晚市時間, 餐廳會每人送客豬仔脆包, 熱辣辣自家製架, 比起外邊買到既內裏包芯食落有煙韌感, 外皮香脆, 你睇下我隻餐碟上既碎塊就知有幾脆!
既然有豬仔脆包, 就叫個葡式薯仔花菜湯黎伴食, 選用葡式馬鈴薯及葡國臘腸, 真材實料, 不加味精, 奶及麵粉, 只飲到香濃薯仔味, 而咸味就靠葡國腸"輸出", 質感濃稠, 飲完呢個都半飽! 真係由三至八十歲都岩飲! 哈..哈.............
或許好多人覺得沙律係件好易整既食物, 但要計算食物既配搭及醬汁既運用都要下一番功夫, 呢客啤梨番石榴沙律, 甜美爽口既番石榴及香甜啤梨混合係清新沙律菜上, 兩者散發著獨有果香味, 再淋上啤梨醋醬汁, 配搭特別, 味道甜中帶少少酸, 非常開胃, 坊間唔常食到!
傳統葡式拼盤 (二人份量), 包括葡式香腸, 傳統馬介休球, 酥炸魷魚件, 香脆炸鷄粒, 大部份係脆口野, 用黎送酒就最岩; 初試葡式香腸幾香肉味, 外觀同中國臘腸有D相似, 但口感較腍身; 另外個馬介休球味道調教得唔會過咸, 外香內有食薯蓉既質感!
沙甸魚就食得多, 尤其係罐頭果隻, 但原條燒仲要咁大條既沙甸魚就真係第一次食, 貨源黎自葡國, 以傳統方法燒烤, 保證原汁原味! 魚燒至皮香肉嫩, 只需係頭及尾位上界一刀, 然後再係魚身中間界一刀就可以輕易起出魚肉! 咪講笑, 切開時D魚香味更加"擴散", 我諗用手揸住原條食應該仲滋味, 下次試下咁食先!
以6個鐘慢煮而成既紅酒燴牛尾(配白飯), 舊牛尾焾到可以骨肉分離, 無需同舊牛尾"博鬥", 肉質香腍又入味, 一客都有4-5舊牛尾, 配以紅蘿蔔西芹塊, 令醬汁酸中帶甜, 用黎撈飯就正配! 超好味!
黎食葡國菜, 又點可以唔叫葡式燒乳豬 (1/4 客), 伴以沙律菜及肥佬炒飯, 咩係肥佬炒飯?! 呢個飯原來係葡國人聖誕節先會食, 材料有提子乾及彩椒粒, 味道有D似西炒飯! 講返主角先, 乳豬皮燒到脆夾香, 帶點誘人既油光但食起上黎又唔會好油膩! 皮下已經係肉, 唔帶多餘肥膏, 肉質非常嫩滑, 只需用餐刀輕輕一切已可"片"出肉來, 果然係招牌菜!
呢度有個專業甜品師駐場, 每日新鮮研製不同甜品/糕餅類, 以下呢兩款係佢既推介: 酥皮芒果卷, 造型似一個軟皮錢袋, 以牛油味幾重既酥皮包住香甜芒果粒, 再加上圍邊既自家製香滑忌廉醬, 我口裏說......哇....肥死呀! 但身體卻很誠實, 隻叉不斷將甜品送入口中, 不消10分鐘已經完全KO! (內疚MODE啟動中.........................)
說時遲那時快, 呢客葡式西多士亦送上枱啦, 以牛奶浸滿面包先再炸, 呢個功序除左增加香滑感仲可以減少面包索油, 所以食黎黎完全唔覺得油膩, 外面灑上庶糖及玉桂粉, 邪惡程度再爆燈D!
呢餐應該都係我係香港第一餐食既正宗葡國菜, 有D菜式仲係出自家傳食譜, 保證第二度都食唔到, 食得超滿足!
葡匯咪走鷄葡國餐廳 : 尖沙咀美麗華廣場二期1樓167號舖
contact me : [email protected]
|
