呢間專食椰子鷄鍋既火鍋店, 之前已經有計劃去食, 但之後又放低左, 友人"突然"間提起話想食, 話咩係十二月轉冷日子, 要慰勞一下自己咁喎, 唉................其實想食好野, 又駛咩搵藉口呀?!
預先訂好位, 早去到推門入去就見到環境較一般火鍋店昏暗, 牆身掛上特式擺設, 亦有大電視不斷播放MTV, 設有卡座, 適合三五知己黎烚下烚下
踏入十二月, 見到佢有個"冬日套餐" ($438 / for 2-3人), 我當佢為"聖誕大餐", 都唔少野食喎, 一於落左呢個柯打先, 之後店員同我地講係指定日子(12月22-26日, 31日及2018年1月1日)叫呢個套餐, 仲會送你聖誕禮物, 哇......咁真係又食又拎喎! 可惜今晚唔係指定日子...........
唔駛好耐, 侍應已送上套餐頭盤小食
未起動火鍋前, 先黎食下個聖誕三文魚刺身, 貨源來自加拿大直送, 港人至愛, 質感柔滑, 每片亦有相當厚度, 有口感!
另一款餐前小食係呢個海南沙薑脆豬手, 沙薑咁架勢, 梗要用佢黎入饌; 每件豬手都幾入味, 皮爽肉滑, 凍口感加上秘製醬汁既味道, 好快已被我地"骨肉分離"!
醒目侍應會根據客人用餐進度而起菜, 佢見我地食完頭盤就開始預備火鍋時間
原味椰子文昌鷄(半隻)， 兩個人食就岩岩好, 皮下脂肪唔多, 面頭有3片椰子肉
食法係先煮滾起椰子湯底, 之後倒鷄件落去, 用枱上沙漏計時, 完結時(7分鐘)就可以食得
先試啖湯, 湯底清徹, 清中帶椰子甜味, 鷄件斬得細件, 方便快熟, 烚完都仍能肉質嫩中帶有少少咬口, 鷄味都算有!
點上加上沙薑, 辣椒及青金桔既秘製豉油, 有別於一般火鍋既"混醬", 更能提升鷄肉既鮮甜味!
食完隻文昌鷄, 可另加($188)加入昆布鰹魚湯配黑毛和牛牛肩肉
呢個湯確唔係講笑, 原來係新湯底黎架, 湯底係選用北海道昆布和兒島鰹魚熬製而成, 啖湯清中帶鮮甜味, 配襯肉類係好夾
而呢款黑毛和牛牛肩肉, 肉色靚仔, 脂肪分布比例亦恰當, 薄薄地烚幾秒已食得
入口嫩滑, 肉味香濃, 不愧為黑毛和牛, 超正呀:)
火鍋點可以無凍飲? 飲品List中點了呢杯椰子沙冰, 賣相吸睛, 飲落唔甜, 只限到椰子既味道, 證明應該無加糖水, 呢股清泉為今餐錦上添花!
和牛條癮已起動, 年尾嘛, 對自己好D, 叫多個佐賀A5和牛牛肩肉 ($398), 呢個一客有8片,切得更長身D, 肉色潤澤, 脂肪潔白, 目測已經令人好期待
食起上黎比其他牛既同等部位更嫩滑, 輕輕咀嚼已經好快落入喉嚨, 牛既肉香味仍然留在口中...............
火鍋又點可以無丸類, 呢客海南手工丸, 各有4款不同種類, 牛丸彈牙; 鯪魚球鮮甜; 墨魚滑丸爽彈
安格斯牛小排肉質當然與和牛相比會有一段距離, 但火鍋時間, 牛肉始終無人會嫌多, 再講佢既肉質帶點嚼口, 肉味都有, 配沙薑豉油一齊食又OK喎!
為左均衡飲食法則, 呢兩個健康野菜籃及養生菇菌籃當然少不了
套餐包埋日本稻庭烏冬, 個湯底咁鮮甜, 用黎煮烏冬就確係岩數, 再食飽D, 今晚仲唔發個好夢?! 哈......哈.......
食完呢餐, 我都變左聖誕老人呀..........................(個肚DUM)...............HO.....HO............HO......
四季文昌: 尖沙咀金巴利道35號金巴利中心1樓
|
